1 TIMOTHI 3 - DEENA BAIBÉL (BSI)

Mondoli Lokke Yégebona Kídíe

¹ Si aro agomko: Séko bí kanggong igong bonape ilíídududí, bí míngge penam agérko ilíídung.

² Supak míngge igebonape yénade lukang luyéénam amipe ipe aimang, méng atelkana mínggenam amipe ipe aidung, aapíe bodoope, jémgenape, mínggenam amipe, daadéénape, luyil poyil lanape ipe aidung.

³ Apong tíngírsula írmí ormo inape, lumín manmín supona amipe, delokke murkong poisar paanam donam kaabonape ipe aimang, idola eetetna amipe ipe aido.

⁴ Bí agí ekum erangem aipe kaasing tatsinape ipe aidung delokke bíkke ome-ue bím míngge ladope ipe aido.

⁵ Séko agí ekum erangem kaasing tatsing sulamadí, bí kape kísa Shédíke mondoliem kaabo tatbo layéne?

⁶ Bí anípe míílat sukuna amipe ipe aimang, demamílo bí yadnape iyé delokke uyu akampe bisar pekolo olíkyé.

⁷ Bí luyu amilo aina amín kaperung aido, demílomin bí mínggíp sunape imayéne delokke uyu etkulo batko sumayéne.

Mondolilo Igulpene

⁸ Deke kísape dikon kídí dekom míngge banam, miteng, onggur alang ngangompe tíímana, delokke míísi míírum paanam donam imana amipe ipe aido.

⁹ Bulu míngkeng aruem eerípe bomgapla, aapíe berokpe aidung.

¹⁰ Bulum kera yalumpe ankí kangkí pope aidung; delokke delo bíkkíng atíyang kamamílo, bulum dikonpe yémotoka.

¹¹ Dekepakpe, buluke méng kídíde míídíínam mimepe ipe aido, lukar luyar nape imape jonpe aido delokke takamlo míngke sunape yépe aido.

¹² Dikonde méng atel bomnape ipe aido delokke bíkke ome-uem bíkke ekum erangem aipe mosiina amipe ipe aido.

¹³ Igulna kídíde séko bulu agíke agérem aipe iyédí bulu aina amínem paadung delokke bulu buluke Kristo Jisukíng míngkengem mirampe lubo ladung.

Eeríruna Agome

¹⁴ Ngo nokkíng menape angkupe mííduakom ngo sim ngiitom kídísim atlíkdung.

¹⁵ Demílomin ngo adol dakkom, aro leríng delokke aane gaang, turna Shédíke mondoli, ekum eranglo, kape kísa tani kídíde kampope dungkan dodí dem no kényéne.

¹⁶ Dormolo nyogapla yénamde edítko eerídudí dem sékokom lukí sulamang. Bí tani amílpe lengkansuto. Aidlok yéjii nakope lengkansuto, teyong kotoki kídíe kaasuto. Bík legangem opín kídílo pogoobito, tani amoso bím arope mííto, delokrongem teyope bím laatoku.