1 SAMUEL 29 - DEENA BAIBÉL (BSI)

Philistain Kídíke Dabidme Míípakname

¹ Philistain kídíe buluke maglíng takamem Apheklo gídum suyin moto, delokke Israel kídíe Jejreel lok siirung kolo notkoem ito.

² Delo Philistain roja pilngode ayokone língkope, ayokone éjarpe ila sipayingem gíbola gílenduem, Dabid lang bík ami kídíeteng buluke méélamlo roja Akishme gíbosula gílento.

³ Philistain sipaying ruutum kídíde bulum kaala, “Si Hibru ami kídísi so kape idun?” emla ííto. Delo Akish poyansuto, “Si Dabid, Israellok roja Saulke ruutum akone. Bí ngokkíng deddína longem dungkabong. Bíkke so aado lokke ila, bím aklíng dope, bí atí aimana ato ngokke teyolo imang.”

⁴ Idola sipaying ruutum kídíde roja Akishme marbomla poto, “Sim ami sim, nokke bím bitonam among delo melíktoku. Bím ngolukelo lekope mimak gímo mapeka; kapeila mimak imín sudungem bí ngolum mirupe ilat suladoku. Saul bí bím mííba yékupe emla ngolum bí mokanam dem aiyana agér kamang.

⁵ Kapeila, ingkoko idokom, mime kídíke, ‘Saulbí éjar kídíem petto, idola Dabid bí jarying kídíem petto,’ emla paksongpe soola, miri lula gogge bomnam Dabid min bí.”

⁶ Akish Dabidme gogdola poto, “Ngo Israel kídíke turna Ruutumke amínlok pésudola, nokke ngok teyolo agom-aang tatbinamem podung, delokke ngokke pedan nom ngokkelo lekope mimak so gíla ibosunam dem aipe míídung. Ngo nokkíng atí aimana belengem nokke ngokkíng aado delokke ila supak loope kaapamang. Idola abíd kídíe nom aipe míímang.

⁷ Dekepeila, no aipe gílat sulangkuka, delokke buluke atímape míípenam atí agér imapeka.”

⁸ Dabid poyansuto, “Ruutuma, ngo íngko koda imemton? No ngok teyolo, nokke aralo agér gérbilen lokke ila silo loope atí aimana agér imang emla no podumílo, kapeda ngo nokkíng, ngok ruutum, ngok rojalo lekope gíla miru kídíem mimak imín sulaman?”

⁹ Akish poyansuto, “Ngo todung. Ngo nom Shédíke kotoki lok kísape agom-aang tatnape míídung. Idola abíd roja kídíe, no ngolukíng mimak so gílamang emla podung.

¹⁰ Dekepeila, Dabid no lang, Saulme mepak pala, ngokkíng duumínna nolu takame, nyampo rokomope gerepla enlangkuka.”

¹¹ Dekepeila, Dabid lang bík ami kídíe Philistain kídíke among danpe rokompe entoku delokke Philistain kídíe Jejreel danpe ento.