2 SAMUEL 5 - DEENA BAIBÉL (BSI)

Takam Israel Teyolo Dabidme Rojape Iname

¹ Delo Israel lok opín takame, Hibronlo Dabid kíng aadumsula, poto, “Kaatola, ngolu nokke adín elang alonge.

² Yétonam longe kídí deloteng, edílo Saul bí, ngoluke rojape ituadín, deloteng no mino Israel aralo ngolum gílennam emlang angkunamem ibotone. Delo Ruutum bí nome poto, ‘No ngokke Israel ami teyolo kaabomnape iyé, delokke Israel teyolo ruutum bomnape iyé.’ ”

³ Dekepe ila, Israel lok miro takame roja delo Hibronlo aato, delokke Dabid roja bí Israel ami kídarem, Ruutum ke keralo daapongko ibosula, bulu Israel teyolo Dabid me rojape pídéla tosak líkto.

⁴ Dabidke dítage takying angumko bík rojape ilenduem ido, delokke bí takying appiko rojape iboto.

⁵ Bí Hibronlo Judah teyolo, dítak kíníd kolang poolo akkéko, delokke Jirusalemlo takam Israel kelang Judah teyolo takying angum kolang tagumko rojape iboto.

⁶ Moodíe pííla, Dabid roja lang bík ami kídare, Jirusalem em mimakpe iyabomto. Delo duuna Jebus ami kídíe, Dabid me bulukíng aala ikumlamayé mííla bulu Dabid me poto, “No edílokom so araso aalamayé, mikmanelang lebyanetengei nom sok mon-gélayé.”

⁷ Idola Dabid Jayon lokke yabgoem bénala laato. Dekepeila sim Dabid ke luune emdung.

⁸ Delokke, Dabid delo longe delo poto, “Séko buludín Jebus ami kídíem petpe míídune, bulu gerepla asi nala sok mikmana emlang lebyana kídíem petlangka, bulu Dabid ke miru kídíe.” Dekepe ila sikepe podung, “Mikmane lang lebyane ekum arang delo aalamang.”

⁹ Delo Dabid Jayonlo duula, deme Dabid ke doolung luune emlang mínto. Delo bí Millo lok arang delo, luune dem airupe píísuto.

¹⁰ Delo Dabid ralya-yayang ito, kapeila Ruutum Maklíngke Shédí bí bíkkíng yémín geto.

¹¹ Turlok roja Hiram bí delo Dabid kíng kotoki melíkla, bí Sidar esing mistri lok, delokke líísak pína lokteng melíkla, bulu Dabid me ekumko mobito.

¹² Delo Dabid Ruutum ke bím Israel teyolo rojape ilíknam emlang, bík Israel amín legape among dem gerep monamdem kénsuto.

¹³ Delo Dabid Hibron lok Jirusalemlo aarongem, éémé-éésirilok bojéko laalangkula, deddína ome-uem otoku.

¹⁴ Sike kídar si Jirusalemlo okunam kídare: Shammua, Shobah, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishama, Eliada delokke Eliphelet.

Philistainem Ikumname

¹⁷ Dabid me Israel lok rojape inamem, Philistain kídíem popatonam, buluke sipaying kídíe bím umpe gílento. Edílo Dabid sim tattodí, bí yapgo edíína doolung kolo gínyok geto.

¹⁸ Delo Philistain kídíe Rephaim yiibe delo pííla dem duubomto.

¹⁹ Dabid Ruutum me íngkíto, “Ngo Philistainem mimak imíloya? No ngom ikummoyén?” “Aiyé, mimak ilangka. Ngo nom buluke teyolo ikumdope biyé,” emla Ruutum poyansuto.

²⁰ Dekepeila, Dabid Baal Perajimlo gíla, Philistain kídíem ikumto. Bí poto, “Ruutum bí puumu kísape ngok miru kídíem ibomto.”

²¹ Dekepeila, dem moolop dem Baal Perajim emla mínto. Edílo Philistain kídíe duggetokudín, bulu buluke uyu mimang kídíem mesuto, delokke dekedem Dabid lang bík ami kídíe bomtoku.

²² Delo Philistain kídíe, Rephaim yiibe delo gílat sulangkula lekoda duubomtoku.

²³ Lekoda Dabid Ruutum me íngkílangkula Ruutum poyansuto, “Sok bulum mimak iyamapeka, idola sok bildo langkula, arotkon danlok Balsam esing ane kídí ampeng elok mimak iyabomlangka.

²⁴ Edílo nolu esing attíng delo gídudem tatyédí, delo mimak iyabomlangka, kapeila Philistain sipaying kídíem ikumdope ngo kerangem gígebomyé.”

²⁵ Dabid Ruutum ke lulíknampe mimak ila, Philistain kídíem Geba lok ila Gejer loope monlat sutoku.