2 SAMUEL 19 - DEENA BAIBÉL (BSI)

Joabke Dabidme Lusisuname

¹ Dabid rojabí Absalom ke legape kapla-rííla ankíla duudung emla Joab me pokan bito.

² Dekepeila, Dabid ke maglíng kídí delok ikumnam legape ashéng sénamde, adírnampe itoku, kapeila bulu rojae bík oo legape ankídung emla tatto.

³ Bulu doolung delo mimaklok dugnyok gelangkula, annyingna sipaying kísape, dengompe aalat suyintoku.

⁴ Rojade migmoem polumsula yagorupe kapto, “E ngok ua, Absalom ngok ua. Ngok oo Absalomía.”

⁵ Delo Joab roja ekum delo gíla bím poto, “Silo no nok turnamem mopítna, delokke nok ome-oo, nok méng kídí, delokke éésiri kídíem mopítna ami kídíem no annying aloomoto.

⁶ No nom ayanem akla, nom mirupe inem tolíkto. No nok maglíng ruutum kídíelang nok ami kídíe, nok keralo atí are kamang emla lengkankai. Ngo kaadung, Absalom bí silo turdola, ngolu takam siduamílo no ashéng alooyai.

⁷ Supak gíla no nok ami kídíem aipe potolangku. Ngo Ruutum ke amínlok pésudola podung, no dekepe pokumamílo, buluke lok sékote nyampoke rohlo nokkíng yémín gena kaimayé. Dekepe imílo, de nokke yénam lokke gérmayalumpe iyé.”

⁸ Dekepeila rojade gerepla, luuyab ampeng delo gíla duuto. Bík ami kídíe bík delo duunamem tatla, takame bím bamdum subomto. Dekepe iduem Israel ami takame agí-agí ekumpe dugyin getoku.

Jirusalemlo Dabidke Aalatsukuname

⁹ Delokke Israel lok opín takame, rego mipílo akmín-berín sula, “Roje ngolum ngoluke miru alaglok mopítto; delokke Philistain ami alaglok mopítto. Idola supak bí Absalom me among sok duggekai.

¹⁰ Idola ngoluke ruutumpe yébodope kumlíknam, Absalom bí mimaklo sikai. Demílo supak kapeda nolu rojaem bomang kupenam legang atí pobosuman?” embo suto.

¹¹ Israel lok pobosunam legangem Dabid roja tatpaato. Dekepeila, bí miri Jadok melang, Abiathar bínyim Judah lokke miro kídíem, “Nolu kapeda, rojem bík dungkolo bomangkupe méélamyalum kane?

¹² Nolu ngok ali-atodsue, ngok agísu iyyi-adínsue. Kapeda nolu ngom langaangkupe méélamyalumpe ikane?” emdope políkto.

¹³ Dabid, bínyim Amasa meteng podope melíkto, “No ngokke ali-atodsue. Supaklokke ila, ngo nome maglíng sok ruutumpe Joab ke ayanpe melíkdung. Ngo sikepe imayémílo Shédí bí ngome simo daklangka.”

¹⁴ Dabid ke agom-aange Judah lok ami takamke aapí-aangem ikumto, delokke bulu bímlang bík béérang kídí takamem aadokupe agomem melíkto.

¹⁵ Bík aalat sudakkuem Judah ami kídíe, rojaem Jordan koronglo, korong kékon delok gíbokupe emla Gilgallo kaaríksuto.

¹⁶ Delo moodípak delo, Benjamin ami Bahurimlo duuna Gera ke oo Shimei, Jordan korongpe Dabid rojame kaaríksupe lomla gíto.

¹⁷ Bíkkíng delo Benjamin opínlok éjarko amie gímín gene kato. Delokke Saul ke erang lok béérang Jiba teng bík oo íying emlang pilngoem, delokke béérang íying annyiko gíbola roja lok kerape Jordan koronglo pííto.

¹⁸ Bulu korong dem rojalok opéédem koobola, delokke rojalok míínampe idope ito. Rojalok korongem koopem idopak dem Shimei bí kerang delo gubala

Shimei me Dabid ke Ayang Lengkanname

¹⁹ poto, “Ngok roje ngok imemem mepak daklangka. Jirusalem lok nok gílendagem, ngokke nome imemnamem mitpan subilangka.

²⁰ Ruutuma ngo imemruto emla ngo kénsudung, deke legapemin, línggídan opín kídí aralok, ngo kerayalumpe rojaem kaarík sunape aadune.”

²¹ Jeruiah ke oo Abishai polento, “Shimei me petpe aiyé, kapeila bí Ruutum ke rojape ullen sunamem béélíkto.”

²² Idola, Dabid Abishai melang bík bíro Joab me poto, “Nok míínamem séko íngkídune. Kape no ngom ebín bipe em idunía? Ngomino supak Israel lok rojae, delokke silo Israel ami atel koteng simayé.”

²³ Delo bí Shimei me pésudola poto, “No simayé.”

Mephibosheth me Dabid ke Ayang Lengkanname

²⁴ Delo Saul ke oten Mephibosheth bí rojaem kaaríksupe tokto. Roja delok Jirusalem lok gílendo delok ila, ikumtola angkuma deloope, Mephibosheth bí, alem mosumato, nammídem ngíbín sumato, delokke ege genam kídíemteng etbínsumato.

²⁵ Edílo bí Jirusalem lok rojadem kaaríksupe píítodín, delo rojade bím poto, “Mephibosheth, no kape ngokkíng gímín gematon?”

²⁶ Bí poyansuto, “E roja, ngok ruutuma, nok béérang ngo lebyadung. Dekepeila nokkíng ngo gímín gedope, ngok béérangem ngo gadolo duupuem ilíkbidope potuai, idola bí ngom tatbimato.

²⁷ Bí ngok legangem nom medola pobito. Idokom no Shédíke kotoki kísane; dekepeila nokke aidung míínamem ilangka.

²⁸ Ngok abuke erang takame ngok ruutum kelok petbaape ikai, idokom no ngom nok dokolo doladope imoto. Nokkelok ngo abídyang yatek kolayimang.”

²⁹ Rojade poyansuto, “No bojéyape popenam kaimang. No lang Jiba nonyi among sim ipansudope ngo lulíkdung.”

³⁰ “Jiba me bomyin motoka,” emla Mephibosheth poyan sudola, “Ngok legape ngok roje eker-essape aalatsukunam si aidung,” emla poto.

Barjillai me Dabid ke Ayang Lengkanname

³¹ Gilead ami Barjillai teng Rogelim lok rojaem Jordan korong delo gíríkto.

³² Barjillai bí takying píínyina mijingkuai. Bí mirem alongla, rojalok Mahanaimlo duuduem bím donamem gebito.

³³ Rojade bím poto, “Ngokkíng Jirusalemlo aamíntola, delo ngo nom kaabomyé.”

³⁴ Idola Barjillai poyansuto, “Ngo bojépe turpenam kaimang, dekepeila, ngo kape rojalo Jirusalempe gímín gekupen?

³⁵ Ngo takying píínyi kaabong, delokke íngkoeteng ngome erap moyimang. Ngo dopo-donying tíípo-tíínying koteng kénpan suyimang, delokke ngo miri luna kídíke adud emteng tatpaayimang. Nok teyolo ngo eget kopemin ipe iyéne.

³⁶ Ngo sikepe bottena aman paabanape imang. Nok béérang ngo nokkíng Jordanem koola anyong komai enmín geyéne.

³⁷ Delokke ngom ekumpe gílangkula, ane-abu ago ampelo simokui. Sina ngok oo Khimham bí. Bí nokkepe agérem gérbiyé; bím nokkíng gíbotolangku. Ngok ruutuma, nokke aipe míínamem bík legape gérbilangka.”

³⁸ Rojade poyansuto, “Ngo bím ngokkíng gíboyéku, delokke bík legape no, íngkokodín míídune, deme ibiyé.”

³⁹ Delo Dabid lang bík ami takame Jordanem kooto. Bí Barjillai me mumpupdola bík utepooroem bito, delokke Barjillai ekumpe enlat sutoku.

Roja Legape Judah kelang Israel ke akmínsuname

⁴⁰ Edílo rojade Jordanem, Judah lok takam amie, delokke Israel lok attungkon amie koobola kootodín, delo bí Gilgallo gíto. Delo bíkkíng Khimham bí gímín geto.

⁴¹ Delo Israel ami takamde roja delo gíla bím poto, “Ngoluk ruutuma, kapei ngoluke Judah lok bíro kídíe rojaem doppyola, bím lang bík erang kídí, delokke bík ami kídíem, Jordanem koobo kakune?”

⁴² Judah lok ami kídíe poyansuto, “Ngoluke dekepe inamde, kapeila roja eteng ngoluke akonemin. Dekepeila kapeda si nolum marmokane? Bí ngoluke legape dore dormang, delokke ngolum atí koteng bimang.”

⁴³ Israel ami kídíe emyansuto, “Ngolu rojalo tarong íyingko kadung; delokke kékon loteng, nolum pemílo Dabid ke teyolo ngolu botteyape tobaadung. Kape nolu ngolum mepak yangkan? Roja em langa dokupe kerang-kerangpe pogene ngolumanía?” Idola tokér sukolo Judah lok ami kídíe Israel ami kídíem pemílo miga-miramyato.