DANIEL 8 - DEENA BAIBÉL (BSI)

Danielke Mérbo Kolang Sobénko Kaarí-kaanyope Kaaname

¹ Belshajjarke dítak angumnape roja iduem, ngo lennyinape kaarí-kaanyoko kaatoku.

² Kaarí-kaanyo delo, ngo Elam among lokke líísak etor torgoonam Susa luune bottena delo menang asak yédope kaasuto. Ngo Ulai Korong robenglo dagdo.

³ Delokke robeng delo akonde akondem bodooyala, delokke aníyala ina reebung annyi gena mérboko ngo kaato.

⁴ Mérbo dem bíkke reebung annyi delok anggodanpe, línggíng danpe, delokke sokko danpe tupgo sudope ngo kaato. íngkona simon ete bíme itum lamato, demangkom bíkke tolnam-ralnam lokke mopít sulamato. Bí bíkke míínampe ido, delokke adum sole yayang ikai.

⁵ De kape inamedí emla ngokke míngkén kíramla mííbom dungem, bénboko anggodanlok, yagorupe dukdukla ale amonglo tuda suyimape ila dugaato. Bíkke amig annyi pénsam delo kangor runam reebungko gedo.

⁶ Ngokke robenglo dagdope kaanam mérbo danpe bí aala, bíkke tolnam takamlok bíkkelo tuplíkto.

⁷ Ngo bíme mérbo dem tubbom dope kaato. Bí yagorupe markane, bím tuppak-tupyakla reebung annyidem tuptírto. Mérbode iyan sunana ralnam atí kamado. Bíme among delo tupletla, tujém-tuyémto, delokke bím mopítpena atel kote delo kamato.

⁸ Delo bénbode yagoyape adum sole yayang ito, idokom bíkke raltík aloodo delo bíkke reebungde dírpakkai. Delok adumpe kangor runa reebung appiko sangkai; reebung kídíde rego appi danpe íkkai.

⁹ Reebung appi lokke akonlok améngna arengko lenla, bíkke ralname sokko danpe, sanggo danpe, delokke Pébisunam Among loope pííto.

¹⁰ De teyong among maglíng kídíem, takar kídíemte ikí suladope tolkane, takar kídí ayokon emkom amoso eltokla, dekedem alelok tujémto.

¹¹ De teyong among lok maglíngke Roja oo kísape agíem isula loodípe bím aman binam kídídem itumto, delokke Kumkeng Ekum dem deemang dope ito.

¹² De agíke aimang kolok ami kídíke loodípe aman binam kídíem bibaape bimomape, bíkkíng langaasuyinto, delokke aro dormo yédongem amonglo gepakto. Arengde bíkke agér iko takamlo apííto.

¹³ Delo ngo teyong kotoki kone deena akonem íngkídope tatto, “Edí loopeda kaarí-kaanyo so kaanam atí kídí si iyéne? Edí loopeda atírumana paab si loodípe aman bipenamem bimomape iyan yéne? Edí loopeda teyong among maglíngem, delokke Kumkeng Ekum sim tujém moyéne?”

¹⁴ Ngo teyong kotoki kondem poyan sudope tatto, “Si 1,150 longe kope ila, so longe kídí so rokom, delokke yume aman kídíem bimayé. Delok rongem Kumkeng Ekumdem deebín langkula aipe agérem gérkeyéku.”

Teyong Kotoki Gabrielke Kaarí-kaanyo Kaanamdem Lubiname

¹⁵ Ngo kaarí-kaanyonam delok legangem kéndomíl emla míngkí bomdungem ngok keralo amiko menang asakpe dagaato.

¹⁶ Ngo Ulai korong delok agomko goglen dope tatto, “Gabriel, no bíkke kaanam delokke gomroem, kéndope bíme pobilangka.”

¹⁷ Gabriel aala ngokke ampelo dagaato, delo ngo yagorupe pesola among delo oletto. Bí ngom poto, “E tanike oo, gomro sim tatkén langka. Kaarí-kaanyonamde tani amongke nyokku pename.”

¹⁸ Bíkke podungem, ngo kénsuyimape amonglo mikmoe ila ipgeto. Igeyéla bí ngom gagrepla, ngokke alelo ngome daksu molangkula,

¹⁹ bí poto, “Shédíke mardíku longe angkupenalo kape imoyédí dem ngo nome lukandung. Kaarí-kaanyode yéyindí moodíem lengkandung.

²⁰ “Reebung annyi gena mérbode Medes elang Parsialok roja among yéta kídíem lengkanname.

²¹ Sobénde Grik rojake among yéta kaapenamem lengkandung, delokke amig annyi pénsamlo kangor runa reebung genade kerayalum rojae.

²² Kerangke reebungde dírtung rongem, delo reebung appiko lenkuna delok legade idung: among deme ipansula among yéta appi kope iyé, de among yéta kídíde kerangke delok ralnam kísape ralmayé.

²³ “Edílo dekena roja among yéta kídí delokke yéyin longe píínín yéne, delokke mirol kídí bulu atírumana amipe irep yékudí delokke bulum ingééru penampe iyédí, delo miképruna, atímana agér ina, rungkup-rulatla yadna rojako gerepyé.

²⁴ Bí edííruna kope darepyé, idokom de bíkke agí tolnamlok imayé. Bí pesorupe nyoknamem bomayé, delokke bíkke inam takamlo bí apííyé. Bí tolnarung ami kídí emlang Shédíke agí deena amisu kídí teyolo itung-iréla nyoknamem bomayé.

²⁵ Bíkke yatkupnana ségu kanam kídíde unnotiyé. Deke delok bí agíem kímte-remte alope míísuyé. Ami kídíke jéla remla iyéme bí deddínem nyokpakmoyé. Bí takamem pemílo botteyalumna roja kídíke Roja emteng mirolpe rolyé, idola bíme tani tolnamlok imape, nyokmoyé.

²⁶ Nome kéndope lengkanla pobitonam yume rohpe aman bipenam kídí kaarí-kaanyo si arope iyé. Idokom sime supak siilpe tupkap polangka, kapeila si atí kídí si deddína longe angkupena telomin arope iyékune.”

²⁷ Daniel ngo deddína longekope míídírla, delokke kila duuto. Delok méélamlo ngo gerepla, ngome rojake parlíknam agér delo gílat sutoku, idola kaarí-kaanyonamde ngome mínga sumoto, delokke dem ngo kénlamato.