2 SAMUEL 9 - DEENA BAIBÉL (BSI)

Dabid lang Mephibosheth

¹ Longe konem Dabid ííto, “Ngo Jonathan ke legape ayangem lengkan dope, Saul ke erang lok turna kadung adan?”

² Jiba emnam béérangko Saul ke erange kadungai, bím bulu Dabid kíng aamola, “No Jibaya,” emla rojade ííto. “E, ngo mino nok béérang si,” emla Jiba poyansuto.

³ Delo rojade bím ííto, “Ngo Shédíke ayangem lengkan líkdope, Saul ke eranglok turna ami kadunaya?” Jiba poyansuto, “Jonathan ke oo ko kadung, delokke bí ale annyiekai lebyadung.”

⁴ “Íngkolo bí?” emla rojade íngkíto. “Bí Ammiel ke oo Makir ke ekumlo Lodebar esi duudung,” emla Jiba poyansuto.

⁵ Dekepeila Dabid bím langaadope melíkto.

⁶ Edílo Saul ke oten, delokke Jonathan ke oo Mephibosheth píngatodí, bí Dabid ke keralo gubadola kumsuto. Dabid poto, “E Mephibosheth!” “Sina ngo, nok béérange,” emla Mephibosheth poyansuto.

⁷ “Pesomapeka,” Dabid poyan sudola pokai, “Ngo nokke teyolo nok abu Jonathan ke legape ayasuyé. Ngo nok buku Saul ke among takamem nom bilatsuyéku, delokke no agínpe ngokke dokolo dobo-tííbosuyé.”

⁸ Mephibosheth lekoda gubadokula poto, “Sina ekii kísana nokke béérang sim íngkopeda no deddípe ibidune?”

⁹ Delo Dabid Saul ke béérang Jiba me tomla poto, “Ngo nok atolok oten, Mephibosheth me Saul kelang bík erang kídíke takam ekurangem bidung.

¹⁰ No lang nok oo kídíe, delokke nokke béérang kídíe nok ato Saul ke erang legape arík ibila, ali-ayéem buluke dope-tíípenampe boma bilangka. Idola Mephibosheth agísuedan ngokke dokolo agínpe dobo-tííbosuyé.” (Jiba bí oo íying kolang pilngoko delokke béérange íying annyiko kato.)

¹¹ Jiba poyansuto, “Ngo ngok roja ruutum nok ponampe, takamem igebiyé.” Dekepeila Mephibosheth rojalok oo konpe, bíkke dokolo dobo-tííbosuto.

¹² Mephibosheth ke Mika emnam yaaména oo ko kato. Jiba ke erang takame Mephibosheth ke béérangpe iyinto.

¹³ Sikepeila, ale annyiekai lebyana Mephibosheth bí Jirusalemlo duula, roja dokolo bík donam- tíínamem dola duuto.