1 SAMUEL 6 - DEENA BAIBÉL (BSI)

Daapong Sondugem Melíkkuname

¹ Philistain amonglo Ruutum ke Daapong Sonduge poolo kínídko doorongem,

² Philistain ami kídíde miri kídíemla, líímé-tagil kaana kídíem tomla íngkíto, “Ruutumke Daapong Sonduk sim ngolu kape imíloi? Ngolu sim sok atolo melíkkupe, ngolu ingkokoi metak sulíkkupen?”

³ Bulu poyansuto, “Nolu Israel lokke Shédíke Daapong Sonduk sim melíkkupemílo, nolu noluke paab imemnam legape amanko metak sulíkkupe aiyé. Daapong Sonduk dem amanko metak sulíkkumape asampe melíkkupe aimang. Sok mino nolum mopítyéne, delokke noluke teyolo bík itung-irénamem kényéne.”

⁴ “Ngolu íngko amankoi bím melík bipen?” emla ami kídíde íngkíto. Bulu poyansuto, “Philistain roja pilngoem míítak subom dola uunlok tasut-tarí mimangpe pilngoko píla, delokke uunlok kebung mimang pilngoko pílangka, kapeila sikena itung-irée, noluke roja pilngo lolang doolung pilngoso kakai.

⁵ Nolum adírmona tasut-tarí delokke kebung sokke mimangem depekom píla nolu Israelke Shédíme airupe yidgepe aido. Dekepe imílo, noluke teyolo, noluke uyu teyolo delo noluke among teyolo bík alag tebege kaimayé.

⁶ Nolu kapeda Ijipt kídíke roja kelang Ijipt ami kísape aapíe tolla iyén? Israel kídíke Ijipt among lok gílen kumang tetengem bulum Shédíke yadnamem mitpan sumapela.

⁷ Dekepeila, gooru-gaari aníko píla, letel koteng jungoli ilík kímanam ruo kana ruune annyiko laala gaaridem gemolangka, delokke bínyike ruo kídarem kumsunglo gongaa langkuka.

⁸ Ruutumke Daapong Sondukdem laala gaari delo melík langka, delokke ampelo sonduk kolo uunlok pínam mimang kídí, noluke paabem dornanape aman melíknamdem melíklangka. Gaaride agíe bedang dem ensudope melíktokuka.

⁹ Enkor deme kangkí langka. Beth Shemesh emnam luune danpe enyé mílo, de Israelke Shédímin noluke teyolo adír melíkne emla lengkanyé. Delok enmayémílo, ngolu kényé bí itung-iré kinam sim melíkmape, agíke len-gope lensunako emla.”

¹⁰ Bulum políknampe bulu ito. Rune annyiko sola gaari dem gemola, bínyike ruo kídar dem kumsunglo sitkap líktoku.

¹¹ Bulu Daapong Sondukdem lekope uunlok pínam tasut-tarí kinam kelang kebung mimang kídídem gaari delo melíkto.

¹² Rune annyide enlenla Beth Shemesh luunedanpe jonnampe muula-muula enbomto. Dem Philistain roja pilngode Beth Shemesh lokke rísu loope gímín gelíkto.

¹³ Beth Shemesh lokke ami kídíe dííte-moopang delo géhuem isila yédungem, kaadung sutonam bulu Daapong Sondukdem kaapato. Dem kaala bulu yagorupe ashéngto.

¹⁴ Beth Shemeshlo duuna Joshua emnam ami lokke arík delo gaaride aalíkla líídung bottena ampeng kolo aala dakto. Ami kídíde esinglok pínam gooru-gaaridem taktu-takyu pala rune annyidem pala Ruutum me romnam ipakpe ibito.

¹⁵ Lebi kídíde Ruutumke Daapong Sonduk demlang uunlok pínam mimang kana sondukdem joorepla líídung teyolo joolíkto. Delok rongem Beth Shemesh lok ami kídíde Ruutumme romnam ipak kídí emlang abíd ipak kídíem delo longe delo ilíkto.

¹⁶ Philistain lok roja pilngode buluk inam takam sim kaayin geyéla, Ekron amongpe delo longe deloi enlat sutoku.

¹⁷ Philistain ami kídí delok uunlok pínam tasut-tarílok mimang pilngo dem Ruutumme buluk imem amanpe melíkto. Atel asak Ashdod, Gaja, Ashkelon, Gad delokke Ekron luune kídí legape.

¹⁸ Delok teyolo bulu uunlok pínam kebung mimang emteng pilngoko atel asak Philistain roja pilngo delok ruutum bomnam edíípe píírgosunam luune kídí delokke pírgo sumanam doolung kídí delokke legape melíkto. Beth Shemesh lokke Joshuake arík delo Ruutumke Daapong Sondugem kanggenam legape buluke Daapong Sondugem kangkén sunape botteruna líídungde silo loope sim inam kídísok hakiipe duudung.

¹⁹ Ruutum bí Beth Shemesh lok milokong íying kínídko, buluke Daapong Sonduklok arangem kangaanam legape petto. Delokke teyoloteng deddína amiem mokakolok bulu ankírupe kabbom-rííbomsuto.

Kiriath Jearimlo Daapong Sonduge

²⁰ Dekepeila, Beth Shemesh lok milokong kídíde poto, “Séko Ruutum, deena Shédíke keralo dagalayén? Ngolu íngkoloi ngolu kelok mootengpe sim megésupe melíkpene?”

²¹ Bulu Kiriath Jearimlo amieke melíkla bulum, “Philistain kídíe Ruutumke Daapong Sondugem melíktungku. Tokla sim laato langka,” emla pomoto.