2 SAMUEL 12 - DEENA BAIBÉL (BSI)

Nathanke Lunamelang Dabidke Bursukuname

¹ Delokrongem Ruutum bí Nathan me Dabid kíng melíkto. Bí Dabid kíng aala poto, “Doolung luune kolo ami annyiko katuai, akonde miremnako delokke akonde opannako.

² Miremna amide bojéko mér sobén elang taro kídíe kadungai.

³ Idola opanna ami kelo renam mérne ngangadem mela abídyang atí kamato. Dem bí usala, de bíkke lolang bík koo kídarlo lekope siirepla, bík donamlok dola, bík tíngkeng batilo tííla, delokke bík angkenglo ipla, mérde bíkke ome kísape idungai.

⁴ Delo ako miboko miremna delo aato, idola miremna amide agíke bomsunam taro kídílok mibodem dodope ibimape, opan ami delokke mérdem laabila, bíkkelo aana mibodem dodope monyubito.”

⁵ Delo Dabid bí yagorupe ami teyong delo marla, Nathan me poto, “Turna Ruutum ke amínlok ngo pésudung, séko sikepe itodí, de amide sipe aiyé.

⁶ Delokke bí mérem edítko laatodín delokke adu appiko biyankupe aiyé. Kapeila bí sikena ayang kamana agérem ito.”

⁷ Nathan Dabid me poto, “De amide nona. Ruutum Israel ke Shédíbí sikepe podung, ‘Ngo nom Israel teyolo rojape idope pídéla tosaklíkto, delokke ngo nom Saul ke alag lokteng mopítto.

⁸ Delokke ngo nom nok ruutumlok ekumem bila, bík mime kídar emteng nokkepe bito. Delokke, Israel kelang Judah ke ekum kídar emteng nom bito. Delokke si anyong domíloteng, ngo nom bojéyangko bitemyai.

⁹ Kape no Ruutum ke ngiitomem mepakla bík keranglo deemana agér ikane? No Hittit ami Uriah me yoksalok petla, bík mime me nok mimepe langkamto, delokke bím no Ammon kídíke yoksalok pakanato.

¹⁰ Dekepeila, supak kelok ila yoksa si nok ekumlok edílokom gílenmayé, kapeila no ngom mepakto, delokke Hittit ami Uriahke mime me nok mimepe laato.’

¹¹ Sikepe Ruutum bí podung, ‘Kaatola, ngo nok ekum-erang aralok ebínem lenmoyé, delokke nok amig keralok nok mime kídarem laala, nok kumríem biyé, delokke bí longe angunlo nok mime kídarem ketbosuyé.

¹² Kapeila, no sim pyoola ito, idola ngo sim agér sim Israel takam keranglo delokke longe popong idolo imoyé.’”

¹³ Dabid Nathan me poto, “Ngo Ruutum ke keralo paab ito.” Delo Nathan Dabid me poto, “Ruutum bí nok deemangem laapakto, no simayé.

¹⁴ Dekepe idokom, sok agér sok no Ruutum ke mirupe ipéésunam legape openam koode siyé.”

¹⁵ Delo Nathan agí ekumpe gítoku. Delo Ruutum, Uriah ke mime delok Dabid me obinam koo dem yagorupe kimoto.

Dabid ke Oo lok Siname

¹⁶ Dekepeila, Dabid Shédíme koo dem aimodokupe kumtíto. Bí doma-tíímape nyola, bí agíke pírteklo yoh rubuungem amonglo ketto.

¹⁷ Delokke bík ekum lokke miro kídare, bím among delok kiirep kupe emla ilateng bí gerep kumang, delokke bulu kíng dobopete sumang.

¹⁸ Hopta ko doorongem koo de sikai. Delo Dabid ke béérang kídíde bím koo delok sinamem pobipe pesoto; kapeila bulu poto, “Kaatola, koo delok turdung emteng, ngolu bím luposuyém bí ngolum poyansumato; demílo kapekísa ngolu bík koode sikai emla pobilayén. Bí agísuem loorímape isupelo.”

¹⁹ Idola edílo Dabid bí bík béérang kídídem posi-poro bosudope kaatodín, delo bí, “Koode sikanaya,” emla íngkíto. “E, bí sikai,” emla bulu poyansuto.

²⁰ Delo Dabid among delok gerep langkula, ursula, dumídem tupsula, bí egeem anguko pítlíksutoku. Delo bí Ruutum ke ekumlo gíla kumsuto. Edílo bí roja dungkeng ekum delo aatokudín, delo bí dopenam kola bulu langaabila bí doto-tíítoku.

²¹ “Ngolu sim míngkénmang,” emla bík béérang kídíe bím íngkíto. “Koo delokke turdungem no doma-tíímape nyola, kabbom-rííbomla ituai; idola koo delokke sirongem no gerepla apim-oying dokaku.”

²² Bí poyansuto, “E, ngo arope bík turdung adape nyola, kapla ito. Dem ngo Ruutum bí ngom ayangla koodem simo malangkom iyépe emla ito.

²³ Idola, koode supak sikai, demílo ngo kape nyola duuyén? Ngo bím turmo layékunía? Ngo mino bíkkíng longeko gíyékune, idola bí ngokkíng edílokom aalat sukumayé.”

Solomonme Oname

²⁴ Delo Dabid Bathsheba me aapí-aang edíng podíngto. Delokke bí Bathsheba me ketbo sulangkula bí oo ko otoku, dem Dabid bí Solomon emla amínem mínlíkto. Ruutum bí koo dem ayala,

²⁵ kaalu-kangorna Nathan me koo dem Jedidiah emla amínem mínlík langka emla lulígto. Kapeila Ruutum bí bím ayangto.

Dabidke Rabbah Doolungem Laaname

²⁶ Dekepe idungem Joab bí Ammon kídíke képitél Rabbah em mimak ibomtíla, delokke ikum tatato.

²⁷ Bí Dabid me kotokieke melíkla pobimotoku, “Ngo Rabbah em iyabomla sok asi leríngem laato.

²⁸ Supak nok abíd sipayingem laadumsula, doolung sim aabomla nokkepe laasulangka. Ngo ikumnam amínem gelímang.”

²⁹ Dekepeila Dabid sipaying kídarem laadumsula, Rabbah em iyabomla ikumto.

³⁰ Ammon kídíke uyu Molekke dumpong delok, Dabid bí uun dumlup kilogram íying angum kolang pilngo kope tebegna delo are kanarung elínge kalígla ina dem laato. Dabid dem laala, bík agí dumpong delo geto. Bí abíd ekurang emteng bojéko doolung delok lííla laato.

³¹ Delok ami kídarem korot agérlo, yokkín agérlo, egíng agérlo delokke itang pídope imoto. Bí dekepe Ammon lok abíd doolung kídí demteng imoto. Dekepe ipala, bí lang bík ami kídarde Jirusalempe gílatsutoku.