AMOS 7 - DEENA BAIBÉL (BSI)

Kaarí-kaanyolo Pemír Kídíem Kaaname

¹ Ngom Ruutum Shédí bí kaarí-kannyoko lengkanto. Delo ngo kaato, edílo rojake ííng gatpenam tarongem gattodín, delokke ííng anne asulpe buklen tokudín delo Ruutum bí pemír mírbamko melíkpe leemodo.

² Kaarí-kaanyo delo ngo pemír kídardem among takamlok ííng annem doyin dope kaato, delo ngo poto, “E Ruutum Shédía, nok ami kídar sim ayalangka; kape kísape bulu turla yéyén? Bulu améla tolnam-ralnam kamang!”

³ Ruutum bí aapíe míílat sudo langkula poto, “Nok kaanamde arope imayé.”

Kaarí-kaanyolo Eme Kaaname

⁴ Ngo akoda Ruutum Shédí kelok kaarí-kaanyoko kaatoku. Delo ngo Ruutum Shédíme emelok bík ami kídarem iréépe leemodope kaato. Eme de among rumkíngke botteruna asi siyéngem gupakto, delokke amongem ukpak bomdo.

⁵ Delo ngo poto, “E Ruutum Shédía, itum toka! Kape kísa nok ami kídare turla yéyén? Bulu améla tolnam ralnam kamang!”

⁶ Ruutum bí lekoda aapíe míílat sudo langkula poto, “Nokke kaanampe sikom imayé.”

Kaarí-kaanyolo Kaajonnana Kaaname

⁷ Ngo Ruutum kelok akoda kaarí-kaanyoko kaatoku. Delo ngo bíme kaajon nana lok kaala monam etor abe kolo dagdupe kaato, delokke bí kaajon nana ko alaglo bomdo.

⁸ Delo bí ngom ííto, “Amos no ingkoko kaadon?” Delo ngo poto, “Kaajon nanako.” Delo bí poto, “Kaatol, ngo ngok Israel ami kídíe suppi gerna kísa geryinkai emla kaajon nana sok lengkandung. Ngo buluke teyolo itung-irépe míínamlok ngo lekoda míílat sukumayé.

⁹ Isaak ke otíng kídíke kumsuko moolop kídídem nyokmoyé. Israelke deena moolop kídar dem bényinmoyé. Ngo roja Jeroboamke ekum-erangdem nyokyin moyé.”

Amos Lang Amajiah

¹⁰ Delok rongem Bethellok miri Amajiah bí Israellok roja Jeroboam kelo agomko melíkto: “Amos bí nom mirupe Israel erang aralo ibodung. Bík agom kídíe among sim nyokmoyé.

¹¹ Amos bí sikepe podung, ‘Jeroboam bí mimaklo silíkyé, delokke Israel em agí among lokke monnyokyé.’ ”

¹² Delo Amajiah bí Amosme poto, “Ngatbong kabong, kaalu miria! Judah amonglo gílankula, belo kaalu-kangor ngiitomem sigto langku. Bulume delok legape nome dormo toka.

¹³ Bethel so kaalu agomem poyimapeka. Kapeila si rojake kumsuko amonge, delokke si among sokke kumkeng ekume.”

¹⁴ Delo Amos bí Amajiahme poyansuto, “Ngo abal legape kaaluna miri mang, delokke kaaluna miri oo petemang; ngo mér sobén alung yébonako, delokke sikamor esing ríkséng inakomin.

¹⁵ Idola Ruutum bí ngom mér kaabomko agér lokke laato, delokke bík Israel ami kídarlo aala polu-poordope lulígto.

¹⁶ Supak dekepeila Ruutum ke agomem tattola. No ngome polu-poor yimapeka, delokke Israel amiem mirupe, legang pomapeka emdung.

¹⁷ Delok legape Amajiah, Ruutum bí nom sikepe podung, ‘Nok ménge luune bene-beponglo notiipe iyé, delokke nok ome-oo kídíem mimaklo petyinyé. Delokke nok amongem kípan sula amiem biyé, delokke no agíe Shédíme kumsumana deemana amonglo siyé. Delokke Israel amiem arorupe monnyok kolo agí amonglok gíyé.’ ”