BEROK BINAM 4 - DEENA BAIBÉL (BSI)

Teyong Among Palenge

¹ Sok méélampe ngo kaato sutoname ngokke keralo teyong among eyabe siyyala duudo. Delokke ngokke kerape tattonam agome bikul tapung kísape ngom sikepe podo, “So aaníntola, delo ngo sokke méélampe lenpena atíem nom ngo lengkanyé.”

² Letellok ngo Aidlo duuto, delokke ngokke keradelo amiko teyong among paleng delo duudo.

³ Delokke delo duunade kaaname yalí yagéna delokke yaorna elíng kampona kísape ido. Murééko yaying yaornako paleng dem goobomdo.

⁴ Palengdem íying annyi kolang appi umkéko dunggoodo delokke delo íying annyi kolang appiko miro eke duudo. Bulu yalunna egelok delokke buluke dumpolo uun dumlubeke gedo.

⁵ Paleng delok yaari elang gumname lenkai. Paleng keradelo, meru kínítko eme dordo. Sikesimin Shédíke aid kíníde.

⁶ Delokke kékon lokom paleng keradelo kaaname siyénglok arsi kísa deename ido. Paleng luyudelo delokke umkéé aníndelo turna atí eke appiko kado, delokke buluke kerang danlolang méélam danlo amig sényingeke kado.

⁷ Kerangke turna atíde myomur kísanako, annyi napenade rubo kísa ido, angum napenade ami mingmo kísa ido, appi napenade pemí yobna kísanako.

⁸ Turna atí appi dekai mipile alap akképe geneke delokke amig mílíe labbíng rumkíng daadiloope kaneke. Longe yohpe bulu sim luyémdí kayimape ludo: “Deena, deena, deena Tolya yalumna Ruutum Shédí bí yéto, delokke dung delokke angkupene.”

⁹ Edílo turna ato kídíde palenglo duunadem delokke yénam takamlo duuyarna dem erkígela, mínggela delokke koyit dudí,

¹⁰ de palenglo duuna delo miro íying annyi kolang appide bíkke keralo gubadola duuyarna bím kumsudo. Bulu buluke dumlubem paleng keradelo lupsudola sikepe podo:

¹¹ “No mínggename, ngoluke Ruutume delokke Shédíe, erkínamem delokke míngge namem delokke pauarem paabane, kapeila no takam atíem pílento, delokke nokke míísalok takamem pílento delokke nokkelok bulu turnamem paadung.”