2 SAMUEL 1 - DEENA BAIBÉL (BSI)

Dabid ke Saul ke Sinamem Kénname

¹ Saul ke sirongem, Dabid bí Amalek kídíem ikum pala Jiklaglo loonyiko duuto.

² Longe kondem Saul ke notko delok yaaméko aato. Bíkke ankíem lengkan sunape, bí agí egem bétsula, tukku delo deemullok mollík supa. Bí dekepe ila, Dabid ke keralo míngge dola among delo gubaato.

³ Dabid bím ííto, “No íngkolok aadune?” “Ngo Israel kídíke notko elok dukpí sula aadung,” emla bí poyansuto.

⁴ “Kape ikan dem ngom pobitola,” emla Dabid bím ííto. Bí poyan sula pokai, “Ngoluke sipaying kídíe mimak ikolok dukyin gekaku, delokke ngoluke amiem bojéko petpakto. Saul lang bík oo Jonathan bínyite sikai.”

⁵ “No kape kísa Saul lang Jonathan bínyite sikai emla kénkan?” emla Dabid íngkíto.

⁶ Bí poyansuto, “Ngo Gilboa díítum elo gíla ine, Saul me bík gínínglo tabda sudope kaato, delokke miru kídíke mimak guré-gaari elang, guré teyolo duula miru kídíe bík anín delo píínín aabomdo. Delo Saul bí ngokkíng migmue idola ngom kaapala gogla, delo ngo ‘Kape ruutum?’ emla poyan suto.

^7-8 Bí ngom, ‘Séko no?’ emkolok ngo bím, ‘Ngo Amalek amiko,’ emla pobisuto.

⁹ Delo bí pokai, ‘So aala ngome pettoi, ngome yagorupe tarí iket tung, delokke ngo sidakbong.’

¹⁰ Dekepe ila ngo gíla bím pakato, kapeila, ngo bím oyéme siyérung emla kénto. Dekepe ipala ngo bík roja dumlup dem bík dumpong delok pítbínla, ruutum nok keraso sina ngo boma bidune.”

¹¹ Dabid yagorupe ankílok agí galuk eme bétsuto, delokke bík ami takam ete depe imín geto.

¹² Bulu yagorupe míídírla, ankí-kenola, yume deloope Saul kelang Jonathan, delokke Israel takamke legape nyoto. Kapeila Ruutum ke amiem mimak delo petto.

¹³ Dabid, legang sim pobina yaamé koo dem íngkíto, “No ingko lokke?” Bí poyansuto, “Ngo Amalek amiko, idola ngo nok among so duudung.”

¹⁴ Dabid bím ííto, “No kape kísape míílai, Ruutum ke tosak sunam rojem petkane?”

¹⁵ Delo Dabid bík ami konem gogla, “Bím pakato,” emla lulíkto. Amide Amalek amidem sidope payamto.

¹⁶ Delo Dabid Amalek amidem poto, “No sim agí dai sim, agí tukku teyolo agísue laalík suto. No Ruutum ke ullen sunam rojem petto emsula agísuem loorímape emsuto.”

Saul Kelang Jonathan ke Legape Dabid ke Pengé Mirie

¹⁷ Dabid sim ankí miri sim, Saul kelang bík oo Jonathanke legape lula,

¹⁸ sim miri sim Judah ami kídíem luyil dope lulígto. (Sim Jasarke kitablo attung.)

¹⁹ “Israel lok díítelo ngoluke ruutum kídíe sido, ngoluke miram yalumna sipaying kídíe oletkai.

²⁰ Sim Gath lo gogying mapeka, delokke Ashkelon lok bene-bepong loteng pomapeka. Philistain mime kídíem ashéng momapeka, uyu kumsuna ome kídíem ríngge momapeka.

²¹ “Gilboa díítum teyolo pedong elang tangare olík madakyika; sok among kídíe ereng abung dakyika; kapeila miram kídíke tamkung kídare, so annyingrupe doodung. Saul ke tamkung emteng téllok arbín yimang.

²² “Jonathan ke iyyide simonape ila, Saul ke yoksade ayang kamanape ila, miram kídíem mokala miru kídíem petpakto.

²³ “Saul lang Jonathan, edítko ayang bosutuan. Turdung emteng lekope, sido kuemteng lekope, bínyi pemí kídíem beréyala, myomur simyo kídíemte ralyato.

²⁴ “Israel lok mime kídía, Saul kepe ankítola. Bí nom gaina egem gemotuai, delokke are kana loklang uunlok leemotuai.

²⁵ “Miramna sipaying kídíe oletkai, bulum mimak ikolo petto. Jonathan dííte teyolo sila keddo.”

²⁶ “Ngok bíro Jonathan; ngo nok legape ankídung; nom edítko ngo mííbadungan; nokke ngok teyolo ayanamem míngkén manampe ila, mime kídílok ayang emteng pakyatuai.”

²⁷ “Miramna sipaying kídíe oletkai, buluke mimak ekurang kídíem, mepakla agér kaimang.”