2 SAMUEL 18 - DEENA BAIBÉL (BSI)

Absalomme Ikumname Delokke Bík Siname

¹ Dabid bíkke ami kídíem gogdumsula, éjar opéé pelang língko opéépe iyinpala, buluke teyolo maglíng ruutumem ullíkto.

² Delo bí opéé angum kope ila, Joab melang Joab ke aní Abishai, delo Gath lokke Ittai me opéé angum delokke maglíng ruutumpe imoto. Delo rojade bík ami kídíem poto, “Ngo agísue nolukíng gímín geyé.”

³ Idola ami kídíe poyansuto, “No ngolukíng gímínpe aimang. Ngoluke opéé attung kone sidokom, bulu ngolum atí mííbom mayé. Idola no ngolu kepe jarying íying kísane. No doolung so duudola, ngolum igul melíkla inamde aiyayé.”

⁴ “Noluke aipe míínampe iyé,” emla rojade poyansuto. Delo bí luyab ampeng delo, bík ami kídíe éjar opéé pelang delokke língko opéépe gílendoem dagto.

⁵ Bí Joab, Abishai delokke Ittai me, “Ngok legarupe yaamé koo Absalom me atí ike-sire mapeka,” emla lulígto. Delokke maglíng takamde Dabid ke bík maglíng ruutum kídíem lulígnam sim tatto.

⁶ Dekepeila Israel kídíem mimak imínsupe emla, Dabid ke maglíng kídíde, mimak imín supeko Ephraim lok moonam delo gíto.

⁷ Delo Israellok ami kídíe, Dabid ke béérang kídílok ikum kosula, amie delo longe delo jarying annyiko sito.

⁸ Mimak de among delok rego takamlo ila, yoksaem pemílo moonamde bojéyangko amiem petto.

⁹ Raatagem Dabid ke amiem Absalom bí kaaríksuto. Absalom bí kossor teyong kolo duuduai, delo kossor de aag-arak kanarung ok esing sine rumkíng kolok dugla, Absalom ke dumponge borkok kolo séplík sula, bí delo bíkai delokke kossor de dugyarsukai.

¹⁰ Delo Dabid ke amikone bím kaala, Joab me pokanto, “Ruutume, ngo Absalom me ok esing kolo bídope kaato.”

¹¹ Joab poyansuto, “No bím kaatomílo, bím no deloi kapeda petyam mane? No bíme delo petnam kuamílo ngo agísue nom baldínem íying kolang miram ami lok uug genamko biyai.”

¹² Idola amide poyansuto, “No ngom éjarko baldínem biduakom, ngo roja oo teyolo alage píílíkmayé. Ngolu takame nom lang Abishai delokke Ittai me, ‘Ngok legarupe yaamékoo Absalom me atí ike-sire mapeka,’ emnamem tatyinto.

¹³ Delokke ngo rojalok agomem ipéésula, Absalom me mokatua míloteng deme rojae tatyé, (Kapeila roja kelok íngko atí emkom rumsup laamang.) delokke no ngom dagge bimayaí.”

¹⁴ Joab poto, “Ngo nokkíng sikepe toyala duutímayé.” Delo bí gíníng angumko laala, Absalom ke ok esing delo turla bídungem bík angkeng delo gelíkto.

¹⁵ Delokrongem Joab ke mimak ekurang geyana, yaamékoo íyingde Absalom me gargoola pakato.

¹⁶ Depe irodem bikul dem Joab mutla, mimakdem tekímola bík maglíng takame Israelem monkolok aalat sutoku.

¹⁷ Bulu Absalom ke simang dem laala moonam delokke eerína kobung kolo ellíkpala, dem língkum kolok kumkapto. Israel kídí takame agí-agí ekumpe dugyintoku.

¹⁸ Bíkke turdungem Absalom bí, agísuem mínggenana gaangko Roja kídílok Yiibe emko delo pílíkto, kapeila bí posuto, “Ngok amínem mínggedope, ngo oo kamang.” Bí gaang dem agí amínpe mínlíksula, silo loopeteng deme Absalom me Mínggenane emdung.

Dabid ke Ankíname

¹⁹ Delo Jadok ke oo Ahimaaj bí Joab me poto, “Ngome dugla rojame Ruutum bí bík miru kídí alaglok bím mopítto, emnam ashéngnam agom sim pokan bikumoi.”

²⁰ Delo Joab bím poyansuto, “Silo no sim agom sim pokumayé; no abíd longekolo pokan biladoku. Idola, silodan no pope aimang. Kapeila roja lok ue sikai.”

²¹ Delo Joab bí Kush amiko tomlíkto, “Gíla, nok kaanam takamem rojame pokantoku.” Kush amide Joab ke keradelo gubapala dukkaku.

²² Jadok ke oo Ahimaaj lekoda potoku, “Depe-epe ilai, ngomteng Kush ami méélamlo dugla rojeme pokan motokui.” Idola Joab poyansuto, “Ngok ua, no kapeda gílíng kane? No sok legape atí aman paamayé.”

²³ Bí poto, “Íngkoko idakkom, ngo duglídungku.” Delo Joab bím poto, “Demílo dukkalangku.” Dekepeila, Ahimaaj Jordan yiibe danlok dukla, Kush amidem patpootoku.

²⁴ Dabid bí doolung delokke luyu kelang, arayang luyab lok pénsam delo duuduai. Lamkang duuna sontori de yapgo luyab lokke míílong delo resala kaalen toname, bí amiko duksula dugadope kaato.

²⁵ Delo sontoride rojadem gogla kaanamdem pokanbito. Rojade poto, “Bí petommílo, bí ashéngnam agomem bomadungku.” Dugna de anín yayang ito.

²⁶ Delo sontori de angukon amikote dugdope kaalangkula, rumkíng delo yéna luyab sontori dem gogla poto, “Kaatola angukon ami koteng duksudak.” Rojade pokai, “Bíteng ashéngnam legangem bomang bidung kupe.”

²⁷ Sontori de poto, “Ngok kaaname, kerangke ami dukkor esi Jadok ke oo Ahimaaj kísa idung.” Delo rojade poto, “Bí aina amiko, delokke bí ashéng nam legangem bomadungku.”

²⁸ Delo Ahimaaj rojadem gogdola poto, “Takame aidung.” Roja kerang delo gubadola poto, “Ruutum nokke Shédíke amínem yidgedung. Bí ngokke ruutum rojaem mirupe ina kídí teyolo ikummoto.”

²⁹ Rojade ííto, “Yaamé koo Absalom bí aidun?” Ahimaaj poyansuto, “Roja nok béérang Joab ke ngom tomlíkdakdem, ngo yagorupe lomdope ami kídarem kaato, idola íngkokodí lombomtone dem ngo kénmang.”

³⁰ Delo rojade poto, “Elodan dakya polangka.” Dekepe ila, bí gígédola delo dagyapoto.

³¹ Delo Kush amide píílang kula rojadem poto, “Ngo roja legape ashéng agomem boma bidungku. Silo Ruutum bí nok mirupe ina takam teyolo ikumdope bito.”

³² “Yaamé koo Absalom bí aidun?” emla rojade ííto. Kush amide poyansuto, “Ngok ruutum ke miru kídíelang, nom adír bipe emla gereppe ina takame delok yaamé koo delok kísape iyin daklangka, emla ngo míídung.”

³³ Rojade delo yagorupe ankíto. Bí luyab bedang delokke teyolok pírtek delo resala yagorupe kapto. Resaadula bí kapto, “E Absalom ngok ua, ngok ua, ngok oo Absaloma; nok ayanpe ngo situamílo, ngok ua, Absalom ngok ua.”