2 ODONG 4 - DEENA BAIBÉL (BSI)

Kumkeng Ekum Lokke Ekurang Kídíe

¹ Solomon roja amanem romkeng meromko pitollok bodonge 9 mitarko apeete 9 mitarko, delokke kedone 4:2 mitarnako moto.

² Bí pitol loge pegope ina dotko koteng pílíkto, de 2:2 mitarko eeríe. Arang pegode raadanglo kéényungkon lokke kéényungkon loope 4:4 mitarko, delokke tabung pegode 13:2 mitarko ido.

³ Pegope ina dotko sim pitol gooru noksa ayon annyi lamku teyolo ilíkto. Pegope ina dotko delang rubo noksade amíl atelpe ito.

⁴ Si dotko si gooru rubo íying kolang annyi mimang teyong kolo dakto, angume línggídanpe daksaato, angume sokko danpe, angume anggodanpe, delokke angume sanggodanpe daklento. Dotkodem buluke teyonglo ilíktung, delokke gooru tabung ekongde arang danpe gerík suyinto.

⁵ Sok biisame 75 millimitarko, delo abede bati abe kísado, tiibe lokke abok-arokde lili appun lokke abok-arok kísa ido. So jarying akké litar asiem mekeng latuai.

⁶ Bí arbín sukeng asi dotko íying koteng pílíkto, pilngoem sokko danlo ilíkto, delokke pilngo kondem línggíng danlo ilíkto. Si dotko kídar si simon-sili lokke romnam amanpe bílíknam dínbíng tarongem rommang adape arbín nakue. Bottena dotkode miri írne kídíke lesuk-laksuk ikepekue.

⁷ Bí lém meru mekeng emte íyingko uunloge píla kumkeng ekum delo melíkto. Pilngoem sokko danlo, delokke pilngoem línggíng danlo meto.

⁸ Bí tébul íying koteng píla Kumkeng Ekum delo melíkto. Pilngoko sokko danlo, delokke pilngoko línggíng danlo melíkto. Bí língkoko arbín sukeng dotkoem uunloge píto.

⁹ Bí miri írne lokke kebang iko emteng píbito; bottena kebang baapom, delokke eyab kídar emteng ilíkto. Eyab kídí delo pitol lokteng kyamlum líktoku.

¹⁰ Kumkeng Ekum delokke sanggo sokkodan kéényung delo dotkoko melíkto.

¹¹ Huramte peking, tupnana lukung, delo ekungem píto. Kumkeng Ekum legape ibiyéem Solomon roja kíng pébisunam agérem Huram bí iyinto.

¹² Gaangem annyiko, egug kísana annyiko gaang teyong delo píla ríji-ríjok mimangem palíkto.

¹³ Língko appiko pitol loge dalim ayé kísa apíípe pípala ayon annyi kope eesaplo éélíkla gaang teyong delo ilíknam egug kísana delo bilgo líkto.

¹⁴ Bí laksuk, delo ato arbínko dotko kídí lokke meda suko ale kídar emteng pílíkto.

¹⁵ Dotko bottena dem íying kolang annyi rubo mimangpe pílík nameke tuldíng bomto.

¹⁶ Solomon rojake Kumkeng Ekum monam delo idung-satok nanape monyo-tarí ijingna Huramabi me peking, tupnana, adín ponana megap kídarem pímoto. Sim tabung pitolloge asire lip-lop idope ilík moto.

¹⁷ Sim tabung roja bí laapala Jordan korong déngkyam kako among yiibe kolo, Sukkoth kelang Jarethan among pénsam delo gairupe déngkyam lok písi-pímo líktoku.

¹⁸ Solomon rojabí sim takam bojépe pínam legape edítko pitol lokke ujone ikadí dem saplayimato.

¹⁹ Dekepe Solomon bí Kumkeng Ekum lokke tabung ato kídarem pílíkto: uunlok pínam aman biko runggu merom; ettíng aman binamem mekeng tébul kídar;

²⁰ aro uunloge pínam lém, delokke medasukeng; íngkuem Deeya Yalumna Moolop kerang delo romlíkpe aiyédín, dem ponam pakpe igebito.

²¹ Appun, lém delo ponana megap kídar deteng aro uunlok pínam mílíe.

²² Lém imitnana, arbínko dotko, arí namponem bomkeng ekung, delo mekol írna jongkeng tabungde uun arolok píname. Ekum lokke luyu eyab, Deeya Yalumna Moolop lokke eyab kídar deteng uun arolok kyamlíkname.