EJEKIEL 13 - DEENA BAIBÉL (BSI)

Kaaluna Milokong Miri Yatna Kídíem Lujétname

¹ Ruutum ke agome ngokkíng pííto:

² “Tanike ue, Israel aralo, kaalu miripe irula supakke menampe kaalu agom luna kídíem lutortoka. Bulu agí míídusupe kaalu agomem ludung. Iname bulum sipe polangka: Ruutum ke agomem tatlangka.

³ Ruutum Shédí bí sipe podung: Atímana bopol kaalu miri kídí bulu yagorupe adír paayéku. Bulu agí-agísue kaarí-kaanyo kídíem, agom kídíem agí-agíke míngkorsupe lulen polen sudung.

⁴ E Israel ami kídí, byakruknam doolunglo emmumpe yégona ménsurung kísape noluke kaaluna miri kídíde idung.

⁵ Bulu líísak etor bénna kídíem isi-simokupe míímang, delokke kaabommang. Depeila Ruutum ke longelo, edílo midu-mimage pííbomyédí, delo Israelme mopítna kamayé.

⁶ Buluke kaarí-kaanyo kaanamde yatne, delokke agom kídídete menam mílíe. Bulu ngokke agomem podung emdung, idola dekede ngokke políknam agommang. Depe ilate buluke agom-aang kídíde arolíkyé emla míípol sudung.

⁷ Ngo bulum agom lurík sumalate, ngokke agome emla bulu ludung. Buluke kaarí-kaanyo kaanam kídí delang agom kídíde mename, emla ngo bulum lutídung.

⁸ “Depeila buluke teyolo Ruutum Shédí bí sipe podung: Noluke agom-aang kídí delang kaarí-kaanyo kaanam kídíde mename, depeila ngo noluke mirupe ilendung.

⁹ Sikepe amieme míímem tatmemdope imona mena kaarí-kaanyo, delokke yatna agom lugona kaalu miri noluke teyolo ngo ajéng idak. Israel ami kídíke kebang lupomlo nolu duumín geyimayé. Israel amike amín atlík suko kitablo, noluke amíne dagyimayé. Nolu agí among sulo edílokom aalat sukumayé. Dekepe irodem ngomino Ruutum Shédí bí emla nolu kényéku.

¹⁰ “Asi-among ségue loorímalate, ‘Aapíe eetet langka! Ato takame aidung,’ emla de kaalu miri kídíde ngokke ami kídíem yatdung. Edílo líísak etorem ipu-simunamko kayédí, delo de kaalu miri kídíde aala suun molkaplíkdung,

¹¹ depeila, dekena kaalu miri kídídem, líísak etorde menape bénla oletyé emla polangka. Botterupe pedonge oyé, delokke ngo tapíem gemola, gumnamem gummola, líísak etor teyodelo imoyé.

¹² Edílo líísak etorde oletyédí delo mipil miyoope nolume, ‘Sim molkapnana suunde ingkoloda?’ emla lupu-luléyéku.”

¹³ Supak Ruutum Shédí bí sipe podung: “Ngokke markolok gumnam asarem, pedongem, delokke tapíem melíkla, dem líísak etordem bénpakyé.

¹⁴ Ngo suun molkapnam líísak etordem amolo neyisudope bénmíkla etor delokke torkengem mílípe imoyé. Edílo etorde oletyédí, delo nolum takam oka kayinyé. Delo ngomino Ruutum bí emla nolu kényéku.

¹⁵ “Líísak etor delang suun molkapnam kídíde ngokke yagorupe marnamem paayé. Delo ngo nolum poyéku, ‘Líísak etore kaimang, delokke etordem suunlok molkapna kídídete kaimang.

¹⁶ De kaaluna miri kídíde, asi-among ségue loorímalate, aapíe eetet dengompe yédope kaarí-kaanyoem Jirusalem kepe kaabina kídíde nyokyinkaku. Sikepe Ruutum Shédí ngo lulendung.’ ”

Kaaluna Mime Miri Kídí Teyolo Luname

¹⁷ Ruutum ke agome ngokkíng pííto: “Tanike ue, supak nokke ami kídí aralo kaalu-polu goona mime kídíem aipe kangkítola. Bulume lupak langka.

¹⁸ Delokke buluke teyolo Ruutum Shédíke agom lunamem lubilangka: Mime kídar nolu ankang aloosuyéku. Nolu mipil miyong amie lakkitlo gedope moya-montrong lakjinem ombidung, delokke moya-montrong ege gasorem dumponglo tunggedope sumbidung. Dekedem amikon teyolo ralnam kayadope emla ibidung. Ngok ami kídí teyolo, buluke sipenam emlang turpenam ralnamem bomdola noluke agíke paapek legape dekedem inadope emla idung.

¹⁹ Nolu ettíng bornyi-borum legapelang leko lennyi alaglok umbom sunam ayag legape, ngokke ami kídí keralo ngome mínggemato. Mokapemanam amiem nolu mokala, mokapenam amiem mokamape ila, ngok ami kídí keralo nolu menam-yatnam mílípe lutígoola, ami kídíem aroe emla tatmem sumola itímodung.

²⁰ “Dekepeila Ruutum Shédí bí nolum sipe ludung: Pettangem petíllo tumnam kísape, ami kídí teyolo noluke moya-montrong ato-siro igoonam kídídem ngo kangkidung. Dekedem ngo noluke alag kídí delok rotbínla nyokyinmoyé. Petíllo pettang tumnam kísa noluke tumla menam ami kídíem ngo kogyabiyé.

²¹ Ngo gasor kídíem bétpakbila, lakjin kídíem kínpakbila, noluke ralnam aralo yéyimadope ami kídíem ipítyéku. Delo nolu, Ruutum bí ngo emla kényinyé.

²² Ngokke itung-irélímanam, deena ami kídíem noluke menamlok aapí-aangem amémodung. Atímana yénamlo yéyimape agí yénamem ipít sudokupe, atímana ami kídíke aapí míílat sukupeko bedangem nolu itumdung.

²³ Noluke yatna kaarí-kaanyo kaanam kídí delang agom kídíde supak kaimayé. Ruutum bí ngo emla nolu kéndope ngok ami kídíem noluke ralnam aralok ipítyéku.”