1 SAMUEL 3 - DEENA BAIBÉL (BSI)

Samuelme Miripe Idope Tomname

¹ Koo Samuelke Elike poyil aralo, Ruutum ke agérem gérdo longe kídí delo, Ruutum kelok pokan agome anyongto, delokke kaarí kaanyo kaanam eteng asooto.

² Eli ke amige migmolla bí agíke ketkolo kedduem,

³ Samuel bí Daapong Sondugem meko kumkeng ekum delo ibdo. Sérage mitmang adape,

⁴ Ruutum bí Samuel me gogto, “Samuel, Samuel.” Delo Samuel bí “Sina ngo,” emla

⁵ Eli kíng dugala, “Kape no ngom gogdune?” emkansuto. “Ma, ngo nom tommang, ipto langkaku,” emla Eli bím poto. Dekepe ikolok Samuel iptoku.

^6-7 Ruutum bí lekoda Samuel me gogtoku. Koode Ruutum bí gogdung emla kénmaato, kapeila kerape Ruutum bí bím agom pokímato. Dekepe ikolok bí gerepla Eli kíng gíala emto, “No ngom tomkolok sina ngo.” Idola Eli bím poyansuto, “Ngok ua ngo nom tommang; ipto langkaku.”

⁸ Ruutum bí lengumnape Samuel me gogtoku, delo bí gerepla Eli kíng gíala, “No ngom tomkolok sina ngo aadune,” emla poto. Delo Eli Ruutum mai koo sim gogdune emla kénkai,

⁹ dekepeila bí Samuel me poto, “Ipto langkaku, delokke bí nom gogyé kumílo, sikepe polangka, ‘Potola Ruutum, nokke béérang ngo tatdung.’ ” Dekepeila Samuel bí ippu delo kedangtoku.

¹⁰ Kerape inam kísa, Ruutum bí aala delo dagdola, “Samuel, Samuel,” emla gogtoku, “Potola Ruutum, nok béérang ngo tatdung,” emla Samuel poyansuto.

¹¹ Ruutum bí Samuel me poto, “Longeko ngo Israel ami teyolo peso yirínam atoko iketlíkyé. Takam tatne sai emla míídope.

¹² Delo longe delo Eli ke erang teyolo ngok atímangem, ilen lokke iyin loope ilíkyé.

¹³ Ngo bím kerapekai porung tobong, bík erangem, ngo bík oo kídíke ngok teyolo atímape agom pokolok adírmoyé emla. Eli bí buluke atímape inamem kéndo teerílateng bulum luyamato.

¹⁴ Dekepeila, ngo arorupe sim podung, Eli ke erang teyolo, buluke belumrupe agér inam legape ajéngem ingkona ipak atí dokom, delokke amanem bidokom dem ipí-bipísuyimayé.”

¹⁵ Roh loope Samuel ipla irongem, delokke gerepla bí Ruutum ke ekum lokke eyab kídarem sityato. Bí Elime kaarí kaanyodem pogotsuto.

¹⁶ Eli bím tomla, “Samuel, ngok ua,” emdo delo, “E poyilne,” emla Samuel poyansuto.

¹⁷ “Íngko koda Ruutum bí nom pokanton? Ngom atí rumsup mapeka, ngom bík ponamem pobimamílo Shédíbí nom ajéng luyé,” emla Eli bí poto.

¹⁸ Dekepe ikolok Samuel bím takamem pokan bito; pomape atí rumsup nam kamato. Dem tatpala Eli bí, “Bímin Ruutum sue, bí bík mííbape takamem imosudung,” emla poto.

¹⁹ Samuel siisang yayang Ruutum bí bíkkíng yémín geto, delokke Samuel ke ponam takamem arope imoto.

²⁰ Dekepeila, takam Israel ami kídíe, doolung luune akon Dan lokke ila luunekon Beersheba loope, Samuel bí arorupe Ruutum ke kaaluna mirie emla kénlenkai.

²¹ Shiloh amonglo Ruutum bí Samuel me lengkansula lupo sukolo lengkan sutíto. Dekepeila, Samuel ke agomem Israel tabunge tatto.