1 SAMUEL 31 - DEENA BAIBÉL (BSI)

Saul Kelang Bík Oo Kídíke Siname

¹ Philistain kídíe Gilboa díítumlo Israel kídíem mimak magto. Deddína Israel amiem delo petpakto. Petmanam anyong dela Saul lang bík oo kídíe delok duknyok getoku.

² Idola Philistain kídíe bulum monla, Saulke oo angum; Jonathan, Abinadab delokke Malkishuah me petto.

³ Mimak delo yagorupe Saulme miru kídíe gargo bomla, Saulme mirue epuk lok yagorupe apketto.

⁴ Saul bíkke gíníng yoksa geyabina yaamé koo dem poto, “Nokke yoksa delok ngom pettoi, demamílo dínbíng iyodsumana Philistain kídísi ngom aabomla petyé.” Idola, yaamé koo de depe ipe yagorupe pesoto. Dekepeila, Saul agí yoksem oordíng mopala omat sulíkto.

⁵ Yaamé koode Saulme sidope kaala, bíteng agí yoksa teyolo omat sulíkla, Saul kelo lekope sibosukai.

⁶ Dekepe Saul lang bík oo angume delokke yaamé koo de sikai; delokke Saulke ami takame delo siyinkai.

⁷ Edílo Jejreel among delokke kékon luune delang Jordan korong sanggolo duuna Israel ami kídíe, Israel sipaying kídílok duknyok genam emlang Saul kelang bík oo kídíke sinamem tattodín, bulu agíke doolung kídíem mepakla duknyokto. Depe irongem Philistain kídíe aala among kídídem duungang bomto.

⁸ Longe kondem Philistain kídíe sina kídíem among delok laabínpem iduem bulu Saul kelang bík oo angum simangem Gilboa díítum lo doodope kaato.

⁹ Bulu Saulke dumpongem teebínla, bík arem ege-galugem pítpakto, delokke Philistain among kéényung rego loope, tatpona legang sim buluke uyu kídí lolang ami kídílo pogodope melíkto.

¹⁰ Delo bulu bík gíníng yokseme uyu mime Astarte me kumkeng ekumlo leelíkto, delokke bík simang amílem Bethsan doolung lok etor suppi kídílo gojallok demlíkto.

¹¹ Edílo Gilead lokke Jabeshlo duuna amie, Saul kelo Philistain kídíke inamem tattodín,

¹² delo miram yalumna ami kídíe gílenla, yoh rubudem Bethsanpe gíto. Bulu Saul kelang bík oo angumlok simang kídídem layi langkula, Jabesh doolunglo gía palangkula, bulum delo romtoku.

¹³ Dekepe irongem, bulu along kídíem laalang, luune delokke Tamarisk esing rumkíng kolo yula, longe kínídko doma-tíímape nyoto.