EJEKIEL 1 - DEENA BAIBÉL (BSI)

EJEKIELKE KERAYALUMPE SHÉDÍME KAARÍ-KAANYOLO KAANAME ( 1:1—7:27 ) Shédíke Palenge

¹ Takying angum lokke poolo appinana delokke longonana longe delo, ngo miri Ejekiel, Bujike oo, Babilon amonglo Kebar korong abelo monnyoknam Jihudi kídílo lekope duuduai. Talenge siyyala ngo Shédíke kaarí-kaanyoko kaato.

² (De roja Jehoiashin me umnyok bomdo dugrík pilngo naníai.)

³ Babilon lokke Kebar korong robedelo, ngo Ruutum me ngom lupo sudope tatto, delokke ngo Ruutum ke ralnamem anpaasuto.

⁴ Ngo kaadusula, línggíngdan telok gumnamko gumtokdope kaato. Ruaage yagorupe iyamna doomug kolok yaarie gardo, delokke delok ampeng delok talenge angun rudo. Yaari garko delo pitol kísape angune ngundo.

⁵ Gumnam delokke raadang delo ngo tani moi-muang kísape kaanam Sérubim appiko kaato.

⁶ Idola bulu takame migmo appi pelang alap appipe kayindo.

⁷ Buluke ale kídíe jondola, rubo lokke kísa lepuk gedo. Pitol asirna kísape ido.

⁸ Migmo appi pelang alap appipe kako teyo delo, bulukíng tani alag appipe, alap rumkínglo atelko dada ila kado.

⁹ Lamkue bulu gerík terela alap laptínge itet mínsula bulu dagdo. Bulu ingko peteng amílem pelgo sumape lekope gíyam bosudo.

¹⁰ Takam Sérubimde kerangdanlo tani mikmoko, lakbík danlo simyo mikmoko, lakkédanlo rubo mikmoko, delokke méélamdanlo míya mikmoko gedo.

¹¹ Sérubim takam delok alap lapnyie laptardola ampeng elen annyike alap kídíem itetmínsudo. Lapnyikonde agíke amíl elensulo píílík sudo.

¹² Mipil Sérubimde rego appi emkai gekang suyindo, dekepe ikolok de alungde amílem pelgosumape buluke gípe míngkolok lekope gíbo sulado.

¹³ Sérubim aradelo írna meruko, buluke aradelo gídung-gítok sunako kado. Emede yagorupe íírla yaari garlen modo.

¹⁴ Sérubim kídí deteng yaari garkor kísa belenge menangdo.

¹⁵ Ngokke dem Sérubim appidem kaadungem, ngo kelong appiko, akone akonke ampenglo ila amongem itetdope kaato.

¹⁶ Kelong appi dekai akamdo, kelong miyoode are kanarung elíng kísape asirdo, delokke kelong miyoode kelong konke raadanglo kala,

¹⁷ kelongde ingko peteng pelgo sumape longgo ladope ido.

¹⁸ Kelong kídí delokke kekel kídíde amig mílí kado.

¹⁹ Sérubim kídí delokke belengyém, kelong kídíde beleng míndo, delokke Sérubim kídíde amonglok yoprepyém, kelong kídí deteng yoprep míndo.

²⁰ Sérubim kídíde buluke gípe míngkolo gído, dekepakpe kelong kídí dete imín gedo, kapeila Sérubim kídíde kelong kídídem buluke míngkorlok bomdo.

²¹ Dekepe ila, Sérubim kídí delokke gíla, dakla demangke yoprepla iko miyoolo, buluke ikampe kelong kídí dete imín gedo.

²² Sérubim kídí delokke tukku teyong kídí delo asirna tapamlok píríldope míílong pínam kísa inako ngo kaato.

²³ Píríldope míílong pínam kísana rumkíng delo Sérubim kídíde alap annyiem akone akondanpe laptar líkdola, delokke lapnyi konlok agíke amíl kídarem pokapsula dagdo.

²⁴ Ngo buluke yopdungem, buluke alap kídílok adudem tatto; de siyéng asi muudud kísa, maglíng bottena ngomdud kísa, delokke Ralya yalumna Shédíke gomuk kísa ido. Buluke yopyimayém alabem bulu lapsumdoku.

²⁵ Idola buluke dumpong kídí teyong delokke píríldope pínam míílong kísana delok adudko mandu dadape ngo tatto.

²⁶ Míílong pírílna kísana teyong delo yasanna sapphir elíng lok paleng kísape pínam atoko kado, delokke delo duunade tani kísape kaanamko.

²⁷ Tani kísape kaanamde eme raadanglo bangírla írnarung pitol kísa asirdo. De rego takamlo angun runge ila,

²⁸ muré kísa moríe ido. De Ruutum ke duumín genamem lengkanna asir runa anguníai.