2 ODONG 7 - DEENA BAIBÉL (BSI)

Kumkeng Ekumem Tolíksuname

¹ Solomon rojake sikepe kumsu suyinpak delo, emeko teyong among lok otokla romnam aman delo abíd aman kídar emte guyin bomkai, delo Kumkeng Ekum delo Shédíke angune bíísét bomkai.

² Arang delo Shédíke angune bíísétnam legape miri írne kídí deteng ekum delo aalayimape ito.

³ Edílo tabung Israel ami kídíde eme demlang Shédíke angun dem Kumkeng Ekum teyonglo kaatodín, delo bulu bedang agéplo amie gídope píonnam delo dumponge amongpe ila pelang dola, kumsudola Shédíme yidgeto, “Bí airunako; bík ayange yénamke duuyaryé.”

⁴ Delo roja delang tabung ami kídíde Ruutumke keralo amanem bisak líkto.

⁵ Roja Solomon amanpe gooru 22,000 ko, delokke mér sobénem 120,000 ko palíkto. Sikepe bí lang tabung ami kídíde Kumkeng Ekumdem Shédíme tolíkto.

⁶ Miri kídíde bulum parlíkko moolop kídí delo dagrepto, delokke bulum ngééríksula Lébi kídíde, bulum Dabid rojake mobinam tapung kídílok Ruutum me yitgela, “Bík ayangde duuyarne,” emla Dabidke bulum lulígnampe miripe lugeto. Ami takame dagdungem miri kídíde bikulem mutto.

⁷ Delo Solomon roja Kumkeng Ekum delokke kerangdan delo duuna kebang bangko delokke raadang dem tolíkto, delo romnam aman, ashéng aman, oobem romnam, delo ali-ayé romnam amanem bilíkto. Bí sim agér sim so ilíknam legade bíkke pitol loge runggu merom pínamde sim romlíknam aman sim aayin peko kamang kolok ito.

⁸ Depe ido delo Solomon, delokke Israel ami tabunge doman-tííman adeng-apeko longe kíníd kope ibomto. Deddína milunge gídum suto. Línggíng danlok Hamath among loge ilangalang Ijipt lokke sokko duurí loge ami kídíde aato.

⁹ Longe píínyi delo bulu dumsuko itoku, kapeila bulu runggu merom kumlík legape longe kínídko, delokke longe kíníd konko doman-tííman adeng-ape legape loodumto.

¹⁰ Poolo kíníd lokke looying annyi kolang longum nana longe delo tabung ami kídardem Solomon roja bí agí dungko danpe gíyin motoku. Bulu tabung Shédíke utepooroem Israel ami kídílo, Dabid roja kelo, delokke Solomon roja kelo bilík namem kaapala yagorupe ashéngla yidgeyin kaku.

Shédíke Solomonme Lengkansuname

¹¹ Sikepe Solomon rojabí Shédíme Kumkeng Ekum emlang agí duupeko roja ekumdem mope emla aapílo edítko míírutuadín apíípe ipíng pííyin líkto.

¹² Depe iyin pakrodem yoh raajanglo Shédí bí Solomonme lengkan sudola sipe poto, “Ngo nokke kumnamem tatbito, delokke sim moolop sim ngokke ekumem mogeyéla aman emteng bikeng dope ngo agísue ruulíkto.

¹³ Edílo ngo teyong amongem motumla pedong omomayédín, demangkom takom-tariem lulígla among delo duuna atoem doyin moyédí, demangke ngok ami kídí teyolo kilii-ramliem melíkyédín,

¹⁴ delo ngokke amie séko bulu aapíe míílatsula, kumsula, delokke ngokke migmoem matala, buluke bedang aimanem mepakla aapí-aange míímo suyékudí, delo ngo teyong amonglo duudola tatbiyé, delokke paab emteng mesambiyé, delokke buluke among demteng mopít biyéku.

¹⁵ Supak ngo amige migdarla duuyé, delokke so moolop so kumlík namem nyorungete tatgappe mííyé.

¹⁶ Supak lokke ila sim ekum sim ngo mííbadung, delokke ato-siro emteng bilíkyé; ngok amínete yénamke kayardope. Agínpe moodí-moodílo ngok aapí-aang eteng so duulíkyé.

¹⁷ Ngokke lulík-políknam tabungem delokke ayon mebinam kídarem no aipakpe ngome arope míngke sudola agérem gérbipe aido, kape kísape nokke abu Dabid rojabí igetuadín.

¹⁸ Nok abu Dabidme ngo pésutuai, ‘Israel among sime nokke otíng-oyinlok agínpe ruutumem dungge moyaryé,’ sikepe pébisunam sim ngo mesing ayar biyé.

¹⁹ Nolang, nokke ami kídíe ngokke ayon mebinamem igemape angu-angu uyu kumla inamko kayémílo,

²⁰ ngo nolum ngokke among binam loge monpak yéku, delokke sim Kumkeng Ekum simteng, delokke ngokke amínlok bisaknam tabung demteng ngo toyimayé. Tabung ami kídíke aralo luying sula ngilkang kangkeng konpe ekum sim imoyé.

²¹ Supak Kumkeng Ekum sim airupe tabunge míídasula duudung, idakkom depe iyém anínlok gína amiete irisinyorupe kaayé, delo buluteng ínggong suyém,

²² ‘Buluke neku-buku kídar emteng Ijipt among loge laalen kuna Ruutum buluke Shédíme mitpan sunam legape sikepe ikai. Bulu angukon uyu kídarlo ajon jonlíkkai, delokke bulumei kumdungku. Deke legape Ruutum bulum adírem bitung,’ emla amie poyé.”