2 TIMOTHI 3 - DEENA BAIBÉL (BSI)

Yéyin Longe

¹ Idakkom ankí sulangka: Yéyin Longe telo pesorunam moodíe pííyé.

² Tanie agí petomem ayangsuyé, murkong poisar míítíyé, adum ale iyé, míngkím suyé, lupe géépenam mílí iyé, agí ane abu lugo luang tatmape iyé, kényége iyé, deemayé,

³ ayang mínsunam, maabnam kayimayé, ngiléé solééyé, aang hakjém kamayé, migang kanínge iyé, aina atíem matamayé.

⁴ Runam panamlo, ikar siarlo, yadnam lunamlo, Shédíme ayamape igeyéla, sénam monamlo erapyé.

⁵ Teyong peelok ngoluke dormuem ina kísape idola, sokke pauarem arope míímayé. Bulum atí ibo sumapeka.

⁶ Bulumin ami ekumlo gíla, paab eget gena, aapí eluna, atímape míítína mime kídíem yééyéne.

⁷ De mime kídíde agínpe kénpe emla míídola aruem gaklamape ine.

⁸ Janlang Jambri bínyike Mosime aknam akampe, si amikídí sikom aruem akdung. Buluke aapíde agér imang delokke míngkenge attíng kamang.

⁹ Idakkom bulu mootepe manyok geko kamang, kapeila buluke loorí mangem mipíe kaayé. Janlang Jambrikom dekepakpe ito.

Luyin Ngiitome

¹⁰ Depe epe idokom, no ngokke luyil takamem, ngokke yékorem, ngokke mííduem, míngkengem, yémgabem, ayangem, dongge namem kénsudung,

¹¹ ngom taronang inamem, ngokke arééyém kéndung. Antioklo, Ikoniolo delokke Lustralo ngom kape itodí, ngokke taronalo yémgap genamem no kénsudung. Depe idakkom Ruutum bí ngom takam lokke mosiito.

¹² Arolok lumílo, Kristo Jisukíng deenampe nyogapla yéna mipídem irééyé,

¹³ delokke atímana ami delokke míngkina kídíde mangkam yayang ila, amiem yadla delokke agísuem yadsula iyé.

¹⁴ Idakkom nokke pedan, nom poyil tonam arolo yéyar langka delokke edíípe míngke sulangka. No nom poyilnem kénsudung,

¹⁵ delokke Kristo Jisukíng míngkelok lenna turku penamlo nom gyan kalamona deena Dooyingem koo lokkekai no kénsuto.

¹⁶ Dooying sokke takamde Shédíke ngayab líkname delokke si luyil poyilnape, lurat poratnape, lusi lumonape delokke yéjii penam legape terníng inane.

¹⁷ Delomin Shédíke amie aina agér ipenam takam legape leemo suyéne.