2 ODONG 34 - DEENA BAIBÉL (BSI)

Judahke Roja Josiah

¹ Josiahme rojape ilíkdo delo bíkke dítage píínyiko ido. Bí Jirusalemem takying angum kolang taktelko rojape yéboto.

² Bí Ruutumke kaabangpe agérem ito; bí bíkke buku Dabid rojake yéduloge, Shédíke ayonem apíípe bomgapla yéto.

³ Josiahke koope idola, dítak píínyinape roja dododelo, bí bíkke buku Dabidke Shédíme matalento. Takpi méélamlo uyu kumpom kídíem, mime uyu Asherahke gaang kídíem, delokke abíd mimang kídarem bí bénpak lento.

⁴ Bíkke lulíg aralo bík ami kídíe Baal uyume kumpom runggu kídídem bénkyakbila, deke delokke ampeng lokke nampona romlíkko runggu kídar demteng bénpak yintoku. Bulu Asherahke mimang kídíemla abíd uyu kídíke mimang kídíem pemukpe nyotmíkla, dem pemuk kídardem bulum kumsutuana ami kídar lokke ago teyolo eljér líkto.

⁵ Bí uyu lokke miri kídíke along kídarem buluke kumsutuako runggu kídar delo romlíkto. Sikepe inam loge bí Judah emlang Jirusalemem dormo ayonlok lekoda deemotoku.

⁶ Bí sokke akampe luune kídílolang nyokla duuna Manasseh, Ephraim, delo Simeon, delokke línggíng danlokke Naphtali among loope ito.

⁷ Israel among tabunglo bí runggu takamemla Asherahke gaang takamem bénkyakbila, mimang kídídem pemukpe nyotmíkto, delokke nampona romlíkko runggu kídar deme amíkdope ito. Dekepe ipala bí Jirusalemlo aalat sutoku.

Ayon Kitabem Malenkuname

⁸ Josiahke takying kolang dítak píínyinape ruutumdo delo, bíkke asi-among demlang Kumkeng Ekum dem uyu kumsunam ato-siro tabungem ipakyinla ideerongkuem bí bíkke midum angumko Ruutum Shédíke Kumkeng Ekumdem mosi-momo dokupe melíkto: Ajaliah ke oo Shapan, Jirusalem lokke gobonor Maaseiah, delo Joahaj ke ruutum bottenape yéna oo Joah.

⁹ Eyabem dagbomna Lebi ami kídí lokke Kumkeng Ekumlo langkumnam abal kídídem miri írne Hilkiah kíng bilíktoku. (Si abal kídí si Ephraim kelang Manasseh ami kídíloge, delokke Línggíng Among lokke ami kídí loge, delokke Judah, Benjamin delo Jirusalem ami kídí loge laadum suname.)

¹⁰ Delok rodem sim abal kídí sime Ruutumke ekumem mosi-momo kubopena midum angum delo bilíkto, delo bulu abal dem,

¹¹ esing agér ina kídíem, ekum mona kídíem, Judahlok roja kídíke ínmonam ekumdem mosi-momo kunape elíng kídíemla esingem renadope bito.

¹² Agér dem ina ami kídarde aapí jonneke. Bulume Lebi ami appiko agérlo kaalíkto: Merari opín loge Jahath lang Obadiah, delokke Kohath opín loge Jekhariah lang Meshullam. (Lebi kídíde tabunge tatpope tapungem mutjila, delokke batjina mílíe.)

¹³ Ayokon Lebi kídare ekuserang giidung-giitoklo kaayato, ayokone angu-angu agér gérna kídíem kaalíkla, delokke ayokone atkumbonape demangkom lamgéem dagbomnape ito.

¹⁴ Murkong kídídem kumsunglok laalen dokuem, Hilkiahbí, Ruutumke Ayon, Shédíke Mosime binam ayon kitab deme paato.

¹⁵ Hilkiah bí Shapan me pokanto, “Ngo Kumkeng Ekum so Ayon lokke kitabem paatoku.” Bí kitab dem Shaphan me bito,

¹⁶ delo Shaphan kitab dem roja kelo bomang dola pokanto, “Nokke lulígnam takamem ngolu ito.

¹⁷ Kumkeng Ekumlo menam murkong dem ngolu laalenla agér ina amilo, delo bulum kaayana ami kídar delo bilíkto.”

¹⁸ Delo bí potemto, “Ngokkíng si Hilkiahke binam kitabko kadung.” Delo bí bottepe rojaem rikanbito.

¹⁹ Edílo rojade ayon kitabdem rinamem tattodí, bí bíkke egeme ankíla sérkésuto,

²⁰ delo rojade Hilkiahme, Shaphanke oo Ahikamme, Mikaiahke oo Abdonme, kebang atgebona Shapanme, delo rojaem kaayana Asaph bulum sikepe lulígto,

²¹ “Nolu gíla Ruutum kíng ngokke pelang Israel lolang Judahlo duudung adana ami kídí legape tatkítoka. So Ayon kitap paanam so poyilnam kídíem matatoka. Ruutum bí ngoluke teyolo mardung, kapeila ngoluke buku kídíe Ruutumke agom kídíem igemato, delokke sok kitap sokke igelangka emnamem igemato.”

²² Rojake lulíglok, Hilkiah lang abíd eke, Jirusalem lokke anípe dunga bomnam moolop delo duuna kaalu miri Huldah emnam mime delo tatkípe gíto. (Bíkke milo Shallumbí Harhaske onam Tikbahke ue, delokke bí Kumkeng Ekum lokke ege kídíem kaalíkbone.) Bulu bíme legang kídídem pokanto.

²³ Delo Huldah bí bulume gílat sulangkula rojaem,

²⁴ Ruutum keelok aana sim agom sim bidokupe poto: “Ngo Jirusalem, delokke sokke ami takamem rojaem rikantonam kitap so atnam pénam takam loge ingééyé.

²⁵ Bulu ngome míípakdola, abíd uyu kídílo aman kídíem ipaklíkto, delokke dekepeila buluke inam takam soge ngome marmoto. Ngo yagorupe Jirusalem teyolo marlídung, delokke ngokke marlínge omap kumayé.

²⁶ Judah roja bíkke supedan Ruutum, Israelke Shédí ngokke poname si: No kitap delo ingkuem attudí deme tatto,

²⁷ delokke edílo no ngokke Jirusalem emla sok ami kídíem kape kísa ingééyé emla lurítnamem tattodí, delo no nokke egeme ankílok bétsula delo kapla, bursulangkula, ngokke keralo mínggíp sutoku. Ngo nokke kumnamem tatto,

²⁸ delokke nokke simang adape Jirusalem teyolo ngokke bomapenam ingééname aamayé. Ngo nom aapíem eetetmola simoyé.” Ami kídarde sim agom kídar sim bomla Josiah roja kíng aalat sutoku.

Josiahke Ruutum me Tatbiyé Emla Daapong Ibosuname

²⁹ Dekepe irongem delo tabung Judah, delo Jirusalemke doolung miro kídíem Josiah rojabí ami melíkla gídum sumoto.

³⁰ Aadum surodem lekope bulu Kumkeng Ekum delo miri kídar emlang Lebi kídíem, delokke mirem-opanpe takam amie lekope dumsuto. Buluke takam tatkolo, Josiah rojabí Kumkeng Ekum loge pangkunam Daapong kitab dem apíngpe botte-botterupe rikanboto.

³¹ Rojabí rojake gaang delo dagdula, bíkke lulígem igepe, bíkke ayon emlang lulígnamem bíkke aapí-aang takamlok bomgappe, delokke kitap delo atkampe, Daapong delokke lulígnam kídíem agérlok igepe emla Ruutum kíng daapongko ibosuto.

³² Bí Benjamin ami kídíemla Jirusalemlo duuna miyongem daapong dem bomgapdope pésumoto. Dekepeila Jirusalemlok ami kídíde buluke buku kídíke Shédí kíng tolíksunam daapong delokke lulígnamem igeto.

³³ Israel kídíke bomnam belumrunam uyu mimang kídarem Josiahbí nyokyin moto, delokke bíkke turdu tetedem, Ruutum buluke buku kídíke Shédíme agér gérbidope bí ami kídí deme imoto.