1 SAMUEL 4 - DEENA BAIBÉL (BSI)

Daapong Sondugem Rotkamname

¹ Dekepe ido delo Philistain kídare Israelem, mimak ipe gídumsuto. Dekepeila Israel ami kídar eteng, bulum mimak imín supe gílento. Ebenejerlo Israel kídíe, mimak notkuem delokke Apheklo Philistain kídíe mimak notkoem ibosuto.

² Philistain kídíe aabomla, yagorupe mimak imín surongem Israel ami kídíem éjar appi kope mimak iko delo petla ikumto.

³ Edílo mimaklok turna kídíe notkolo aatokudí, delo Israel lok ruutum kídíe pobosuto, “Kapei Ruutum bí Philistain kídíem ngolum ikum mokan? Kaju gíla Ruutum ke Daapong Sondugem Shiloh lok langa laju, Ruutum bí ngolu kelo lekope gíla ngolum miru kídílok mopít dope.”

⁴ Dekepeila, bulu Shilohlo amieke Maglíngke Ruutum ke Daapong Sonduk, alap gena Serubimke teyolo duunaem lamotoku. Delokke Eli ke oo annyi, Hophni lang Phinehas bínyi teng Daapong Sonduklo lekope aamín geto.

⁵ Edílo Daapong Sondukde píngatodí, delo Israel ami kídíe amonge petír gedope ashéla ngomto.

⁶ Philistain ami kídíde buluke ngomdudem tatla, “Tattola Hibru kídíke notko lokke ngomdud kídar sim. Esi íngko ekei mandune?” embosuto. Edílodín bulu Hibru notko delo Daapong Sonduk lokke pínganamem kénkadín,

⁷ delo bulu pesola, “Ako uyuko buluke notkolo angkai. Ngolu nyokkai. Sikepe atoe ngolukelo kerape ikímangai,

⁸ ralna uyu kídí elok sékoi ngolum mopít layén? Bulumin Ijipt amiem yépol mooruklo petpakna uyu kídíe.

⁹ Aapíe bottelangka, Philistain kídía, miga-mirampe momín sulangka, demamílo ngoluke abílpe buluke ituanam kísape ngolukom buluke abílpe iyé. Dekepeila miramnape momín sulangka,” emla erdope pobosuto.

¹⁰ Philistain kídíe ralnamrupe momínsula Israel ami kídíem ekumlo dugge dokupe ikumto. Delo deddína amiem petpakto. Israel sipayingem jarying angumko petto.

¹¹ Ruutum ke Daapong Sondugem rotkamla, Eli ke oo annyi Hophni melang Phinehas bínyim teng petto.

Eli ke Siname

¹² Benjamin opínlok amikone mimak makko among delok ila bedang rubung dem duklang kula, delo longe delo Shilohlo píítoku. Bíkke adírem lengkansupe bí galugem bétsula, kédéng eke dumpong delo mollíksuto.

¹³ Eli bí Daapong Sonduk legape míídírla, bedanglo duudola kaayang yatíto. Amide doolung lokke kéényung rego loope legadem pokan rongem takame yagorupe kapla-rííla ulo gogkai.

¹⁴ Eli bí adud-ayudem tatla íngkíto, “Íngkona adud-ayud eekei esi mandune?” Eli me pokanpe amide lomangto.

¹⁵ (Eli bí delo dítak takying konang kolang dítak píínyiko ila bík amigeteng mikmang dobong.)

¹⁶ Amide pokanto, “Ngo mimak ikolok dugnyokla, bedang rubung sim silo dugtoku.” Eli bím ííto, “Ngok ua, kape ikan?”

¹⁷ Pokannade poyansuto, “Israele Philistain kídílok duggetoku; ngoluke legape pesorunam ikumnampe ikai. Sok kékonlo, nokke oo Hophni melang Phinehas bínyim teng petto, delokke Shédíke Daapong Sonduk emteng rotbomkai.”

¹⁸ Edílo amide Eli me Daapong Sonduk legangem popatodín, delo Eli bí bíkke eyab delokke dungkeng delok tablaatla otoku. Bí mijing amílpe ila delokke giiname ila, oku kolok bí alíngem dírsula sikai. Bí Israel kídíem takying appiko yéboto.

Phinehaske Méng lok Siname

¹⁹ Eli ke nyameng Phinehaske mime koo gerado, delokke koodem odíeteng idobong. Edílo bí Shédíke Daapong Sondugem rotkamnam emlang bíkke ato abu kela milolok sinamem tattodín delo okii kila koo dem olento.

²⁰ Bíkke siyangpe iduem bím igulna mime kídíde bím poto, “Aapíe rallangka, no ooko paatung,” idola bí tatna tatmana kísa atí poyansumato.

²¹ Bí koo dem, “Shédíke angun-abée Israello kaimang,” emdola amínem Ikhabod emto. Bí sim Daapong Sondugem rotkamnam, delokke ato abu kela milolok sinamem mííbomla poto.

²² “Shédíke angun-abée Israelem mepakto, kapeila Shédíke Daapong Sondugem rotkamla bomkai.”