2 SAMUEL 14 - DEENA BAIBÉL (BSI)

Absalom me Aalatsudokupe Joabke Iname

¹ Dabid roja bí Absalom me yagorupe ankídung emla Joab bí kénla,

² Tekoalo duuna ségu-siang kénna mimeko tomto. Bík píírodem, Joab bím poto, “No ankí-kenodung emla irutoka; delokke nokke ankí-keno egeme gela dumíd emteng tubsumapeka. Deddína longe lokkai ankíla duuna mime kísape belenge ilangka.

³ Delo gíla rojaem ngok políknampe polangka.” Delo Joab popenam agomem mime delo políkto.

⁴ Edílo Tekoa lok mimede roja delo aatodín, delo bí migmue amongpe ila roja keradelo mínggedola gubala poto, “E roja ngom igul langka.”

⁵ Delo rojade bím íngkíto, “No íngkuem adír bomdun?” Bí poyansuto, “Ngo opan meyéngko. Ngok milue sikai.

⁶ Nok béérang si oo annyiko katuai, longe konem bínyi aríklo momínsula; bínyim atí iyana kamape ikolok akone akondem mokato.

⁷ Dekepeila supak, erang takame nok béérang sim marbomla, bulu podung, ‘Agí bíroem mokasunadem ngolum bilangka, ngolu bím bík pettonam bíro delokke edoem ralíkyéku.’ Dekepe bulu imílo ngo oo atel koteng kaimayé. Dekepe bulu ngok míídíng sulíkko atelem inyokbila, ngok milolok amíne duudope oo atel koteng kaimayé.”

⁸ Delo rojade mime dem poto, “Nok ekumlo gílangkuka. Delokke ngo nok pobisunam sim kaabiyé.”

⁹ Delo Tekoa lokke mimede rojadem poto, “No ngok legape íngkoko ibidokom, loorímangem ngok erang elang ngo togedung. Nokkíng lang nok erang teyolo de kamayé.”

¹⁰ Rojade poyansuto, “Nom lurít-porítna kayémílo, bím ngokke so bomalangka, delo bí nom edílokom adír bimayé.”

¹¹ Delo mimede poto, “Ruutum nokke Shédíke amínlok pésula, iyyi edorakupe ina kídarem botteyape imem momape, ngok uem moka bimadope pésudope, kumdung.” Dabid poto, “Ngo turyarna Ruutumke amín lok pésudung; nok oo lok dumíd-mídyong atel koteng amonglo oletmayé.”

¹² Delo mimede potoku, “Nok béérang mime ngom, ngok ruutum, roja em gomtelko pomodope rogudung.” Bí, “Polangka,” emla poyansuto.

¹³ Dekepeila mimede poto, “Demílo no kape Shédíke ami kídí teyolo botterupe sikepe imemlíkkan. Nok kebang pokolok no agísu teyolo ajéng ilíksudung. Kapeila no dugnyokna agí ueme ekumlo aamokumang.

¹⁴ Ngolu takame siyérung. Ngolu amonglo asi purpaknamem lekoda laasi layimanam kísa idung. Idola Shédíbí turnamem laapakmang. Igeyéla, bík monpaknam kídarem bíkke lok mepak ayarmadopemin bedang matadune.

¹⁵ Supak ngo sim ngok ruutum, ngok roja kelo pope emla aadung. Kapeila ami kídare ngome pesomoto; nok béérang mime si míísuto, ‘Ngo ngok rojaem posuyé, kapeila bí ngok ponamem tatbiyépe.

¹⁶ Kapeila, rojade tatbila bík béérangem lang bík uem Shédíke among binamlo mokape aapena ami kídarke alaglok mopítyé.’

¹⁷ Delokke nok béérang mimesi mííto, ‘Ngok ruutum, ngok rojake agome ngom apéémoyé,’ kapeila ngok roja, ngok ruutum bí ai-aimangem kénpansuna Shédíke kotoki kísane. Ruutum nokke Shédí bí nokkíng yémín geyar daklangka.”

¹⁸ Delo rojade mimedem poyansuto, “Ngok íngkípenam sok no atí koteng rumsupmapeka.” Delo mimede poto, “Ngok ruutum, ngok roja no íngkídaklangka.”

¹⁹ Rojade pokai, “Nok inam-ponam takam sim Joab bí polík manaya?” Mimede poyan sudola poto, “Nok turnam lok pésudola podung. Sékokom nok potonam delokke lakbíkpe demangkom lakkédanpe pelpé sulamang. Aropekom Joab min ngom pope-ipenam takamem poyil-luyil líktone.

²⁰ Idola bí sim takam sim jondokupe min itone. Idokom, ngok ruutum kíng Shédíke kotoki kísape among takamso inam kídíem kénnana kénname kadung.”

²¹ Delok rongem rojade Joab me poto, “Airudo, ngo dekepe iyé. Gíla yaamé koo Absalom me bomalangkuka.”

²² Delo Joab gubdola rojadem kumsudola bík teyolo utepooroem políkla poto, “Silo nok béérang ngo, ngok ruutum roja keralo nokke mííbanamem kaasuto; kapeila no nokke béérang lok rogunamem tatbito.”

²³ Dekepeila, Joab gerepla gíla, Geshur lok Absalom me Jirusalemlo bomatoku.

²⁴ Delo rojade poto, “Bím bík agí ekumlo duungu sumolangka. Bí ngok keralo aape aimang.” Dekepe Absalom agí ekumlo duungusula, roja keranglo aamato.

Absalomke Dabidkíng Yérík-dakrík Bosukuname

²⁵ Israel aralo Absalom kísape amíl-amo kaabangna, yidpeyanam kamato; bí alelok ila dumpong loope atí take-tare kamato.

²⁶ Delo edílo bík dumpong dumídem ngísududín, (kapeila bí dítak gíyinlo dumíde tebegla iyém ngísudungai,) bík ngísunam dumídem kíyém rojalok kínanalo kilogram annyiko idungai.

²⁷ Absalom ke oo angum kola, Tamar emnam ome atel ko kato. Tamar bí yagorupe kampona mimekuai.

²⁸ Dekepe Absalom Jirusalemlo taknyiko apíngpe, rojadelo aamape duuto.

²⁹ Delo Absalom, Joab me bík legape rojalo gíbodope tommoto; idola Joab bí aamato. Delo bí lennyinape tomtoku, idola deloteng Joab bí aamato.

³⁰ Delo bí bíkke béérang kídíem poto, “Kaatoka, Joab ke aríge ngok kékonlo kadung. Delo ayage kadung. Gíla dem emepe rílík bilangka.” Dekepe ila, Absalom ke béérang kídíde aríkdem emepe rílíkbito.

³¹ Delo Joab gerepla, Absalom ke ekumlo gíala bím poto, “Kape no nok béérang kídíem ngok arígem emepe rílíkmokan?”

³² Absalom Joab me poyansuto, “Kapeila, ngok tomnamem no tatmape aabimato. Ngo nom ngok legape rojalo gíla, ‘Ngo íngko legape Geshur lok so aadungkune? Ngok kepe elo duunam de aiyatuai,’ emla pobidopemin tomtuane. Deke legape supak, ngom roja keralo gíamoi, delokke ngokkelo imemko kayémílo, bí ngom petdak langka.”

³³ Delo Joab rojalo gíla, bím pokanbito; delo rojade Absalom me gogaato. Dekepeila, bí roja kerang delo aala, mikmue amongdanpe ila roja kerang delo gubaato; delokke rojade Absalom me mumpupto.