2 SAMUEL 20 - DEENA BAIBÉL (BSI)

Shebake Dabidme Mirupe Iname

¹ Dekepe ido delo, Benjamin ami Bikrike Sheba emnam milí-hodong ooko kato. Bí bikulem mutla, “Ngolu Dabidkíng atí tarong kamang. Jesseke oolo atí tarong kamang. E Israel, takame agí-agí notkolo gílangkuka,” emla gogyito.

² Dekepeila, Israel ami kídare Dabidme mepakla, Shebakíng gímín geto, idola Judah lok ami kídíe Dabidkepe doola, Dabidkíng Jordanlok Jirusalemlo gímín getoku.

³ Delo Dabid Jirusalemlo bík ekumlo aalangkula, bík ekumem kaabom dope menam éésiri íyingdem laala, bulum sontori lok kaabomdope meto. Bí buluke míípenam kídíem bito, idola bulum bí ketbo suyimato. Dekepe, bulume meyéng kísape, buluke sidolope sontori melíkla sitkapla meto.

⁴ Delokrongem rojade Amasame poto, “Longe angum araso Judah ami takamem so gogdum sulangka, delokke no agísueteng delo duulangka.”

⁵ Dekepeila, Amasa Judah ami kídíem gogdumsupe gílento, idola bí rojalok longe binam aradelo aalat sulangkumato.

⁶ Dekepe ikolok, rojade Abishaime poto, “Sheba bí Absalom me pakyape ngolum ebín biyé. Ngok ami kídílok laala, bík méélamlo gímín gekai, demamílo bí yabgokana luune kídílok laala ngolu kelok mopít supelo.”

⁷ Delo Abishaike méélamlo, Joabke ami kídíelang, Keret ami kídí, delokke Pelit ami kídíe, delokke miramruna kídare Jirusalem lok gílenla Shebame monmín geto.

⁸ Edílo bulu Gibeon lokke debaruna lííbyang delo píítodín, delo Amasa bulum kaaríksuto. Joabbí yoksako ugínglo ginsula mimak legape leemoem gedo. Bí kerang danpe gíyédem yoksade yuglento.

⁹ Amasame Joab, “Ngok angonga, aidunía?” emdola bík lakbík delok Amasake sokmurem gagdola bím mumpuppem ito.

¹⁰ Amasabí Joabke alagkon delo bomnam yoksa dem atí ansumato. Delo Joab níkyamla, Amasake akii-asale among delo yuglento. Bí menang asak sila, Joab bím pakakumato. Delokrongem Joablang bík aní Abishai Shebame monmín geto,

¹¹ Joabke amikone Amasake simang amíl ampeng delo dagdola gogto, “Joab kepelang Dabidkepe ine Joabke méélamlo gílangka.”

¹² Amasake amíle iyyi lok lííla, bedang delok raadangpak delo doodo. Joabke amide ami takame asoope daknamem kaala, bí simang dem bedang lok sola, arík delo solíkla yamboko pokaplíkto.

¹³ Simang amíldem bedang delok langgérongkuem, takame Joabkíng lekope Shebame monmín kolo gímín geto.

¹⁴ Shebabí Israel opín takamlok dei-degongem gíboola Abel Bet Maakah emnam doolung delo píngato. Bikri opínlok mipil miyonge gídumsula, Sheba kíng doolung delo aato.

¹⁵ Joabke ami kídíe, Shebake delo duunamem tatla, gíla bulu doolungdem gargoobomto. Bulu luyudanke yabgo delok kédénglok gen-gola, buluke yapgoe oletdope rumkíng danlok koobuto.

¹⁶ Doolung aradelo, kénna-paana mimeko katuai. Bí yapgo delok goglenla poto, “Tattola, tattola, Joab me so aadope pobilangka; ngo bím luposupe míídung.”

¹⁷ Joabke gíarodem bí íngkíto, “No Joab ya?” “E ngomin,” emla Joab poyansuto. “Migom, no ngok agom sim tatbilangka,” emla mimede poto. “E ngo tatbidung,” emla bí poyansuto.

¹⁸ Mimede pokai, “Konno melo bulu sikepe podungai; ‘Gíla nok tatkí supenamem Abel doolung elok laatolangka,’ dekepe bulu idungai.

¹⁹ Ngoluke doolung si botterunako, Israel lokke dengom yalumna, delokke míngge yalumna akonpe idung. No sim kapeda nyokmopem ikane? No Ruutum kepe ina sim nyokmopem míídunía?”

²⁰ “Edíloteng míímang. Ngo noluke doolung sim lííla demangkom nyokmola edílokom imayé.

²¹ De ngoluke mííbom nammang. Ephraim amonglok díítelo duuna, Bikrike oo Sheba emnam amikone, roja Dabidme mirulpe rullenbomto. Dekepe ikolok sim ami sim ngolum bitoka, delo ngolu doolung sokke ngétgen yéku,” emla Joab poyansuto. “Ngolu bík dumpongem yapgo sok ellen biyé,” emla mimede poto.

²² Delo bí doolung delokke ami kídíem bíkke ségu ruunamem popala, bulu Shebake dumpongem teela yapgo teyong delok, Joabkíng yoplíkto. Delo Joab, bík ami kídíe doolung dem mela gídokupe iyodpe bikul dem mutla, bulu ekumpe ensutoku. Delokke Joab Jirusalemlo roja delo aalatsutoku.

Dabid ke Sipaying Ruutum Kídíe.

²³ Joabbí Israel lok sipaying ruutumpe ito; Jehoida ke oo Benaiah bí Dabid ke migíng sontori lok ruutumpe ito.

²⁴ Adoniram bí abíl agér ina kídí teyolo ruutumpe yéto; Ahilud ke oo Jehoshaphat bí legangem atkum bonape ito;

²⁵ Sheba bí kebang atgebonape ito, Jadok lang Abiathar miripe,

²⁶ delokke Jair doolung lok Ira teng Dabid ke miri akonpe yéto.