2 ODONG 12 - DEENA BAIBÉL (BSI)

Ijipt Roja Shishakke Jirusalemem Mimak Iname

¹ Rehoboamke rojape igeborongem, delokke edíng lenrongem, bílang tabung Israele Ruutum ke ayon binamem mepakto.

² Rehoboamke dítak pilngonape roja dodungem, Ijiptlok roja Shishak bí Jirusalemem mimak magabomto, kapeila bulu Ruutum me ipéésuto.

³ Éjar kolang língko annyi guré gaariko, delokke jarying akké guré dugbomna amiko, delo Ijipt lokke sipaying kídarlo lekope sankén yimanamko Libya, Sukkit, delo Ethiopia ami kídíeteng bíkkíng aataksuto.

⁴ Bí edíírupe yapgo molíknam Judahem laala Jirusalem loopekai pííto.

⁵ Delokrodem kaaluna Shemaiah, Rehoboam, delo Judah lokke miro kídare Shishakme pesola Jirusalemlo bamdum sudungem aala poto, “Simino Ruutumke poname: Nolu ngome mepakto, depeila supak ngo nolum Shishak kíng mepak líkdung.”

⁶ Israel ruutum kídí elang roje, bulu agísue imemdem togesudola poyan suto, “Ruutum bí íngkuem ilíkdudín de ijiidung.”

⁷ Edílo Ruutum buluke imemnamem bursu dokupe kaatodín, delo Shemaiah kelo agomem pogedope políktoku, “Sikepe bulu agísue imemem bursu dungkunade, ngo bulum inyokmayé, idola menape bulum adír loge mopíyéku. Shishakme ikummola ngok marlíngem Jirusalem teyonglo melík yimayé.

⁸ Idokom Shishakke rumkínglo bulum duumoyé. Dekepe imílomin ngome agér ibinam emlang angukon amonglok rojem agér ibinam raadang pénsam mítpanem bulukom kénsu layéne.”

⁹ Ijipt roja Shishakke, mimagem ikumla Jirusalemlo aado delo bí Ruutumke Kumkeng Ekumlo duuna murkong, delokke roja ekumlo duuna murkong sonduk kídarem joobomtoku. Bí atí takamem laayinto. Solomonke uunlok pínam tamkung kídí emte giibomkaku.

¹⁰ Sokke ayanpe Rehoboam roja baldín loge mimak tamkung dem píla melíktoku, delo roja ekum delokke lamgélo sipaying kídar lok sontori dakbomdope kaalík-lulígna migom ruutum ekete lulígto.

¹¹ Rojake Kumkeng Ekum delo gíayé takamlo bíkking gímín gena sipaying kídíde tamkungdem bomto, delokke gílat suyékuem tamkung kídídem sontori dakbomko pírtek delo melat sulíktoku.

¹² Rehoboambí Ruutum kelo aange remelpe igela tolík sukunam legape Shédíke marnamem laalat sulangkula, bím apíípe nyokmomato, delokke Judahlo legang takame aitoku.

¹³ Rehoboam rojabí agísue atí tabungem edíírupe Jirusalemlo ilíksula roja dobomto. Bík roja iyang dodem bí takying appi kolang taktelko dítage ido, delokke bí Jirusalemlo takying kolang dítak kínídko roja doto. Sim luune sim tabung Israel among aralok Ruutum bí bíme kumsuko mooloppe ulsuto. Rehoboam ke ane Naamah, bí Ammon doolung lokke kuai.

¹⁴ Bí atímana agérem itíto, kapeila bí Ruutumke míínamem matakímang.

¹⁵ Rehoboamke agér idu-satogem ilen lokke iyin loope, delokke bíkke edung-erang legangem kaaluna Shemaiah, delo Iddoke legang atkumko kitaplo paadung. Rehoboam lang Jeroboam bínyi agínke mimak imínsuto.

¹⁶ Rehoboam sila, bíme Dabidke doolunglo duuna rojem yupomlo yuto, delokke bík oo Abijah bíme rojape yétítto.