2 KORINTH 8 - DEENA BAIBÉL (BSI)

Kristan Lokke Daan Biname

¹ Delokke bíro kídía supak, ngo nolum Makedonia mondolilo Shédíke yanggong binam legangem kénmope emla míídung.

² Ikaa darkange séngéépe ilate, deddíko iréé sinyola, ikaa darkaala iduemte opane séngéé dolate airupe ashéla dokang uldum sunamem erapto.

³ Delokke ngo ankíname bulu agíke kadulok ayokone, dem biboonete agí kusiipe agí míídulok bisuto,

⁴ buluke kootírlok yébo dakbona kídíem iguldope ngolumte ankírupe podo.

⁵ Delokrongem ngoluke dekepe iyépe emla míínamlok imape, idakla kera yalumpe agísue Ruutumme bisuto delokke delokrongem Shédíke míídulok ngolukíng bisuto.

⁶ Depe iname sim agér sim ilenbona Titonme iyardope delokke sim apekrupe ayanam agér sim nolum iyin bodope podung.

⁷ Supak nolu míngkelo, agomlo, kénnamlo, takam ankí bomnamlo delokke noluke ngolum ayanamlo nolu pakdung iname ayala daan binam lokom pakdope mííbom langka.

⁸ Ngo nolum hukumpe pomang; idakkom abíd kídí lokke ankí bomnam emla noluke aro ayangem kaayiisula kangkínape emla podung.

⁹ Legade ngoluke Ruutum Jisu Kristoke yanggongem nolu kéndung, bí mireme idolate, noluke legape bí opan geto. Depe inamde bíkke opanlok nolu mirem dokupe iname.

¹⁰ Delokke simino sok agomsok legape nolukepe pobinam aiyalumna ngokke ngiitome. Mennying nolu kera yalumpe bigene delokke de petommang; dem ipe emla erappe mínggene.

¹¹ Supak ipenamem iyintoka, delomin noluke dem ilíí namde nolu kape iruutudí dekepe apííyéne, noluke ilanamko itoka.

¹² Kapeila nolu bilínam aapí kamílo, bila manadem emmang, akonke kakorlok bilasunam amande torík supename.

¹³ Ngoluke míínamde ayokone asarpe yédope delokke nolu tebegla yédope emla míímang, idakkom delo akampe yédope emlamin míídune.

¹⁴ Siyum siroke noluke kanamde buluke míínamem ipííbiyé, delokrongem buluke kanamdete noluke míínamem ipíí biyéku. Delomin akam bosuyéne;

¹⁵ de sikepe atbinam kísape iyé; “Séko mekumtudí bí ngatbanpe kamayé delokke séko anyongope mekumtudí bíkom píírammayé.”

Titonlang Bíkke Angong Kídare

¹⁶ Ngokke nolukepe ankí namem Titonke aanglo duumona Shédíme ngo yiddung.

¹⁷ Legade Titon bí ngoluke roguem tatbinam petommang, idakla bíkke míísa sulok, ernamrupe nolukíng endak.

¹⁸ Bíkke lekope ngiitom tatponem pogong kolok takam mondolilo amín kana bíroko ngolu bíkke lekope metak sulíktung.

¹⁹ Delok teyolote, bí ngolum enbo gíbo sudope mondoli kídíe ullentung, kapeila ngolu dokang em gedung de ngoluke igul línamem lang Shédíme erkí namem lengkan sunape iname.

²⁰ Ngoluke sim daan sim iduu sitok kolo amiem paklo kosu límang.

²¹ Kapeila Ruutumke kangko petom lomang, tani kangko lokom ngolu ingkue aidudí dem ngolu aang kibom sudung.

²² Delokke teyoloteng, takam bedalo erapnako emla lengkansuna delokke nolukíng bíkke míídíng sukolok supak pakyape erapna ngoluke bíroko buluke lekope ngolu metem líkdung.

²³ Titon kepedan bí ngokke angonge delokke nolukelo agér gérbo sutínge; ngoluke bíro kídí lokke, bulu ngoluke mondoli lokke migule delokke Kristokíng míngge pename.

²⁴ Delok legape noluke angongem delokke ngoluke nolum yidnam legangem mondoli kídíe kaasu ladope so ami kídíem lengkan sulangka.