2 ODONG 8 - DEENA BAIBÉL (BSI)

Solomonke Angukon Agér-anam Kídíe

¹ Solomon Kumkeng Ekum emlang bíkke agíke ekumem takying annyi aralo moyinto.

² Hiram rojake bíme doolung binam emte gairupe ipalangkula Israel ami kídarem duumotoku.

³ Delokrodem bí Hamath delo Jobah among kídí demte langkamto.

⁴ Yépol mooruklo duuna Tadmor doolung demte bí gairupe ibotoku, delokke atí tabungem mekeng kídarem Hamath lokke luune kídarlo ilíktoku.

⁵ Línggíng danlok Beth Horon, delo sokkodanke Beth Horon doolungdem miru kídíeteng aalamadope edíírupe língkum ekum kumgoosula yabgoemte depe bí iyin líkto.

⁶ Sok kísape Solomon bí Balath doolung emteng, tabung bíkke atí-sirí mekumko doolung kídarem, guré-gaari meko, delokke guré-gaariem dugbona ami dungko kídar tabung, edítko Solomon bí ilíkpe míítuadín, Lebanonlo, Jirusalemlo, delokke bíkke rumkínglo duuna doolung tabungem dekepei iyinlíkto.

⁷ Israel ami mangeke, buluke dungkolo duumín geneke kato. De ami kídíde Kanaan amieke, Israel opínde bulum petmape meto, abídde dunyok gekai. Bulu Hittit, Amorit, Perijjit, Hibit delokke Jebus opín kídar lokke.

⁸ Solomon roja sim ami kídí sim abílpe bomdula agér gértí motuai. Supak loopeteng sikepei idung.

⁹ Israel ami kídídem abíd agérlo imomape igeyéla, mimak ina amipe ilíkto. Bulum guré-gaari kídarem kaabomdope, gaariem dukbomna ami kídíke ruutumpe, delokke abíd sipaying lokke ruutumpe ilíkto.

¹⁰ Líínyi kolang íying pilngo amiko Solomon rojake agér gérnaem kaadung-kaatok dope lulíkto.

¹¹ Solomon bí Pharaoh rojake omem Dabid rojake doolung loge bomalangkula, bíkke legape Solomonke morung binam ekum delo aabotoku. Delo bí manto, “Israel lokke Dabid rojake ekum delo ngokke mime duupe aimang, legade Daapong Sonduk dungko moolopde deenarung moolobe.”

¹² Kumkeng Ekum delokke kerangdanlo molíknam runggu merom delo Solomon bí bíkke romnam amanem bilíkto.

¹³ Adeng-ape mipílo aman birum-birumem Mosike ayon mebonampe bito, de adeng-ape kídíde Sabbath, Aní Poolo, delo dítaklo lengumpe inam doman-tííman, siiyé líkmanam ettíngem doman-tííman adeng-ape kídíe.

¹⁴ Bíkke abu Dabid rojake ikor-siyor mebonam lok agérem gérmín geto. Solomon bí miri írne kídar emteng agér igape orpan sulíkto, delokke Lebi kídar emteng miri lukolo bulum igul dope longe agérlo bulum orlíkto. Bí eyab mipílo dagbompena emteng orngu suyinlíkto, legade sikesi Shédíke ami Dabid rojake ullík lok ilíknam kuai.

¹⁵ Murkongem idu-satok delokke miri írne lang Lebi kídare íngkona agérko ipe aiyén de rojake lulígnampe idungai, tatmape ikímang.

¹⁶ Solomonke agérem edílokke longelo Kumkeng Ekum mopeko moolop dem isak líktodín, delok longe delok gérlenla iyin loope gérlíkto. Delok rongem Shédíke ekumdem mopíí píílíto.

¹⁷ Delok rongem Solomon bí Ejion Geber lolang Elothlo gíto. Sikesi Edom among lokke siyéng robenglo duuna doolungeke.

¹⁸ Delo Hiram bí siyénglo gípeko kénna bíkke agí rumkínglo yéna migomeke asi jajilok Solomon kíng melíkto. Delo Solomon ke béérang eketeng gítaksula Ophir amonglo aato. Bulu 450 ko gairuna uun eke bomang langkula, Solomonme bitoku. Deme bekkíname 15,000 kilogramko ido.