2 SAMUEL 16 - DEENA BAIBÉL (BSI)

Dabid lang Jiba

¹ Dabid ke dííte attíng delok anyongko gíbong dodem, Mephibosheth ke béérang Jiba, gado annyi kolo, líínyiko burla goona ettíngem, língko abengko onggur arenamem, anípakpe pílnam siipí-siiyé língko abengko, delokke soyo nyogon kolo onggur alang bíínako gedola, Dabid me kaaríksuto.

² Dabid roja bím ííto, “Deke delok no íngko koda inayéne?” Jiba poyansuto, “Gado kídíso nok erang kídíe duula ennadope, ettíng kídí sila ayé kídísi nok ami kídí sok dopenampe, delokke bulu yépol moorukso enla apééyém tíídope onggur alang sim bidung.”

³ “Íngkolo nok ato Saul ke oten Mephibosheth bí?” emla rojade bím ííto. “Bí Jirusalem lo duudung,” Jiba poyansuto. “Kapeila bí Israel ami kídare, supak bík buku Saul ke amongem bím biyéku emla peebe sudung.”

⁴ Delo Jiba me rojade poto, “Mephibosheth ke ekurang takamde nokke.” Delo Jiba poyansuto, “Ngo nokke béérange, delokke agínpe ngo nok keralo kaabang-tatbang daklangka.”

Dabid lang Shimei

⁵ Edílo roja Dabid Bahurimlo píítodín, delo Saul ke ali-atod lok ako, Gera ke oo Shimei, bím kaaríksupe gílenla, bík teyolo béélíkdola aato.

⁶ Dabid me lakké lakbíkpe bík sipaying kídíe gargoobom lateng, Shimei bí Dabid melang bík béérang kídíem elínglok geto.

⁷ Shimei béélíkdola poto, “Sokke gílangkuka, mokana no. Sokke gílangkuka, mirulno.

⁸ No Saul ke amongem laato. Dekepeila, supak nokke teyolo Ruutum bí Saul ke erangem no bojéko petbinam edoem radungku. Ruutum bí amongem nok oo Absalom kíng bito. Delokke no petna no, nyokdak.”

⁹ Delo Jeruiah ke oo Abishai rojadem poto, “Si sina ekii si kapeila ngok roja ruutum em béélíkyéne? Ngome elo gíla bík dumpongem tepakdope imoi.”

¹⁰ Idola rojade poto, “E Jeruiah ke oo kídía, nolu so atí pomín gemapeka. Bí ngom Ruutum ke, ‘Dabid me béélík langka,’ emkolok béédumílo, séko deme, ‘Kape no sikepe idune?’ emlayéne.”

¹¹ Delo Dabid Abishai melang bík béérang takamem poto, “Ngok agí ue, ngom petpe emla idung; Si Benjamin ami si kape imayéne? Ruutum bí bím ngome béélíkdope ruulíktung; dekepeila, bím atí imapeka delokke bím pémotoka.

¹² Ruutum bí ngok imemem kaapala, siloke ngom béélíknam kídísok ayanpe ngok teyolo ainamem biyékupe.”

¹³ Dekepeila, Dabid lang bík ami kídíde bedang delok endan teteto. Shimei teng buluke arotkon delok, gídula béélíkla, elínglok gela kédéng kungkatla gíto.

¹⁴ Delo roja delang bík ami kídí takamde Jordanem píído delo adung-apééye yagorupe ila, delo bulu duupoto.

Absalomke Jirusalemlo Roja Doname

¹⁵ Absalom lang bíkkíng yémín gena ami kídíde, Jirusalemlo gíato, bulukelo Ahithopel teng kato.

¹⁶ Edílo Dabid ke míídíí sulíknam angong Hushaibí Absalom me kaarík sutodín, delo bí, “Roje turyar daklangka. Roje turyar daklangka,” emla gokto.

¹⁷ Delo Absalom Hushai me ííto, “Siya nok angongem ayang lengkan suname? Kapeda no nok angonglo lekope enmín gemane?”

¹⁸ Hushai poyansuto, “Kape kísa ngo depe iyén? Ngo Ruutum ke delokke sok ami kídí sokkelang takam Israel ami kídílok ullensunam kepemin doodune. Ngo nokkíng duumín geyé.

¹⁹ Delokke ngo séko kepeda agérem gérbipen? Kape ngo oo kepe agér ibimayénía? Kape kísadín ngo nok abuem agér gérbitone, dekepe nomte ngo agérem gérbiyé.”

²⁰ Absalom Ahithopel me poto, “Supak íngkona agérko idope no ngolum poyilyéne?”

²¹ Ahithopel poyansuto, “Nok abuke ekumem kaabom dope menam éésiri kídarem gíla no ketbo sulangka, delo takam Israele nok abue, nom mirupe míngkai emla kénla, nokkíng gímín gena kídíe edííyayé.”

²² Dekepeila, bulu roja ekum delokke teyolo tombuko sola, ami takam kangkolo Absalom bí tombu delo gíala, agí abulok éésiri kídarem ketboyinto.

²³ Delokke, delo longe delo Ahithopelke poyil-luyilnamem, Shédíke agí agom bínam kísape mííla toríksudungai; dekepe Dabid lang Absalom bínyi Ahithopel ke luyilem igeto.