1 TIMOTHI 6 - DEENA BAIBÉL (BSI)

¹ Pakne pakbope duuna takame buluke agí ruutum kídíem apíípe mínggepe emla míípe aido, demílomin Shédíke amiem delokke ngoluke luyilem lusa mayéne.

² Abíl kídíde séko buluke ruutume míngke sunape idudí, bulum bíro kumsupe idokunade emla míngge mape ipe aimang. Dempenem bulum pakyape igulpe aido, kapeila, buluke igullok paapekna kídíde míngke suneke delokke buluke ayang penameke. Sikesi nokke poyil pename delokke bulum lugap líkpename.

Yadna Ngiitome Delokke Aro Mireme

³ Séko menam ayonlok luyilem lula delokke ngoluke Ruutum Jisu Kristoke aro agomem delokke ngoluke dormo luyilem megeyéla angukonpe lupat subodudí,

⁴ bí adum ale ine delokke atí kénmane. Bí lupéé luréé delokke lukípokí sunamem erab bomdung. Dekede menam ponam, lumín manmín, gomké gommo, kangki kangat em lenmodung

⁵ delokke aapílo arue duumana, atímana aapí gena delokke dormuem mirem bedape míína ami kídíde pétkí ikí suyar abuudung.

⁶ Idakkom tetepe míísula dormolo yénamde botterupe ainame.

⁷ Kapeila tani gíídaso ngolu atíkoteng bomamang, delokke sok ngolu atí koteng bomlang kumang.

⁸ Idakkom dope tíípe namelang gepe bompename kadomílo, ngolu dem tetepe míírí sudung.

⁹ Mirempe míína amikídí de kaabolo, olíkdung delokke are kamana língkit lolang míípu míílumna aapílo sangadung, de taniem nyokpekolo yoplíkdung.

¹⁰ Legade yagope murkong pai poisar legalo míítí namde atímanam takamke lerínge; bulu murkong poisar legalo míítí kolok, míngkelok gípek sukaku delokke bulu agíe aapí ainangem petsu langkula bojépe duunyok dungku.

Atek Luyile

¹¹ Idakkom Shédíke amie sim takam sim dunggedung, idola yéjiiname, nyogapla yéname, míngkengem, ayangem, delokke remelem matadung.

¹² Aina míngkeng mimagem maklangka. Deddína ami kangkolo nokke arope ponkan subomnam, nom tomlíkko turyarna yénamem bomgap langka.

¹³ Takam atíem turnamem bina Shédíke keralo, delokke Pontio Pilatke keralo agí míngkengem edíírupe lukansuna Jisu Kristoke keralo, ngo nom lulíkdung,

¹⁴ ngoluke Ruutum Jisu Kristoke angkuma tetengem atí akang kamape delokke lukang ikang penam kamadope sim ngiitom aro sim bomgap igap langka.

¹⁵ Bíkke aadíkude aro moodílo agam kana delokke Ruutum atel, roja kídílokke Roja delokke Ruutum kídílokke Ruutum, Shédíke akorlok iyé.

¹⁶ Bí petom simape duuyarne; bí sékoteng aala mangko angunlo dung. Sékoteng bím kangkímang; sékoteng bím kaalamang. Bíkkíng bottena amínelang ralname duuyar kalangka. Amen.

¹⁷ Yéduu namsokke tani amoso adum ale imapeka delokke attíng kamana mirem ekuralo míínamsula yémapeka emla mirem kídíem lulangka, idakkom buluke míínam sunamem, ngolu inayépe emla atí takamem ngolum alummape bina Shédíkíng melangka, emla potoka.

¹⁸ Ainem ilangka, ainam agér ikolo mirem langka, delokke bidar langka delokke bisu isulípe míílangka emla bulum lugap bolangka.

¹⁹ Dekena bedalok angkupena longe telok legape bulu agíke kumsungem edíípe meruusuyé, delo bulu aro turnamem bomgap sulayé.

²⁰ Timothi no, kaasing mosing yépe emla nom binam tarong dem ralbom sulangka. Bulna agom delokke emmumpe amike “Kénnam” embomnam agomlok are kamana pétkí lukí agér kídarem mepaktoka.

²¹ Kapeila ayokone dem kénnamrupe míísudung, delokke dekepe ikolok bulu míngkeng bedangem menyok dungku. Yanggonge nokkíng duudak langka.