2 SAMUEL 8 - DEENA BAIBÉL (BSI)

Dabid ke Ikumname

¹ Dekepe irongem Dabid Philistain kídarem ikumla, agí ale rumkílo mela, Dabid bí Metheg-ammah amongem Philistain kídarlok laato.

² Delo bí Moab kídíemte ikumto. Bí ikumnam kídíem amonglo ketyon mopala, nomang kolok bodongem kíto. Nomang annyipe kínamem bí petto, delokke nomang apíng atelpe kínamem bí meturto. Dekepeila, Moab kídíe Dabid ke béérangpe ila, bulu bím kajanang bito.

³ Delokrongem Dabid mimak ila, Rehob ke oo Hadadejer me, Hadadejer ke Euphrates korong línggíng danlok amongem aipe bík aralo mekupe endagem bedanglo ikumto.

⁴ Dabid éjar kolang língko kínídko guré dugbomna sipayingem, delokke jarying annyiko ale sipaying kídíem umto. Bí guré-gaari língkoem gepena guréem ayoko mepala abíd guréem letu-lebang moyinto.

⁵ Edílo Damaskas lok Siria ami kídare, roja Hadadejer me iguldope sipaying lok melíktodí, dem Dabid iyabomla midum jarying annyi kolang jarnyiko petto.

⁶ Delo bí sipaying notko kídíem, buluke asi-among delo ilíkla, bulu bíkke béérangpe ila, bím kajanang kídíem bito. Ruutum bí Dabidme rego takamlo ikummoto.

⁷ Hadadejer ke béérang kídílok bomnam uun tamkung kídíem, Dabid bí laala Jirusalempe bomtoku.

⁸ Dabid bí Hadadejerke roja dobomko doolung annyi; Betah delokke Berothai lok pitol emteng bojéko bomtoku.

⁹ Hamath lok roja Toi bí, Hadadejer ke sipaying takamem Dabidke ikumnamem tatto.

¹⁰ Dekepeila, bí bík oo Joram me Dabid me ashéng kaarík dope melíkla, bíkke mimak imínsutínam Hadadejer me ikumnam legape yidnam agomem pomoto. Joram bí Dabid kepe uun, baldín delokke pitollok pínam ekurang amanlok bomabito.

^11-12 Dabid roja sike simteng kumsuko agérlo, bíkke Edom, Moab, Ammon, Philistain delok Amalek, delokke Hadadejer kelok lanam baldín delo pitol ekurangem inadope kumlíkto.

¹³ Dabid enlat sudokuem Alo Yiibelo, jarying kola éjar píínyiko Edom amiem petla, bík amíne mayangko botteyato.

¹⁴ Bí Edom among loteng rego takamlo sipaying notko kídíem ilíkla, ami takamde bík béérangpe iyinto. Ruutum bí Dabidme rego takamlo ikummoto.

¹⁵ Dabid Israel tabung teyolo ruutum bomla, takam amiem aipe arolok yéboto.

¹⁶ Jeruiah ke oo Joab bík sipaying lok ruutumpe ito; Ahilud ke oo Jehoshaphat bí legí-sigangem atkum bonape ito;

¹⁷ Ahitub ke oo Jadok lang Abiathar ke oo Ahimelek bínyi miripe ito, Seraiah bí kebang atge bonape ito;

¹⁸ Jehoiada ke oo Benaiah bí Dabid agíme migípe kaabomna sipaying kídíke ruutumpe ito, delokke Dabid ke oo kídare miripe yéto.