2 SAMUEL 17 - DEENA BAIBÉL (BSI)

Absalomme Hushai ke Imemboname

¹ Delok teyoloteng, Ahithopel Absalom me poto, “Ngom jarying kola jarnyiko amiem ullenla, siyum Dabid me mamín gedope imolangka.

² Ngo bíme apééla, delokke míímésula duudungem mimakpe iayé. Bí delo yagorupe pesola, bík ami takame dugyinyéku. Ngo roja petomem petpala,

³ bík ami takamem ménge milolo aalat sukunam kísape, nokkíng boma biyinyéku. No ami atel petomko petpe míídung, abíd ami kídíde aipe duuyé.”

⁴ Sikepe ponamsi Absalom kepelang Israel lok miro kídíke mííbanampe ito.

⁵ Delo Absalom poto, “Arkit ami Hushai meteng gogato, bík popenam emteng tatkílape.”

⁶ Edílo Hushai Absalom kíng aatodín, delo Absalom poto, “Sikepe moko Ahithopel bí ngolum poyildune. Ngolu sim igepía? Demangke no ngolum ipenamem pobilangka.”

⁷ Hushai poyansuto, “So legang porum so Ahithopel ke pobinam si aimang.

⁸ No kénsudung, nok abu elang bík ami kídíe miga-miramdung, delokke bulu nganga rotbín binam martana situm ane kísa migadung. Nok abue kényit-kaayitsuna sipayíng ko; delokke bí yuem bík ami kídílo lekope duubosumang.

⁹ Supak pakkom bí bupík kolo, demangkom abíd moolop kolo rusisula duudupe. Dabid bí kerape mimak iyang gela, séko dem tatyédín, ‘Bulu Absalom ke ami kídíem ikumto,’ emla poyé.

¹⁰ Dekepe iyém simyo kísape pesomana miram eteng pesoyé. Kapeila, Israel takame nok abuem sipaying aina kope, delokke bík ami kídíem miga-miramne emla kényindung.

¹¹ Dekepeila, ngo nom luyildung, Danlok ila Beersheba loope, siyéng robeng lok sulli kísa idope, amongsok Israel ami takamem gogdumsula mimaklo no migísupe enbotoka.

¹² Ngolu Dabid me bík dungkolok malenla, bí legang sim kénmang adape, bím mimak iabomlape. Bí agísue lang bík ami kídíe sékoteng turpe aimang.

¹³ Doolung kolo duksi angge yémílo, ngoluke ami kídíe sotkya bomala doolung dem, yiibe belo solík líkyamyé. Elíng atel koteng dííte teyong delo doomoyimayé.”

¹⁴ Absalom lang takam Israel ami kídarde poto, “Hushai ke luyil si Ahithopelkem aiyado.” Ruutum bí, Absalom ke teyolo gérmange aadope, Ahithopel ke luyilem tatmomadope ruuto.

Dabid me Lutorla Bík Duksisuname

¹⁵ Delo Hushai bí miri Jadok melang Abiathar bínyime Absalom melang, Israel lok miro kídíem bík luyil emlang Ahithopel ke luyil binamem pobito.

¹⁶ Hushai potemdola poto, “Menape ilangka, yépol mooruk elokke pígo elo siyoh duumape, Jordanem bím lang bík ami kídíem umla petmadope, menape koodope, Dabid me pobipena kotokiko melík langka.”

¹⁷ Jonathan lang Ahimaaj bínyi Jirusalem lok ampenglo duuna, Enrogel doolunglo duuyadungai. Bínyi so, doolunglo kangko sugotla duuto, delokke béérang mime kooko legí-sigang takamem bínyim pobidungai, delokke bínyi dem Dabid rojame pobidungkuai.

¹⁸ Idola longeko milokong koo kone ratagem bínyim kaala, Absalom me pobitoku; dekepeila bínyi Bahurim doolung lokke ami ekum kolo menape duksigeto. Duksisuko ekum ampeng delo asi déérungko kadungai, bínyi delo oila duusisuto.

¹⁹ Asi déérung nappangdem ami delokke mimede pokapla, pokapko teyodelo ali-ayélok dolotpe lokapto.

²⁰ Absalom ke ami kídíe ekum delo aala ííto, “Íngkolo Ahimaaj lang Jonathan bínyi.” Mimede bulum poyansuto, “Bínyi asi korongem koongkaku.” Ami kídíde matakíto, idola séko meteng paamala, Jirusalempe gílatsutoku.

²¹ Buluke gírongkuem Ahimaaj lang Jonathan asi déérung delok luyulo lenlangkula, gíla Dabid rojame pokan bitoku. Bínyi bím poto, “Menape gílenla, korong sim kootoka. Kapeila Ahithopel bí sikepe mirupe ila poyildung.”

²² Dekepeila, Dabidla bíkkíng yémín gena ami takame gílenla, Jordanem kooto. Roh rokom dem mipil-miyongpe Jordan korongem kooyinto.

²³ Edílo Ahithopel bí bík luyilem igemanamem kaatodín, delo bí gadolo duupuem leelíkla, agí ekum dungko doolungpe entoku. Bí agí ekumem aipe kaayin-tatyin líkpala, agíem ogsulsula sikai. Dekepe, bí sila bík abu agolo bím yuto.

²⁴ Absalom lang bíkkíng yémín gena ami takame Jordan korongem kooyindodem, Dabid Mahanaim luunelo píngaato.

²⁵ Joab ke ayanpe, Absalom bí Amasa me maglíng teyolo ruutumpe ilíkto. Amasa bí Israel ami Jether ke ue, bík ane Abigail, bí Nahash ke ome delokke Joab ke ane Jeruiah ke bírme.

²⁶ Absalom lang bík ami kídíe Gileadlo notko ila duuto.

²⁷ Edílo Mahanaimlo Dabid píítodín, delo bíme Ammon lok doolung Rabbahlo duuna Nahash ke oo Shobi lang, Lodebar lok Ammiel ke oo Makir, delokke Gilead lok Rogelim doolunglo duuna Barjillai bulu kaaríksula,

²⁸ ege-ippu, egug kídí delo apim-oying keenyunana lok bomabito. Bulu géhu, ayag, moidang delo mureenam ayé, péron amí delokke daal,

²⁹ ngutlang delo dohi, mér delokke gakírlok panir em, Dabid melang bík ami kídíe dodope bomabito. Kapeila bulu yépol mooruklo enla Dabid lang bík ami kídíe kenodung emla kénto.