2 SAMUEL 4 - DEENA BAIBÉL (BSI)

Ishbosheth me Petname

¹ Edílo Saul ke oo Ishbosheth bí, Hibronlo Abner me petnamem tattodín, delo bí yagorupe pesoto, delokke Israel ami takame mínggo-regosuto.

² Ishbosheth bí Rimmon ke oo annyi, Baanah delokke Rekhab emnam midum annyiko, línggoona opéé delokke ruutumpe ineke kadungai. Bulu Benjamin opín lokke Beeroth erange. (Beeroth sim Benjamin kope sandung.

³ Sokke akupe duuna kídíe, Gittaimlo duksisula, delo duulík ayarkai.)

⁴ Saul ke oo Jonathan bí ale annyi ekai lebyana Mephibosheth emnam oo ko kadungai. Bíkke dítage takngoko idoem edílo Saul kelang Jonathanke sinamem Jejreellok tatpatodín, delo bím kaabomna mimede, bím bola lomla duksisupe dukdagem oletmola lebyamoto.

⁵ Beeroth ami Rimmon ke oo annyi Rekhab lang Baanah bínyi, longe doonyi pamki kiduklo gílenla, Ishbosheth kíng longe raadang apéédungem bík ekumlo aato.

⁶ Eyab delo duuna mimede géhu kabbín dula immie ila ipduem, Rekhab lang bík bíro Baanah bínyi aralo aato.

⁷ Bínyi ekum aradelo aala, Ishboshethke ipko pírtek aralo agí kyare ippulo ipdungem, maangala bíme pakala dumpongem teetuto. Bínyi dumpong dem bomla, yoh ruubudem Arabah bedalok enlangkula,

⁸ Ishbosheth ke dumpong dem Dabid kíng Hibronlo bomabitoku. Delo bínyi rojadem poto, “Sina, nom petpe ina, nok miru Saul ke oo Ishbosheth ke dumponge. Siloke longe so Ruutum bí ngok ruutum me Saul kelang bík otíng-oyin teyolo ikum motungku.”

⁹ Idola Beeroth ami Rimmon ke oo annyi Rekhab melang bík bíro Baanah bínyim, Dabid poyansuto, “Ngome takam ebínlok mopítna Turyarna Ruutum ke amínlok pésudola podung,

¹⁰ edílo amikone, ‘Kaatokala, Saul bí sikai,’ emla gaina legangko emla pobito emla míítodín, ngo bím Jiklaklo pakato, de bíkke ngom legang pokan kunam lokke amanpe ito.

¹¹ Demílo supak, aina amikonem, agíke kyare ippulo ipdungem petna, bíírík-hamgomana ami nonyim, ngo bík iyyi areme nonyikíng laala, tani among sok nonyim nyokmomayénía?”

¹² Delo Dabid bík yaamé kídíem lulíkla, bulu bínyim pakala, bínyike alag emlang aleme teela, Hibron lok asi paatang ampeng delo pakto. Idola bulu Ishbosheth ke dumpong deme laala, Abner ke Hibron lok ago delo yuto.