AMOS 8 - DEENA BAIBÉL (BSI)

Kaarí-kaanyolo Siipí-siiyé Aapéko Kaaname

¹ Ruutum Shédí kelok ngo angukon kaarí-kaanyoko kaatoku. Delo ngo siipí-siiyé aapéko kaato.

² Ruutum bí ííto, “Amos, no ingkoko kaadon?” “Siipí-siiyé aapéko,” emla ngo poyansuto. Ruutum bí ngome poto, “Yéyindíe ngok Israel ami teyonglo píngkai. Ngo bulume ingéépe míínam lokke aapíe lekoda míngkup-míílat sukumayé.

³ Delo longe delo roja ekum delokke miri-ponunge pengé kapnampe iyéku. Rego takamlo simange doojéyé. Bulume adud-ayud kaimang kolo elpakyé.”

Israelke Gérmange

⁴ Tattola sim, nolu kamana kídarem irééna kídía, delokke among sok opan kídarem inyokpe ina kídara.

⁵ Nolu agíem emsudung, “Edíloi aní pooloe gíyin yéne, ngolu ali-ayé sim kodobope? Delokke Sabbath longe edíloi iyin yéne, ngolu ali-ayé sim kodokupe? Delo ngolu areem bojéyape laala, yadna kínana em inala, delokke runanaem, ngolu kelok ekurang reana kídarem yaddope, loorímadope ilayé.

⁶ Ngolu are kamana gehuem are bottepe kolayé. Ngolu ajéngem dorlang kumana, leyuk pumsuo emteng relamana opan amiem paayé, delo ngolu bíme abílpe reyé.”

⁷ Ruutum Israelke Shédíbí pésudung, “Arorupe ngo buluke atímana agér kídíem míínyok sumayé.

⁸ Dekepeila amonge tonyé, delokke among delo duuna takame adír paayé. Among takam de tonla, Nayil koronge pungon pala omap kunam kísa iyinyé.

⁹ Ngokke, doonyiem longe raadalo olup mola, amongem longelo kaamo modí moodíe píídak. Ngo, Ruutum Shédí bí polen sudung.

¹⁰ Ngo noluke adeng-ape kídíem gííma-siimope imoyé, delokke ashéng miriem, adírlok kapnam-ríínampe imoyé. Ngo noluke dumpong kídíem ngíkud sudope, delokke ankí gasorem gedope imoyé, delo no oo atel petome singumla ankí-adírna ane-abu kísa iyé. De longe de iyin loorí loope kosang alooyé.

¹¹ “Among so ngokke dírí-kenoem melíkdí longe píídak. Ami kídíe kenoyé, idola ettíng legapemang; bulu tíílíngyé, idola asi legapemang. Bulu Ruutum kelok ngiitom agomko tatpe keno-tíílíng bomyé. Ngo, Ruutum Shédí podung.

¹² Ami kídare Sina Siyéng lokke Among Raadang Siyénglo, delokke línggíng kéényulok gíla sanggo kéényunglo makup-malat suyé. Bulu rego takamlo Ruutum ke ngiitom agomko paadomílo emla matayé, idola bulu dem paamayé.

¹³ Delo longe delo amíl edíína milokong delokke mime kídíe teng tíílíng lok otab-olatyé.

¹⁴ Séko buludí Samari lokke uyu kídí lok pésudola, ‘Danlok uyu amínlok,’ demangkom, ‘Beershebalok uyu amínlok,’ emdune, de ami kídíde oletyé, delokke lekoda gerep yimayé.”