DANIEL 10 - DEENA BAIBÉL (BSI)

Tigris Koronglo Danielke Kaarí-kaanyo Kaaname

¹ Parsia lok roja Sairaske tagumnape roja dodoem Belteshajjar emlate mínnam Daniel kíng agomko lengkanto. Agomde aroto, idola tatkén-míngkén kíram runamko. Deme kaarí-kaanyo kaanam kaalu immang kolo bíme pobito.

² Delo moodí delo, Daniel ngo hopta angum kope míídírla duuduai.

³ Ngo hopta angumde gíyinmang tetedelo, ngamna donam atí domang, delokke adín atí domang, atí apong tíímang, delokke amílso tél tulang atí ilíksumato.

⁴ Delok dítak delokke poolo gílen lokke looying annyi kolang loopi nana longe delo, ngo Tigris korong roone abe delo dakto.

⁵ Ngo kaadu sula kaatoname ami konem yasiruupe nunam egeko gela, delokke Uphaj among lokke uunlok pínam uugko ugílo gedope kaato.

⁶ Bíkke amílde beril elíng kísa pundo. Bík mikmode yaari latnam kísape ido, delokke bík amig annyide eme dorna kísape ido. Bík alag annyi delang ale annyide pitol nyotpunnam kísape ido, delokke bík adude bottena mití-maglíng lok ngomdut kísape ido.

⁷ Ngo petom kaarí-kaanyo dem kaasuto. Ngokkíng yébosuna ami kídíde atírung kaapamato, idola bulu yagorupe pesola, dukla runyok geto.

⁸ Ngo atel delo, míngkén manam kaarí-kaanyo dem kaadola yéto. Ngokke amíllo tolnam kayikumang ito, delokke ngome sékoteng kangkén layimadope ngokke mikmoe angu berokto.

⁹ Edílo ngo bíkke adudem tattodí, delo ngo atí kénsu yimape ila amonglo oletla, yubkupla ketto.

¹⁰ Delo alagko ngome gagla, ngome ngokke alag kídí loklang lebíng kídílok daksudope horepto; ngo deloteng dando dada.

¹¹ Teyong kotoki de ngom pokai, “Daniel, Shédí bí nome ayadung. Darep langka, delokke ngokke lupenam sim airupe tatgap langka. Nok legape mino ngom melíktune.” Bíkke sim porodem, ngo dandola dagrepto.

¹² Delo bí pokai, “Daniel, pesomapeka. Kénjinamem paape emla no agíem dengompe míírep sudo kerang longe delokkai nokke kumnam kídíem Shédí bí tatbito.

¹³ Parsia lok roja oode ngom looying annyi kolang longeko akpé sula itumto. Delo botte yalumna teyong kotoki akon Maikel bí ngome igulpe aato, kapeila Parsia amonglo ngo atel petom ito.

¹⁴ Aapena longe kídí telo nokke ami kídí teyolo kape kísa iyédí dem pobikape emla ngo aadung. Si kaarí-kaanyo si aapena longe kídí legange.”

¹⁵ Edílo bí sim potodí, ngo among danpe tukkue ila agom pokén yimato.

¹⁶ Delo ami kísape kaanam teyong kotokide, bík alage ngok nabbél annyiem uktetto delo ngo agom polatoku. Ngo bíme poto, “E ngok ruutum, si kaarí-kaanyo si ngome ralnam kamoyimala, ngok dannamem ngo itumsula yimang.

¹⁷ Ngo agí ruutum keralo kapekísa nome ngo lupo sulayén? Ngok amíllo atí tolnam demangkom nganam kayikumang, E ruutum!”

¹⁸ Lekoda tani kísape kaanam amide ngome gagbom toku, delo ngo tolyanape ansuto.

¹⁹ Bí pokai, “Shédí bí nome ayang aloodung, delok legape ingko atí emkom no míídír mapeka demangkom peso mapeka.” Edílo bí sim potodí, ngo bojéyape toldope ansuto, delo ngo poto, “E ruutum, no ingkoko lupe míídudí deme polangka. No ngome gepo yadokupe itoku.”

^20-21 Bí poto, “Ngo ingko legape nokkíng aatone dem no kéndunía? Aro lokke Kitablo atnamem nome berok bipe emlamin aatone. Supak ngo menape enlat sukupe aiyé, delokke Parsiake roja oodem momín suyéku. Ngok gírongku méélamlo Grik lokke roja oode pííyé. Idokom kerayalumpe Aro Kitaplo atnamem ngo poyilpoyé. Noluke roja oo Maikelke kékonlo ngome sékote igulkape emla píímang.”