DANIEL 3 - DEENA BAIBÉL (BSI)

Nebukadnejjarke Uun Mimangem Kumsudope Takam Amiem Poname

¹ Roja Nebukadnejjar bí uunlok pínam mimangko, kedone íying annyi kolang kíníd mitarko, delokke bortage mitar angum píítanako kato. Deme bí Babilon among lokke Dura yiibe delo leerepto.

² Dekepe irongem rojade, roja oo kídíem, gobonor kídíem, nínmín gena gobonor kídíem, komisonar kídíem, kumsung ruutum kídíem, kebang ruutum kídíem, bisar ina kídíem, delokke among tabunglok migom abíd kídíem ukum bila gogdumsuto. Bulum takamem roja Nebukadnejjarke mimangem kumlík kolo aadope gogyinto.

³ Edílo takam migom kídíde kumlíknam legape gídumsula, mimang kerang delo daktodí,

⁴ agom poyanakone gogtoola pokai, “Moole takamlok, opín tabung lok, delokke agom gomuk atí-atína takam lok ami kídía!

⁵ Nolu bikul tapung mutnamem tatyé, delokrongem areng tapung, layar tapung, jiter tapung kídí, delo harp tapung kídíe manyé; delo abíd takam tapung kídíe manmín geyé. Tapung kídíe manlen pakyém, delo nolu roja Nebukadnejjarke leerepnam uun mimang keralo gubdola kumsupe aido.

⁶ Séko amiedí gubdola kumsumayéne, bíme menarupe írna medíng meyolo yoblíkyé.”

⁷ Dekepeila, edílo tapung kídílok adudem bulu tattodí, delo moole takamlok, opín tabung lok, delokke agom gomuk atí-atína takam lok ami kídí tabunge, roja Nebukadnejjarke leerepnam uun mimang keradelo gupdola kumsuto.

Danielke Angong Angumem Ayon Betne emla Tolíkname

⁸ Dekepe ido delo Babilon amieke, Jihudi amiem luyotpeko pongkokko paato.

⁹ Bulu roja Nebukadnejjar me poto, “Roja no duuyar daklangka!

¹⁰ Roja no ukumko, edílo tapung adude manlen yédí, delo takam amie uun mimang dem gupdola kumsupe aido,

¹¹ delokke séko amiedí gubdola kumsumayéne, bíme eme írna medíng-meyolo yoplíkyé, emla bilento.

¹² Jihudi ami kídíe, séko bulumdí no Babilon amongem ruutum bomdope binam Shadrak, Meshak, delokke Abednego bulu roja nokke ukumem tatmang. Bulu nokke uyuem kumsumang, delokke nok leerepnam mimang keralote gubamang.”

¹³ Dem tatyénam, rojake marname pinnyolo pííla, delokke legape midum angumdem bík keralo bomadope ukum líkto.

¹⁴ Bí bulume poto, “Shadrak, Meshak, delokke Abednego, nolu ngok uyuem kumsumayé emla topaksula, delokke ngok leerepnam uun mimang keralo gubamang emnam si aroeya?

¹⁵ Demílo supak, bikul tapung kídíke, areng tapung, layar tapung, jiter tapung, harp tapung, delokke abíd tapung kídíe manlen pakyém, gubdola mimang dem kumsu langka. Dekepe imayé mílo, nolum menape medíng írnalo yoplíkyé. Nolum mopítpena angu uyuko kadung, emla nolu míídunía?”

¹⁶ Shadrak, Meshak, delokke Abednego bulu poyansuto, “E Roja, ngolu agíem mosisupe emla ikímayé.

¹⁷ Ngoluke agér gérbinam Shédí bí iladumílo, ngolume eme dorna medíng meyo soklang nokke pauar lok ngolume mopítyé.

¹⁸ Idola bí dekepe mopít madakkom, ngolu nokke uyuem kumsumayé, delokke nokke leerepnam uun mimangdem gubdola kumsumayé emla roja no berok langka.”

Danielke Angong Angumdem Peddope Ukum Biname

¹⁹ Delo Nebukadnejjar bí tumna kísa ila, Shadrak, Meshak, delokke Abednego bulume marbomla, marnam lok bíkke mikmoe lííto. Dekepeila bí bíkke ami kídíem dorya sunam empemíl lemkínídko doryadope medíng dem eme parlík moto.

²⁰ Delok méélamlo ami angumdem yéépala, eme írna medíng delo joola yoblík dope, bíkke sipaying maglíng lokke tolya yalumna amiem ukum bito.

²¹ Delo midum angum dem galugem, lukdorem, dumelem, delokke atí gepenam takamem gemo pala, yééla eme írna medíng delo yoplíkto.

²² Rojade eme dem bojérupe írmo dope lugap líknam legape, ami angum dem medínglo joolíkna ami kídídem eme pamkie gukato.

²³ Delo Shadrak, Meshak, delokke Abednego, lekope yéédum sunampe, eme írna medíng raadang delo olíkto.

²⁴ Menang asak Nebukadnejjar míngkén-míngo yimape dagrepto. Bí bíkke ruutum kídíem íngkíto, “Ngolu ami angumko yéépala, medíng elo ellík manía?” Bulu poyansuto, “E roja, ngolu dekepe ito.”

²⁵ “Demílo ngo kapeila ami appiko eme aralo gídupe kaadune?” emla bí ííto. “Bulume yéémang, delokke bulu adír paana kísape imang, delokke appinana ami esi teyong kotoki kísape kaanamko.”

Ami Angumdem Melen Palangkula Kedonyana Agérlo Melíkkuname

²⁶ Dekepeila Nebukadnejjar eme dorna medíng lamgé delo gídola, bulume gogto, “Shadrak! Meshak! Abednego! Takamem botteyana Shédíke béérang kídía! Lenlangkuka!” Delo bulu menarupe lentoku.

²⁷ Takam roja oo kídíe, gobonor kídíe, nínmín gena gobonor kídíe, delokke roja lokke abíd ruutum kídíe, eme lok gumanam midum angumdem kangkape gídum suto. Buluke dumíd mídyong kokom gumang, buluke ege-galuk emteng gumang, delokke mekang arí kokom bulu kelok nammang.

²⁸ Rojade pokai, “Shadrak, Meshak, delokke Abednego buluke Shédíme yidlangka! Bí bíkke teyong kotokiem melíkla, bím agér gérbila bíkkíng míídasuna sim ami kídí sim, sipeko lokke mopíttung. Bulu ngokke lulígnamem tatmape ipala, abíd uyu keralo gubla kumsumape, buluke Shédí petomme kumsupe, buluke turnamem bisunamem aiyape mííto.

²⁹ “Delokke supak ngo lulígdung, among tabusok, opín tabunglok, delokke agom gomuk atí-atína takam lokke, séko amiedí Shadrak, Meshak, delokke Abednego buluke Shédíme mínggemape agom luyédí, dem ami dem ale-alagem patung-payuyé, delokke bík ekum emkom bénrom moyé. Sikepe sipeko lokke mopítlana angu abíd uyu kamayé.”

³⁰ Delo rojade Shadrak, Meshak, delokke Abednego bulume Babilon among lokke kedonyana agérem bitem líktoku.