1 TIMOTHI 5 - DEENA BAIBÉL (BSI)

Arope Míína Kídíem Yébopename

¹ Abu abíyangem noomapeka, idola bím abu kísape rogu langka. Aníyana kídíem agí bíro kísape ilangka,

² ane mine kídíem ane kísape, delokke aníyana mime kídíem bírme kísape, deenamrupe yébo sulangka.

³ Igul ibaanam meyéng kídíem aipakpe kangkén langka.

⁴ Idakkom meyéng kone ome-oo demangkom oten ome-oo kadumílo, kerayalumpe dormo agérem igela agíke ekum erangem mosiisupe aido, demin buluke ane abuemlang buku nekuem ayang yayan sukuname kapeila de Shédíke kaabanampe idung.

⁵ Pííram saamona delokke agí petome duusuna meyéde Shédí kelok igul namem míínam sudola longe yohpe kumtídung.

⁶ Idakkom sénam monamlo yéna meyéde bí turla yédokom sina kísadung.

⁷ Séko meteng imem kaapa madope, amikídílo sim luyil simteng pobotoka.

⁸ Séko agíke erangem delokke apekrupe bíkke erang anín pagem kaasing mosing sumadudí bí míngkengem mepak sudung delokke arope míímana akon emteng bíírík mayadung.

⁹ Ingko meyénge agí miluem turdungem kampope delokke mínggap bosula yébo sumatodí delokke dítag íying akké pííramdudí bím meyénge emla sanlamayé.

¹⁰ Sok teyolokom bíkke ome-uem aipe usaala, Kristan angong kídíem remagoope igul sanggulla, delokke bí aina agér takamlo tosak sula, sikena ainam agérlo amín kana amipe ipe aido.

¹¹ Mimum meyéng kídí emdan so santak sumapeka. Legade edílo bulu milo kalíng yékudí delo bulu Kristome mepak dungku.

¹² Dekepe bulu buluke teyolo eduem langaang sulíkdung kapeila buluke kerape pésu namem inyoksuto.

¹³ Delokke kékon lokom bulu mekemdung. Delokke bulu mekem petommang, idakkom ekum ekumlo luge pogela delokke agísue moomang isula, pope manam agom mílílo potí goodung.

¹⁴ Dekepe ila ngo mimum meyéng kídíem milo kalangkula, ome-oo kala, agí ekumem kaasi mosing sulangka delokke miruem lungil lusong kosumapeka emla pobidung.

¹⁵ Ayokone arope uyulo gílat kupe emla dakkur dungkubong.

¹⁶ Mime míngkesuna delok ekum erang meyéngeke kadumílo, bí bulum igulpe aido delokke mondoliem buluke legape egedem getí momapeka, delomin pííram sémona meyéngem mondolie igul layéne.

¹⁷ Mondoliem aipe yébo dakbona miro kídíde bojéyape míngge pename, apekpe luyil poyil agér ibona kídídem apekrupe míngge pename.

¹⁸ Kapeila Dooyinge sikepe podung, “Rubuem ali ayé yikdungem nappangem sopur pokap mapeka,” delokke “Agér inade agí irem paasupe aido.”

¹⁹ Midum annyi angumko arue emlíkmape agí míídulok mirokonem agomko lujét yémílo dem tatbi mapeka.

²⁰ Abíd kídíete ansudope, paab imemna kídíem takam tatkolo lupe aido.

²¹ Shédí kelang Jisu Kristoke delokke deena teyong kotokike kangkolo ngo nom pokeesula podung, sim depe epekom mííba yanam mííbang mayanam agom kamape, aabo aapílok imape, tetenglok bomgap langka.

²² Alag leetan namem esang mapeka, delokke abíd kídíke paab gooralo omem sulík mapeka. No agíem deenampe mesu langka.

²³ Nok akii ainang legang loklang delokke kitodan dan igalok asi petomlok tííyi mape onggur alang anyong kodada tíítoka.

²⁴ Ayokon amikídí lokke paabde kerape íngkí bengkí pekolo gígedung, ayokonke méélamlo gímín gedung.

²⁵ Deke kísape aina agér dekom kénsém name, delokke kénpí manam demkom rumsup lamayé.