2 SAMUEL 13 - DEENA BAIBÉL (BSI)

Amnon lang Tamar

¹ Dabid ke oo Absalom bí, Tamar emnam kamporuna bírme ko kadungai. Bíkkelo Dabid ke oo kon Amnon bí aang olíkla yagorupe mííba dungai.

² Amnon bí Tamar me yagorupe míngkolok amíle kibomsuto. Kapeila, Tamar me paape ikanmato, legade bí letel koteng milo kénrík sukímanape ila, bím milokongem kaarík sumomadungai.

³ Idola, bí Dabid ke bíro Shammah ke oo Jonadab emnam ségu kanarung angongko kato.

⁴ Jonadab Amnon me ííto, “No roja lokke oope idola, kapeda no longe koyayang adír yayang ikan? Ngom no posumayénía?” Amnon bím poyansuto, “Ngo ngok bíro Absalomke bírme, Tamar kelo aang olíkkai.”

⁵ Jonadab Amnon me poto, “No ketkolo ketdola kirutoka, delo edílo nok abue nom kangayédín, delo bím ‘Ngok bírme Tamar me aamola, ngom dodope ettíngem bimola, ngok keraso apimem monyula, ngo dem kaasula, bík alaglok dodope bím melíkbi,’ emla potoka.”

⁶ Dekepeila, Amnon kirula ketto. Delo edílo Dabid roja bím kaape aatodín, delo Amnon roja dem poto, “Ngo nom rogudung, ngok bírme Tamar me so aala, ngok kaasuko kerangso ngom kék amanlok ibila, delokke bí agísue ngom bidope aamotoi.”

⁷ Dekepeila, Dabid roja ekum delo Tamarme podope sikepe agomem políkto: “Nok bíro Amnon ke ekumlo gíla, bík legape dopenamem inyu-sanyu bilangka.”

⁸ Dekepe bí bík bíro Amnon ke kila ketruko ekum delo aato. Bí ettíng lok nííla, delokke bí Amnon ke kangko delo kék aman eke ibila pamnyu bito.

⁹ Delo Tamar pamnyunana delok bík kerang delo laalen langkula, bím dodope bito. Idola Amnon domayé emto. Delo Amnon poto, “Takam em ngokkelok mooteng moto.” Dekepeila, takame luuyupe bím mela lentoku.

¹⁰ Delo Amnon Tamarme poto, “Dopenamem ngok ketkoso nok alaglok dodope bomabi.” Delo Tamar bík inyunam kék aman dem bomala, bík bíro Amnonke ketko delo bomabito.

¹¹ Idola edílo Tamar dekedem Amnon ke ampeng delo dodope bomatodín, bí Tamar ke alagem gagdola poto, “Aatola, ngokkíng ketbo sutola, ngok bírme.”

¹² Tamar bím poyansuto, “Ma, ngok bírua, ngok teyolo sikepe imapeka. Kapeila, sikena agérem Israel amonglo ikímang; sikena belumna agérem mide kísape imapeka.

¹³ Ngokkepe, ngok annyingem íngkolo ngo melík suyéne? Nokke supeteng, no Israel aranglo belumnam agérem mide amie inalok akonpe iyé. Dekepeila supak ngo nom rogudung, rojeme lupo sutoka; bí edílokom ngom nome bimape imayé.”

¹⁴ Idola bí bíkke ponamem tatbimato. Delokke Tamar me bí ralyala, bí bím ketbola ipusilééto.

¹⁵ Delo Amnon bí Tamar me yagorupe kangkilenla, bím kerape edítkodín mííbatuane dem penem pakyape kangkitoku. Delo Amnon bím poto, “Gerepla sokke gíkaku.”

¹⁶ Idola Tamar bím poto, “Ma, ngok bírua, ngom monpak kunam si, supakke ngok teyolo itonam empemílo loorímayayé.” Idola bí dem atí tatbimato.

¹⁷ Amnon bík agí atek béérang dem tomla, “Sim mime sim ngok kerasok laapakla, eyabem bím melenpala sitkapto,” emlíkto.

¹⁸ Tamar bí milo kénkímana, roja ome kídí gedongpe laklup kala bodongna egeko gedungai. Dekepeila, Amnon ke kerang loge bím sopak langkula eyabdem sittumto.

¹⁹ Delo Tamar bík dumponglo metbu nyolíksula, bík bodongna ege genamdem bétkésula, alag annyie mikmoem pokapsula yagorupe ulo jérla kapla delok gítoku.

²⁰ Edílo bík bíro Absalom bí bím kaatodín, bí ííto, “Amnon bí nom ipusiléétonía? Ngok bírmía, sikepe inam sim no adírpe míítímapeka. Bí nok bírosue, dekepeila, sim legang sim séko meteng pomapeka.” Dekepe Tamar bí Absalom ke ekumlo adírla ankína mimepe duuto.

²¹ Edílo roja Dabid bí legang sim tattodín, delo bí yagorupe marto.

²² Delo Absalom bí Amnonme, bíkke bírme me yééla ipusiléé binam legape yagorupe kangkito. Dekepeila, bí Amnon me atí lupo-manmo kabo suyimato.

Absalom ke Edorakuname

²³ Taknyi méélam delo, Absalom bík mér amídem ngíkumpe, Ephraim lok amonglo duuna Balhajar amonglo iduem, bí rojalok oo kídí takamem dobo tomto.

²⁴ Delo Absalom roja delo aala poto, “Kangkí bika, nok béérang si bík mér amídem ngípem idung. Iname, roja nolang nok béérang kídíe nok béérang so lekope írgangpe imín getoi.”

²⁵ Idola rojade Absalom me poyansuto, “Ma, ngok ua, ngolu takame gímamílo aiyé. Kapeila, de nom sulamomape ipelo.” Absalom rojadem rogu gugaptuai, idola bí gímadokom bík utepooroem bilíkto.

²⁶ Delo Absalom poto, “Demílo, ngok bíro Amnon me ngolukíng gímotoi.” Delo rojade bím ííto, “Bí kape nokkíng gímínpen?”

²⁷ Idola Absalom Amnon melang, takam roja oo kídídem melíkrudope rogu-gugap lento.

²⁸ Delo Absalom bík béérang kídídem lulíkto, “Amnon bí yagorupe apong tííla sédukyém kaabomlangka, delo edílo ngo políkyédí, delo bíme mokalangka.”

²⁹ Dekepeila, béérang kídíde Amnon ke teyolo Absalom ke lulík nampe ito. Delo roja oo kídí takamde gerepla agí-agí kossorlo resala dugyintoku.

³⁰ Buluke bedanglo dugdungkuem, Dabid me sikepe pobito, “Absalom bí roja oo kídí takamem petyinto, atel koteng turna kaimang!”

³¹ Delo rojade gerepla, agí egeme sérkésula, amonglo kedato. Delokke bík ampenglo dakna béérang takam deteng agí-agí egeme sérké suyinto.

³² Idola Dabid ke bíro Shammah ke oo Jonadab poto, “Ngok ruutuma, roja lok yaaména oo kídarem petyinto emla míímapeka. Kapeila Amnon petommin sikane. Delokke sim Absalom bí bík bírme Tamarme Amnon ke ipusiléé bido delokkai míílenbomla iname.

³³ Dekepeila, supak ngok ruutum, rojano aapílo rojalok oo kídí takame sikai emla míímapeka, kapeila Amnon petommin sikane.”

³⁴ Dekepe idudelo Absalom dugnyok geto. Delo sontori dakbomna yaamé koode Horonaim bedanglok dííte abe delok milungko aadope kaato. Delo bí gíla rojadem bík kaanamem pokan bito.

³⁵ Delo Jonadab rojadem poto, “Kaalangka, roja lok oo kídíe aadungkune; nok béérang lok ponam pakpe si dekepe ikai.”

³⁶ Bík poyinpak rongem, roja lok oo kídíde píílang kula, ulo gogla kapto, delo roja deteng, delokke bík béérang takam eteng yagorupe kapto.

³⁷ Idola Absalom duggela, Geshur lok roja, Ammihud ke oo Talmai kíng aato. Delokke Dabid bí bík oo legape deddína longeme ankí-kenola duuto.

³⁸ Dekepe Absalom dugnyokla Geshurlo dítak angumko duuto.

³⁹ Delo Dabid roja bí Absalom kíng gípe emla aange otoku; kapeila, Amnon ke sinam teyolo bík adíre eetetkaku.