2 TIMOTHI 4 - DEENA BAIBÉL (BSI)

¹ Shédíke keralo delokke turnemlang sinem Roja kísape bíkke aayékuem bisar kupena, Kristo Jisuke keralo, ngo nom sim bidung:

² Shédíke Agom sim pogoo langka; podí dokom podí madokom pogoo langka; yémgap dola delokke kampope luyilem ludola, lusi lumola, lurat poratla delokke luír poír langka.

³ Aina niyomem pobinamem tatmape inam moodíe pííyé. Dem megeyéla, agíke tatbaape agílo gyabdope pobopena deddína poyil bonem bulu laadumsula agíke mííbape pomoyé.

⁴ Buluke nyorunge aruem ngengkur geyéku delokke buluke dooyinglo ngééba suyéku.

⁵ Idakkom dekena ai-asang takamlo an gap sulangka, yényi dakkom jémgap gelangka, tatpona Ngiitomem pogong namem igelangka, nom binam Shédíke agérem gérlangka.

⁶ Ngokke pedan, ngokke agíem binyok sudí longe aadubong. Ngokke nyokdíe píídakbong.

⁷ Ngo aina mimagem makto, ngokke dukpenamem dukyinto, ngo míngkengem bomgapto.

⁸ Supak telo yéjiinam uun dumlubem mebitung, tetelok bisarna Ruutum bí ngom delo longe delo amanem biyéku. Ngom petommang, séko bulu bíkke angku penamem toyala duududí bulu kepeteng dung.

Agí Míísat Agome

⁹ No ngokkíng menape aapong domílo emla raltoka.

¹⁰ Legade Dema bí tani amongem aang okuname, ngom mepak tungku delokke Thesalonikalo gígéé kaku. Krisk bí Galatialo delokke Titon bí Dalmatialo gíkai.

¹¹ Luk petom ngom duubo sudung. Mark me tomla aabotoka, kapeila bí ngokke agérlo ngom igul dungai.

¹² Tukik me Ephesolo ngo melíkto.

¹³ Edílo no aayédí delo Troaslo Karpokíng ngokke mesunam galugemlang ngokke kitab kídarem, akonpakpe kitab kangkengem bomlangka.

¹⁴ Tai tadok pína Aleksandar bí ngom duuk bito. Bí ngom kape ituadí Ruutum bí dem kaasuyéku.

¹⁵ Nokom agísue bím ansula yépe aido, kapeila bí ngoluke agomem agí akgíto.

¹⁶ Ngokke kerape tolya sukolo, sékoteng ngom aabosuna kamato, idakkom mipile ngom mepakto. Shédí bí dem ajéng dem bulum mesam biyépe.

¹⁷ Idakkom Shédí bí ngokke danpe ralto delokke ngokkelok takam Mipak ami kídíe taddope ngiitomem pogoo dope ngom tolnamem bito. Delokke ngom sipe kolokke mosiitoku.

¹⁸ Ruutum bí ngom atímana runam inam lokke mosiiyé delokke bíkke teyong amolo ngom bomsii yéku. Bíkkíng amín bottename yénam daknamlope duuyar daklangka. Amen.

Luyinnana Salame

¹⁹ Priska Akula delokke Onesiporke ekum erangem salamem bilangka.

²⁰ Erasto bí Korinthlo dungkai, delokke ngo Trophim me Miletlo kidope gínyotoku.

²¹ Dígíne píímang adape so píídope rallangka. Eubul nom salamem bidung, delokke dekepe Pude, Lin Klaudia delokke bíro takamete bidung.

²² Ruutum bí nokke aidlo duumín langka.