2 KORINTH 5 - DEENA BAIBÉL (BSI)

¹ Supak ngolu kénsudung, ngoluke dungko tani amosokke poyub si nyokmílo, tani alaglok momanam teyong telo duuyarna Shédíke mebinam ngoluke ekume dung.

² Dekepe idola ngolu sigíndung, ngoluke duupeko teyong telokke ege galugem gedo bongama emla ankídung,

³ kapeila edílo ngolum egem biyédí delo ngolum araape paayimayé.

⁴ Legade, so poyub so duudu sim, ngolu sigíndung delokke míídírsue idung, kapeila ngolu arape meko sulímang idakkom teyong telo duupeko lokke ege galugem gekom sulídung, delomin sinamem turname méyyuk yékune.

⁵ Supak Shédí bí agíemin ngolum sok legape metune delokke aapenam de berok dung emla kéndope ngolukíng Aidem meruu bitune.

⁶ Delok legape ngolu agínpe berok sudung delokke so amílso duudung ayardem, ngolu Ruutum kelokke dunggendung emla kéndung.

⁷ Ngolu kaadulok yémape míngke lomin yédune.

⁸ Ngolu miramdung emla ngo podung delokke adínlokke mootepe yénamdem mííba yadung delokke Ruutumkelo yépope yédung.

⁹ Depeila ekumlo duudokom, mibolo yédokom ngoluke ruubom namde bím mííyum sudope inamdemin.

¹⁰ Kapeila ngolu takame Kristoke bisarko umké keralo dagarupe aiyé, delokke delo ainam dokom, aimanam dokom amílpe duuduso ingko atíem itodí delok mipile are em paasuyéku.

Kristokelok Shédíme Angong Iname

¹¹ Dekepe iname Ruutumme pesonamem kéndola ngolu ami kídíem tomdung; ngolu ingkuedí dem Shédí bí kénsémdung delokke noluke aapíete sim kéndupe emla ngo míídung.

¹² Ngolu lekoda ngolum nolu, yidyépe emla pomang, idola aapí aang akorem yidmape igeyéla teyong kangkorlok yidsuna kídíem poyansula biyépe emla ngolum yidpenam legangem lengkan bidung.

¹³ Ngolu ngoluke aapí dungkollo duumamilo de Shédíke legapemin; ngolu aapí dungkollo duudumílo de nolu kepemin.

¹⁴ Legade, Shédíke ayange ngolum deperung imodung, kapeila midum atele takam legape sigebito, delokke delok legape takame sito emnamde ngolum arorupe míímoto.

¹⁵ Turla duuna kídíe, buluke legang petompe tursu yimadope idakkom buluke legape sina, delokke sirongem kiirep kunam bíkke legape turbidope, Jisu Kristo bí takam legape sigebito.

¹⁶ Dekepe ila supak kelokke séko mete adín yédulok kaamang. Ngolu kerape Kristome adín yédulok kaatuakom depe ngolu kaayimang.

¹⁷ Delok legape, séko Kristokíng duududí, bí anípe píkuname; akue gíkabong, aníe angkai!

¹⁸ Si takam si Kristo kelok ngolum bíkkíng yérík dakrík sukuna delokke ngolum yérík suku penam agérem bina Shédíkelok lenne:

¹⁹ depe emnamde tani paabem bulukíng sanket bimape, Shédí bí tani amongem Kristo kelok yérík sukuname. Delokrongem bí yérík dakrík sukunam agomem pobodope ngolum bitung.

²⁰ Delok legape Shédí bí ngolukelok bíkke roguem gukenam kísa, ngolu Kristoke poyon sukenge. Ngolu Kristoke amínpe nolum pobidung. Shédíme yérík sulang kuka.

²¹ Ngolu bíkkelok Shédíke yéjiinam akor sorem paadope emla, paab kamana amiem, paab gena kísa imoto.