2 ODONG 5 - DEENA BAIBÉL (BSI)

¹ Shédíke Kumkeng Ekumdem moyin rodem Solomon roja atí-sirí mepom delo Shédíme bíkke abu Dabid rojake binam tabung demlang baldín ekung, uun ekung, bati, delo abíd ekurang kídarem, meyinlíkto.

Daapong Sondugem Shédíke Ekumlo Jongang Kuname

² Delokrodem Solomon bí Jirusalem lo, Israel lokke abu-abíng, tabung opín lokke ruutum delo koole miyong lokke ruutum kídarem Daapong Sondugem, Dabidke doolung Jayon among loge bomadokupe gogdum suto.

³ Delo Israel tabunge poolo kíníd adeng-ape delo roja kíng gídum suto.

⁴ Edílo Israel lokke abu-abíng kídíde gídum sutodín, delo Lebi ami kídare Daapong Sondukdem joobomtoku.

⁵ Bulu Daapong Sonduk, bottena tombu, tabung deena ekung-bati, tombu aralo duuna ekuserang kídídem miri írne lang Lebi kídare Shédíke ekumlo jongang líktoku.

⁶ Solomon roja lang tabung Israel ami kídíde Daapong Sonduk meko delo dumsuto. Delo deddína mér sobén, gooru kídarem palíkto, palíknam simon-sili kídardem sanam pete yimang.

⁷ Delo miri írne kídíde Daapong Sondukdem Kumkeng Ekum delo bomang langkula, Deeya Yalumna Moolop delo Shédíme duumíndung emla kangkénnana mimang ilíknam rumkíng delo melíktoku.

⁸ Buluke patlenna alapde Daapong Sonduk demlang jongkunana daajong dem pokap bomto.

⁹ Si daajong kídí si bodong dora ila buluke tuubudem Daapong Sonduk dungko ampeng delo dagdola kaamílo kaapado. Deeya Yalumna Moolop delokke luyu danlok kaapamang. Sikesi supak loope kadung.

¹⁰ Daapong Sonduk arang delo atíyang kamang, Mosike Horeb amonglo yéduem Shédíke ayonem atbikeng líítam annyi petomde duuto. Si Horeb amonglo Israel kídíke Ijipt amonglok gílen dokuem Shédíke daapong ibosuname.

Shédíke Angun-abée

^11-14 Edílo miri írne kídíde Deeya Yalumna Moolop delok lentokudí, delo buluke aralo botte-amé sanpan sumape bulu agísuem paab kamana deenarung opéékope ingu sulenkai. Lebi kídíke miri lujina tabunge - Asaph, Heman, Jeduthun, buluke oo kídar delo edung-erange kampona ege-galugem gela mirilo batlíknana tapung, lupiyang, harp delo layar kídíem bomla runggu merom línggíng danlo dagato, bulu língko kolang íying annyi tapung mutjingna miri írne kídarlo leko bosuto. Bikul tapung mutna, miri lujina kídíe leko bosudope lubosula Shédíme yidge-rínggeem gomuk atellok lubosuto. Bikul mutkolo lupiyang, layar, delo abíd tapung kídar emteng Shédíme yidge mirilo eerímpe ilíkto. “Ruutum me yidgelangka, kapeila bí airunako, Delokke bíkke ayangde agínke duuyarne.” Delo Shédíme Kumkeng Ekumdem doomuge gyalum bomto. Doomug kanam legape miri írne kídíde dakla peteyimape ila agér-anam emteng ila yimape ikai. Kapeila Shédíke angun-abée Kumkeng Ekumdem bííbomto.