2 ODONG 23 - DEENA BAIBÉL (BSI)

Athaliahme Mirolpe Rolbomname

¹ Dítak akkéko toyarongem miri Jehoiada mííduk lenla mimakpe leemo lento. Bí so maglíng ruutum pilngo so tolíkbosunamko ibosuto: Jehoramke oo Ajariah, Jehohananke oo Ishmael, Obedke oo Ajariah, Adaiahke oo Masseiah, delo Jikrike oo Elishaphat.

² Bulu Judah lokke luune tabunglo enla delo duuna Lebi kídí emlang erang takam lokke ruutum kídíem laadumsula Jirusalemlo aabotoku.

³ Bulu tabunge Kumkeng Ekum delo dumsugeyéla, delo bulu roja lokke oo Joash kíng daapongko ibosuto. Depe ido delo Jehoiada bulum poto, “Roja lokke uem kaalangka! Dabidke otíng-oyine rojape iyé emla Ruutumke pobisunampe bíme rojape imolangka.

⁴ Supage si ato si noluke ipename: noluke miri delokke Lebi loge séko bulu Sabbath longelo agér gérpe aayédín deme opéédem angumkope ila akone gídung-gítokko lamgéem,

⁵ akone roja ekumem, delokke akonde Pílenyalum genam lamgélo dagbomyé, delokke ami takame Ruutumke ekum delo duuna kebang duupom delo duudumsuyé.

⁶ Agér ipena miri delo Lebi kídí petome Kumkeng Ekum aralo aalayé, abíd amide aalamang; kapeila bulu deene, idola abídde Ruutumke políknamem tatla luyulo duupe aido.

⁷ Lebi kídíde mipil-miyonge yoksaem alaglo bomla rojaem gargoola kaabompe aido; séko ekum delo aayédí dem petpaklangka. Rojake gílen-gíang takamlo gímín gelangka.”

⁸ Lebi kídí delang tabung Judah ami kídarde miri Jehoiadake lulígnampe agérem ito. Jehoiada sékomete gípan sumokumang. Bulu takame Sabbathlo agér gérkolok, delokke gérkolo agí amiem bomasuto.

⁹ Delo miri Jehoiada Shédíke ekum delo mesingnam Dabidke gíníng, delo tamkung emlang kattam kídarem laalenla sipaying képtén kídar delo orlíkto,

¹⁰ delo bí mipil-miyongdem roja lokke sontoripe, miyong alaglo mimak inanaem bomdola, ekum delokke sokko danlok ila línggíng danloope, delokke runggudem bilgo bomdopela ekumdem kaabomdope daggomoto.

¹¹ Delo Jehoiada lang bíkke oo kídíde roja oodem gílen bola bíkke dumpong delo roja dumlup dem luplíkto, delokke rojape igenana ayon atnamko bito; delo bulu bím rojape togesuto. Jehoiada lang bík oo kídíde bíme rojape pídélíkto, delo bulu goggeto, “Rojae duuyar daklangka!”

¹² Ami kídí lokke dugdud emla gogtongla rojaem yidgenam dem edílo Athaliah bí tattodín, delo bí Kumkeng Ekumlo ami kídí delo aato;

¹³ delo bí pííla kaatoname, rojadem ekum aatakdan delo rojalok dagpeko gaang delo, bíkke ampeng-amleng delo sipaying ruutum em, delokke bikul mutbonem daggo bomdupe kaato. Takam ami kídarde ashérupe gogtongla bikulem muddo, delokke Kumkeng Ekum delokke tapung batbona kídarde igebodo. Dem kaala Athaliah bí bíkke ege genamem sérkésula éérlento, “Rukupto! Rukupto!”

¹⁴ Delo miri Jehoiada bí sipaying képtén kídardem tomlen dola poto, “Sontori dakyon pénsamso bíme soangto, delokke séko bím mopípe iyédí dem pakalangka.” Delo miride sipe poto, “Shédíke ekum so bíme pakamapeka.”

¹⁵ Depeila bulu mimedem umla roja ekum lokke Guré Eyab delo bomala pakato.

Jehoiadake Isi-imokuname

¹⁶ Delo Ruutumke amipe idokupe Jehoiada, bíkke lolang takam ami kídar, delokke roja delo daapongko ibosutoku.

¹⁷ Delo bulu takame Baal uyume kumsuko ekum delo gíla bénpak-bényak bito. Bulu ipak merom, delokke uyu noksang kídí demte benmík bito, delokke Baal uyuke miri Mattan meteng merom agép delo petlíkto.

¹⁸ Jehoiada miri, delokke Lebi kídarem Kumkeng Ekum delokke agérem kaabodope ullíkto. Bulu Dabid rojake parlíknampe, delokke Mosike Ayon mebonampe ipak merom delo romnam amanem bilík bopenade bulu. Bulu miri tapung, delokke adeng-ape kídí emkom kangge bopenape ito.

¹⁹ Jehoiada Kumkeng Ekum delokke eyablo sontoriemte deemangna ami atel koteng aamo madope dagbom moto.

²⁰ Bí bíkkelo língko sipayingem yébona ruutum kídarem; kénna ami kídíem, ami kídíke gobonor kídíem, delo among delokke ami takamem yonbola rojadem Shédíke ekum deloge gílen bolangkula, línggíng danlokke lamgé loge yonlangkula roja ekumlo aabotoku. Delo bulu rojadem roja palenglo duumoto.

²¹ Dekepeila among delokke ami takame ashéto; delokke Athaliahme yoksalok pakarongem luunede eetettoku.