EJEKIEL 12 - DEENA BAIBÉL (BSI)

Kaaluna Mirike Mibo-minnompe Iname

¹ Ruutum ke agome ngokkíng pííto:

² “Tanike ue, no mirolpe rolna ami aralo duudung. Bulu kaanana amigem gelateng kaapamang, delokke tatnana nyorungem gelateng tatpamang. Kapeila bulu mirolpe rolna amieke.

³ “Depeila E tanike ue, no mibo-minnompe yédope nok ekurangem leemo langka. Longe panglo, buluke kaadungem, nokke dungko delok gílenla angukonlo gílen langka. Depe imílo, bulu mirol amipe idulate buluke séguem kangkén sulate iyépe.

⁴ Longe angunlo buluke kaadungeme, mibo-minnompe yédope nokke leemonam ekurangem bomlen langka. Delo yumelo buluke kaadungeme, mibo-minnompe gína ami kísape gílen langka.

⁵ Buluke kaadungeme, no líísak etor delo arungko roola, delok nokke ekuserangeme bomlenla ilangka.

⁶ Adeng moodílo, buluke kaadungem, nokke gordulo, ekuserang kídíem joola gílenlangka. Nokke depe gíduem no migmoem ikapsula gípeko amongem kaapa sumadope gílangka, kapeila Israel ami kídí teyolo, nome ngo iyodkope imotung.”

⁷ Dekepe, ngom lulígnampakpe ngo ito. Delo longe delo, mibo-minnom amie inam kísa ngo ekuserang kídíem ikumla, tídla ito. Delo adengdan delo, líísak etor delo ngo agí alaglok arungko rooto. Depe ipala adeng arodelo buluke kaadungem, ekurang kídíem ngo gordulo joobomla gílento.

⁸ Rookon delo Ruutum ke agome ngokkíng pííto.

⁹ “Tanike ue, mirolpe ina Israel ami kídíe, ‘No ingkokoda idun?’ emla íngkína kadonía?

¹⁰ Bulum sipe polangka, ‘Shédíbí sipe podung: Si iyodnam ngiitom agom si Jirusalem ke rojake legapelang luune delo duuna ami kídí takam legape idung.

¹¹ Bulum sipe potem langka: Ngokke itonam si, yékupenam longe kídí telo Israel kídíke abílpelang mibo-minnompe yékupenam iyode.

¹² Líísak etorlo arung roobinamlok, buluke rojade agíke ekuserangem leemola adenglo arung delok gínyoklenyé. Bí agíke mikmoem ikomsula agíke gípekoemte kaasumape gíyé.

¹³ Idola ngokke esabem kuulíkla bíme umyé. Delo bíme ngo Saldian among lokke luune Babilonpe gíboyé. Idola dem bí kaamape deloi nyoklíkyé.

¹⁴ Bíkke kebang miro takamem, luyilna takamem, bíkke maglíng ruutum tabungem sanggo-anggo, línggíng-sokkope pitpan-pitran sulíkyé, delokke ami kídíe, bulum takam petyindope monta goobomyé.’

¹⁵ “Edílo ngo bulum mibo miying among rego takamlo monpan-monran sulíkla, pitpan sugolíkyédí, delo Ruutum bí ngo emla kényéku.

¹⁶ Idola ngo buluke ayokonem, midu-mimaklok, kilii-ramlilok, delokke dírí-kenolok siyin momape turmoyé. Delo dekepe turmonam kídíde, buluke yégongko mibo ami kídí aralo, buluke kerangke belumrupe agér itonam kídíem kényin sulangkula, Ruutum bí ngo emla arope míngke suyéku.”

Ejekielke Danla Iyodname

¹⁷ Ruutum ke agome ngokkíng pííto:

¹⁸ “Tanie ue, nokke donam doyém danlangka, delokke nokke asi tííyém pesola mamam sugelangka.

¹⁹ Among yéta takam ami kídíem sipe polangka: ‘Israel among lolang Jirusalemlo dungkína kídíeme Shédí bí sipe ludung: Buluke donam doyém danla doyé, delokke pesolok mamamsula asiem tííyé. Kapeila buluke asi amongdem ato-siro atí kaimadupe líkut moyé, legade delo duuna ami kídíde kelíng-kebang agomem tatbo suyimape atírumape yébosukai.

²⁰ Milung-mibampe dungko luune kídíem nyokyin moyéku, moonam kana asi-amongdem moorukpe batmoyéku. Dekepe iyékuem mino Ruutum bí ngo emla nolu kénsuyéne.’ ”

Ngiitom Gompí Legangko

²¹ Ruutum ke agome ngokkíng pííto:

²² “Tanike ue, Israel ami kídí aralo, ‘Longe gíyar tetedung, idola kaarí-kaanyo kaanam kídíde atelkote ipíng kímang,’ emla lubosunam ngiitom gompíng si ingkueda?

²³ Ruutum Shédíbí sipe podung, emla lubi langka: Dem ngiitom gompíng dem ngo kamoyimayé. Deme Israel aralo lekoda lubo suyimayé. Delok ayanpe dekepe kaarí-kaanyo kaanam kídí delokke atelkote mepitmape, takame apíídí longe píídak.

²⁴ “Kapeila Israelke ami kídí aralo yatna kaarí-kaanyoelang yémem mopena kaalu-kangor agome kaimayé.

²⁵ Idola Ruutum ngokke pope-lupenamem luyé, delokke dekede adolmape menape apííyé. E mirol kídí, noluke turla yédo araso, ngo ingkuem lutortodí ngo dem apíídope imoyé. Ruutum Shédí ngo sipe polendung.”

²⁶ Ruutum ke agome ngokkíng pííto.

²⁷ “Tanike ue, Israel ami kídíe sipe lubo sudung: ‘Kaarí-kaanyo kídíelang kaalu-kangor agom kídíde apíílíkpe deddína dítakko kadungada.’

²⁸ Idola bulum sipe polangka: Ngokke agom lunam kídíde menape apííyé, delokke adolmayé. Ruutum Shédí ngo sipe polendung.”