ANKÍ MIRI 1 - DEENA BAIBÉL (BSI)

Jirusalemke Ankí-Kenoe

¹ Kerape ami mílí bííbomko doolung luune kone atí kaimape arukpe agí atele isukai. Opín-buang tabung keralo rani kope inakone, supak mime meyéng kope ikai. Among takamke erkíbomnam ranikone, supak abíl kísape ikai.

² Yoh ruubuungem bí kaptísula, bíkke mopum annyílok miksie bíttokdung. Bíkke mííbosunam aralo, sékote bím ngiina kamang, bík angong-arum kídí takame bím yatla, bíkke mirupe iyinkai.

³ Deddína itung-iré emlang ankíem paala, Judah bí mibo-minnompe, miying amonglo gíato. Bí mibo ami pénsamlo duula, apéé peko paamangkai. Ankí-keno pénsamlo bím monbomna kídíe, bík teyolo ruutum bomkai.

⁴ Adeng-ape dodí-tíídílo sékote aabimala, Jayonke bedang kídí tabunge kapdung. Bíkke yapgo kídí tabunge, arukpe rukyindo. Bíkke miri kídíe adírlok ulo gogla, mimum kídíe kaptí-ríítíla, bí yagorupe adír aloodung.

⁵ Bíkke miru kídíe ashéng-angamrupe, bíkke teyolo, bíkke ruutumpe yébomkai. Kapeila bíkke paab bojénam legape, Ruutum bí bíme sikepe adír moto, bík ome-oo kídíe miru alaglo, abílpe umko sula mibo minnompe gíkai.

⁶ Jayonke ome kídí keralok, angun-abé takame nyokkai, bíkke roja oo kídíe dope-tíípenam paamana sisuk kísape ikai. Depeila aapí-aang edíngmalok, bulu miru keralok dugnyok gekai.

⁷ Jirusalem bí ankí-kenola magongdo longelo, bíkke kerangke miremdo longem míípasula itíkai. Edílo bíkke ami kídíe miru alaglo aayin kadí, sékote bím igulna katomang. Bíkke nyoknamem, bíkke miru kídíe kaala ngilkala ikai.

⁸ Jirusalem bí yagorupe paab ila bí deemang kai. Bíkke aré-anyoem kaala, bím gai-gakongpe míína tabunge, supak bíme kaapak-míípak kaku. Bí agísuete kapla-rííla, migmoe angukonpe ikai.

⁹ Bík deemangde agí galuk delo gyablíkkai. Bíkke yékupenamem bí míírung sumato. Bí reyubrupe oletto, delokke sékote bím ngiilana kamato. Bí, “E Ruutum, ngok adírem kaabika, kapeila mirue ngom ikumto,” emla kaptíkai.

¹⁰ Bíkke, ekuserang tabunglo, miru kídíe alag ugangkai. Ruutum nokke aamapeka emla lutumko, deena runggu kumpomlo, mibo-miying amie aadope, Jirusalem bí kaasuto.

¹¹ Ami kídí tabunge, donam-tíínam legape, kapla-rííla matala, buluke turgape, buluke ekuserangem donampe, líkpé suyinkai. Jirusalem bí, “E Ruutum, ngo míípaknampe ikai. No ngome ayang kaapang sutola,” emla kaptí-ríítíkai.

¹² Bíkke ayirlo gína takam dem, bí, “Ngom kaasutola, ngok kísape, sékoda ankí-kenonako kadun? Ruutum bí marla ngok teyolo sikena, kina atíem ilíktung.

¹³ “Teyo telok bí ememe melíkla, ngok adín along kídí soope píídope ikai. Bí ngok aleme esap yéknampe, yékla ngom gílat modungku. Bí ngok longe takamem ankímola, byaknyonam doolungpe imotung.

¹⁴ “Bí ngokke paab takamem sapla, bík alaglok ngotdum sutung. Bí dekedem ngok alíng so tulígla, deke delokke tebege ngom ralnam kamoyimang. Ngokke iyan sulamanam mirulo, bí ngom rulíkto.

¹⁵ “Ngokke aralo duuna miram kídíem, Ruutum bí mepak geyéla, ngokke yaamé kídíem ikum-ilidope, bí miruem tomala imoto. Judah ke mimum mumsul kídíem, bíkke onggur ayé kétpomlo kétyin líkto.

¹⁶ “Sipe ilamino ngo yagorupe, miksi bítbomsula kapdune. Sékote ngome ngiina kamang, sékote ngome edíí-podíína kamang. Miru kídíe ikumla ikolok, ngokke ome-oo kídíe atí kaimang.

¹⁷ “Jayon bí alage yamtarla ilate, sékote bím ngiina kamang, kapeila Jakobke kumrí kídíe bíkke, mirupe idope Ruutum bí rulíkto. Buluke aralo Jirusalem bí deemana atokope ikai.

¹⁸ “Idola Shédí bí ibangkai, kapeila ngo bík ponamem tatmato. Rego mipílo duuna ami takame, ngok ponam sim tattola, ngok kila duudusim ngom kangkítola. Ngok doolung mimum-yaamé takam emkom abílpe umnyok bomkaku.

¹⁹ “Angong-arum lokteng ngo igul kokíto, idola bulu tatmangkai. Ruutum kídí delokke miri kídíe, agíem itursupe donam-tíínam matakolo, doolung-luune dapílo siyinkai.

²⁰ “E Ruutum, kaatola, ngok dug-ankí sim, delokke ngok aapí kinam sim. Ngok agí paab sulok, ngok aapíe barpan sukai. Bedalo paka-níkka bosula, ekum aralote siname kakai.

²¹ “Ngok kapnam sim tatbika, kapeila ngom ngiipeyana kamang. Ngok miru kídíe ngok teyolo, nok sikepe inam sim ashédung. Bulukom longeko ngok kísa idokupe, nokke lubisunam longe deme no langa dakyika.

²² “Ngokke paab legape, kape kísa no ngome itodí, dekepe buluke atímang emkom, nok keralo lengkan subila, bulumkom no longeko idakyika. Ngok aapísi yagorupe kila, bojérupe ngome ankí-sigíne bííbomkai.”