2 SAMUEL 22 - DEENA BAIBÉL (BSI)

Dabidke Ikum Mirie

¹ Edílo Ruutum bí Dabid me Saul keloklang, bík abíd miru kídílok mopíttodín, delo Dabid sim miri sim Ruutum kelo luto:

² “Ruutum bí ngom mopítne, bí ngokke edíína líírenge.

³ Ngokke Shédí bí ngom mopítne, bíkkelo ngo duusisudung. Bí ngom tamkungpe ila mopítdung, bí miruem iyang bila ngom aipe duumodung; bí ngom turmone; bí ngom mopítla díímín-momín, lokke ngom aipe duubodung.

⁴ Ngo Ruutum me gogto, delo bí ngom ngok miru kídílok mopítto, Ruutum me yidgelangka.

⁵ Sinamke asi sipare ngom tanggo bomto, nyoknamke sipare ngom tanggo bomto,

⁶ Peso-rían siname ngome egum-edape ibomto, delokke ago arunge ngome tobomto,

⁷ ngokke ankíduem ngo Ruutum me gogto, ngo ngok Shédí me iguldope gogto. Bíkke ekumlok bí ngok gognamem tatto; bí ngok iguldope kapgu sunamem tatbito.

⁸ “Delo amonge danla tonto, taleng telokke dakkenge yunggo-yunggola tonto.

⁹ Bík nyobung arung lok míkkíe lenla, romnyokpena emelang guna mekole bík nappalok lento.

¹⁰ Bí talengem sérpansula bík lepyo rumkínglo mukkangko tujémla tokto.

¹¹ Bí bík alap kana turna ato delo duula menarupe yopto, bí asarlok alap kídílo duula yobgooto.

¹² Bí kaamo aralo duunyok geto, delo mukkame gyalum bomto.

¹³ Yaari garnam kídarlok guna mekole, bík kerang delo írgeto.

¹⁴ Delo Ruutum bí taleng telo doomírpe mírla, Ralya yalumna Shédíke adude lento.

¹⁵ Bí bíkke epugem apla, bík miru kídíem dukpan-dukran sumoto; bí yaari garnam lok bulum dugyin moto.

¹⁶ Sine-siyéng lok arang amongem kaapato, delo edílo Ruutum bí bík miru kídíem lula mardola ugbomtodín, delo among sok dakkeng kídíem ngunkanto.

¹⁷ “Ruutum bí teyong telok among so oila, ngom gagla bí eerína asilok ngom solentoku.

¹⁸ Bí ngom ngok ralna miru kídílok, delo ngom nena takamlok mopítto. Bulu ngom penem ralyarunekíai.

¹⁹ Edílo ngo adírla duutodín, delo bulu ngom iyabomto. Idola Ruutum bí ngom mopítto.

²⁰ Bí ngom peso penam takamlok igul-ipítto; bí ngom mopítto, kapeila bí ngom aipe mííto.

²¹ “Ruutum bí ngom amanem bidung, kapeila ngo aroem igedung. Bí ngom utepooro ruulíkdung, kapeila ngo dengomnako.

²² Ngo Ruutum ke ayon binamem tatbito, ngo ngok Shédí kelok ngétgé kumang,

²³ ngo bík ayon takamem yégeto, ngo bík lulík kídíem tatbimape imang.

²⁴ Bí ngom imem kamang emla kéndung, delokke imem pekolo ngok olík manamem bí kéndung.

²⁵ Dekepe ikolok bí ngom amanem bidung, kapeila ngo aroem igedung, kapeila bí ngom dengomnako emla kéndung.

²⁶ “E Ruutum no ngokke keralo tetepe míína teyolo, noteng tetepe míídung. Delokke arona kídílo apíngpe aidung.

²⁷ No deena kídílo deebidung, idola bííríkmana teyolo mirupe idung.

²⁸ No mínggíp sunem mopítdung, idola míngkím sunem igípdung.

²⁹ Ruutum no ngokke merue, no ngok kaamoem monpakdung.

³⁰ No ngom ngok miruem imínsulana, delokke buluke sipaying kídíem ikumdope, ralnam emlang pauarem bidung.

³¹ “Sikena Shédíbí, edítko bík agér kídíe aropakdune, edítko bík agomlo míída suladune, bí bík mopít em matana takam legape buluke tamte.

³² Ruutum petommin Shédíe, Shédí petommin ngolum mopítne.

³³ Si Shédí si ngok edíína duusisukenge, bí ngok gípekuem mopítne.

³⁴ Sidume díítelo kape kísape tugapla yédakdí, dekepe Shédíbí ngom tugapmola oletmomang.

³⁵ Ralya yalumna iyyi lok mimaklo apjidope, bí ngom apyildung.

³⁶ E Ruutum no ngom kaabomla mosiidung, nokke igule ngom bottemoto.

³⁷ No ngom miruem ummadope ila, ngo letel koteng oletmang.

³⁸ “Ngo ngok miruem monbomla bulum ikumto; ngo bulum nyokmo madolope tekíngmang.

³⁹ Ngo bulum demletla bulu gerep layimang. Ngok keralo bulu ikumkosula ketdung.

⁴⁰ No ngom mimak legape ralnamem bila, ngok miru kídí teyolo ikummoto.

⁴¹ No ngokke miruem ngokkelok dugge motoku, ngom nena takamem ngo nyokmoto.

⁴² Bulu igul legape kanggosuto, idola sékoteng bulume mopítmato.

⁴³ Ngo bulum nyotmíkla, bulu pemuk kísape ikai. Ngo buluke teyolo bene-bepong bedang kísape tujémto.

⁴⁴ No ngom ngokke mirupe ina amilok mopítto, delo among teyong so ngok yébonamem duumoto. Ngok kénmanam ami kídíe supak ngok aralo agér gérbinape ikai.

⁴⁵ Mibo-miying amie ngok keralo gubaadung; edílo ngok ponamem tatyédí dem bulu igedung.

⁴⁶ Bulu buluke miram aapíem geyimape, buluke líísak ekumlok dandola aadung.

⁴⁷ “Ruutum bí yédung! Ngom mopítnem yidgelangka! Ngom mopítna ralna Shédíke bottenamem pogolangka.

⁴⁸ Bí ngok miru kídí teyolo ikummoto, bí among sim ngok aralo melíkla,

⁴⁹ ngom ngok miru kídílok mopítto. E Ruutum no ngok miru kídí teyolo ikumnamem ngom bito, delokke migu-miyak amilok ngom mopítto.

⁵⁰ Delok legape ngo nom amongso rínggedung, ngo nom rínggenam miriem ludung.

⁵¹ Shédíbí bottena ikumnam kídíem bík rojeme bidung. Bí bík ullensunam Dabid melang bík otíng-oyinlo, yarí kamana ayangem agínke lengkandung.”