2 SAMUEL 11 - DEENA BAIBÉL (BSI)

Dabid lang Bathsheba

¹ Roja kídílok mimak ipe gídí dítaklok yélenlo, Dabid Joab kelo lekope bík béérang kídí emlang, takam Israel sipaying kídíem melíkto. Bulu gíla Ammon kídíem ikumpala, Rabbah luune em laato. Idola Dabid agísuedan Jirusalemlo duuto.

² Adeng konem, Dabid bík ketkolok gerepla, roja ekum delokke míílong delo gígoduem, ekum teyong delok dagdula bí mimeko ursudope kaato. Mimede kamporunakuai.

³ Dekepeila, Dabid tomlíkla, mime legangdem íngkímoto. Delo akonde pokai, “Si Eliam ke ome, Hittit ami Uriah ke mime Bathsheba mangía?”

⁴ Delo Dabid kotoki melíkla bím langaamoto. Bathsheba Dabid kíng aala, Dabid bíme ketbosuto. (Bathsheba agíem poolo deemang ikolok idéépak supala dungai.) Delokrongem Bathsheba ekumpe gílat sutoku.

⁵ Bí koo gela Dabid me, “Ngo koo ko gekai,” emla agomem políkto.

⁶ Dekepeila, Dabid Joab me, “Hittit ami Uriah me ngokkíng melík langkuka,” emla políkla Joab Dabid kíng Uriah me melíktoku.

⁷ Edílo Uriah bíkkíng aatodín, delo Dabid bím Joab kelang sipaying kídíke legangem delokke mimak ikolo edítkodín bulu kerangkane, deke legangem íngkíto.

⁸ Delokrongem, Dabid Uriah me poto, “Nok ekumpe tokkalangku, delokke nokke aleme arbín sutolangku.” Uriah bí roja ekum delok gílentoku, delo rojade bíme aman koteng bík méélam delo melíkmínto.

⁹ Idola Uriah bí agí ekumlo gíkumape roja ekum eyab delo rojalok abíd béérang kídíem lekope ibbosula ipto.

¹⁰ Edílo bulu, “Uriah agí ekumlo tokkumang,” emla Dabid me pobitodín delo, “No oolko yégoopala angkumanía? Kapeda no ekumlo enangkuman?” emla Dabid Uriah me ííto.

¹¹ Uriah Dabid me poyansuto, “Daapong Sonduge, delokke Israel elang Judah kídíe tombu kídílo duudung; delokke ngokke ruutum Joab lang ngok ruutumke béérang kídíe aríklo notko ila duudung. Dekepeila, kapekísa ngo agí ekumlo gílangkula, dola-tííla, delokke ngok méngem ketbosulayén? Nok amínlok pésudung, ngo edílokom dekepe imayé.”

¹² Delo Dabid Uriah me poto, “Siloteng no so duupo langka, delokke nyampo ngo nom enlat sumoyéku.” Dekepeila, Uriah Jirusalemlo delo longe delolang longekon demteng duuto.

¹³ Dabid ke dobo tomkolok bí bík keralo dola-tííla ito. Delokke Dabid bí bím tíngír sudope ito. Idola yumedem Uriah agí ekumpe gíkumape, bík ruutumke béérang kídílo lekope bík ketkolo iptoku.

¹⁴ Rodem Dabid Joab me shitiko atla Uriah ke alaglo melíktoku.

¹⁵ Delo sikepe atto: “Uriah me miru kídíke ralya yalumko delo daggemolangka. Delo bím petom mela ngétlat sulangkula, bím simolangka.”

¹⁶ Delo Joab bí luune dem bík aralo laape emla idodem, bí Uriah me miru lokke ralna ami kakolo melíkto.

¹⁷ Delo luune delokke ami kídíe lenla Joab me imínsula, sina kídí delo Dabid ke béérang eketeng sikai. Hittit ami Uriah meteng delo pakato.

¹⁸ Delo Joab Dabid me mimak legí-sigangem pobidokupe dem sikepe poyilto,

¹⁹ “Edílo nolu rojame takam legí-sigangem poyin biyém,

²⁰ delo rojade marla, ‘Kape nolu doolung delo deddípe anínpe mimak iyangkan? Nolum bulu suppilok epugem aplík penamem kénsu manía?

²¹ Séko Gideon ke oo Abimelek me petton? Mime kone bím elíng kiipar kolok suppi teyolok gelíkla, Tebej lo gekamanía? Kape nolu suppi anínlokai gíala idune?’ emla nolum poyémílo nolu, ‘Nok Hittit béérang Uriahkom sikai,’ emla pobilangka.”

²² Dekepeila, kotokide gíla Dabid kíng aala, Joab ke bím pobilangka emla tomlíknamem poyinbito.

²³ Kotokide Dabid me, “Ami kídíde ngolum ikumbomla, luyu among kídí deloope ngolum monbomto. Idola ngolu bulum buluke dungko delokke eyab ampeng delokai ngolu monalíktoku.

²⁴ Delo epuk apna kídare nok béérang kídíem suppi delok aplen bomla, roja lok béérang anyongko sikai, delokke nok béérang Hittit ami Uriahte sikai,” emla pobito.

²⁵ Dabid kotoki dem poto, “No sikepe Joab me polangkuka, ‘Si legang si nom adír momapeka. Kapeila, sékodín mimaklo siyéne dem no edílokom polamang. Doolung teyonglo nokke mimak ibomnam dem pakyape eerla ibomla, delokke dem líípak langka.’ Delokke bím luer líklangka.”

²⁶ Edílo Uriahke mime bík milo Uriah bí sikai emla tattodín, delo bí bík milo legape ankíem kíto.

²⁷ Delo edílo ankí-agér kídíem iyintodín, Dabid bím langaadope melíkla bím bík ekumlo bomala, delo bí bíkke mimepe ila, oo ko bím obito. Idola, sikepe Dabid ke inam agér si Ruutum me aklímoto.