1 SAMUEL 28 - DEENA BAIBÉL (BSI)

¹ Dekena longe kídí delo Philistain kídíe Israel kídíem mimak ipe sipaying kídíe gídum sudoem Akish Dabidme poto, “Mínggap gelangka, no lang nok ami kídíe ngokke legape mimagem magdumsuyé.”

² Dabid poyansuto, “E, dekepemape iyén. Ngo nok béérange, ngokke nok legape ibínamem agísue kaasuyé.” Akish poto, “Airudo. Ngo nom ngom kaabomna sipayingpe iyarmoyé.”

Saulke Uyu Mime Konem Tomname

³ Samuelke sirongem Israel ami takame bíkke legape ankí-kenoem nyola, bíme bík agíke doolung Ramahlo yuto. Delokke Saul takam polu-poorna delokke uyu miri kídíem Israellok monpakto.

⁴ Philistain maglíng kídíde gídumsula Shunem doolung luune ampelo notko ila duuto. Saul Israel ami kídídem Gibeah díítum delo gídum sumola notkuem iboto.

⁵ Edílo Saul Philistain sipaying kídídem kaatodín delo bí pesola,

⁶ bí Ruutum me kape ipedí emla íngkíto. Idola, Ruutum bí bím atí poyan sumato. Immanglok delokke Urim loklang Thummim lok delokke kaalu-kangorna kídí lokteng popa bimato.

⁷ Delo Saul bí bík sipaying ruutum kídíem, “Ngom mime uyu miripe inako mata bilangka, ngo bíkkelo gíla íngkíyé,” emla lulíkto. “Endorlo ako dekepe inako kadung,” emla bulu Saulme poyansuto.

⁸ Dekepeila Saul kaamorodem irusula, angukon ege-galugeke pítlíksula, bík ami annyiko gíbosula uyu miri mimedem kaarík supe gílento. “Aid kídíem íngkíla, íngkokoi iyéne delok legangem ngom pobi. Delokke ngokke amín mínnam ami sokke aidem goglangka,” emla Saul miri mimedem poto.

⁹ Mimede poyansuto, “No arorupe roja Saulke Israel aralok polu-poorna delokke uyu miri kídarem ipak yinnamem kéndung. Demílo kapeda no ngom simope emla rukup líkdun?”

¹⁰ Delo Saul pésudola poto, “Turna Ruutumke amínlok ngo pésudung, nom sok legape atí ajéng imayé.”

¹¹ “Ngo sékoke aidem nokke legape gogpen?” emla mimede Saulme ííto. “Samuelke,” emla bí poyansuto.

¹² Edílo Samuelme uyu miri mimede kaatodín, delo bí ulo gogla Saulme poto, “Kapeda no ngom yadkane? No roja Saul laalo.”

¹³ “Pesomapeka,” emla rojade podola, “No íngkoko kaadun?” emla íngkíto. “Ngo ako aidko among arang belok saadope kaadung,” emla mimede poto.

¹⁴ “De kape kísape kaanamko?” emla Saul ííto. “Bí lukdor gena mijingko,” emla mimede poyansuto. Delo Saul Samuel rung emla kénla, among delo gubadola kumsuto.

¹⁵ Samuel Saulme, “Kapeda no ngom ebín ipaadun? Kapeda no ngome aalat sumo dungkune?” emla poto. Saul poyansuto, “Ngo botteruna ebínko kakai. Philistain kídíe ngom mimakpe ibomdung, delokke Shédí teng ngome mepakkai. Bí ngom atí kaalu-kangorna lokteng demangkom immang kídí lokteng poyan suyimang. Dekepeila moko, ngo nome ingkoko imíloi emla pobidope gogtungkune.”

¹⁶ Samuel poto, “Ruutumke nom mepakla nok mirupe irong emteng kapeda no ngom gogdung kune?

¹⁷ Ruutumbí, ngokke lok nom pomonam kídíem ilíktung: bí nokke lok among sim laabín langkula Dabid kíng biyan líktungku.

¹⁸ No Ruutumke lulíknamem tatmape ito, delokke Amalek ami kídí emlang buluke ekurang kídíem apíngpe nyokmomato. Dekepe itílamin, Ruutum bí nom supak sipe idune.

¹⁹ Bí nom lang nok amiem Philistain alaglo melíkyé. Nyampo no lang nok oo kídíe ngokkíng lekope yémín geyé, delokke Ruutumbí nok Israel sipaying kídíemteng, Philistain alaglo ruulíkyé.”

²⁰ Delopak Saul yamtarla among delo oletla, Samuel ke ponam dem tatla pesoto. Bí doyi-tííyi mangkolok amíle bengal alongto.

²¹ Uyu miri mimede Saulke pesorunamem kaala, bíkkíng gínín dola poto, “Ruutuma, ngo nok ponamem ibila, agíke turpenamlo pesonamem bomasutung.

²² Supak ngok konam sim tatbika. Ngom nokke legape dopenamko ngiibimoi. Ekerla endokupe no doperung aiyé.”

²³ Saul atí doma-tíímayé emla topaksuto. Idola bík sipaying ruutum kídíeteng bím dodo-tíídope roguto. Dekepeila, bí gerep langkula, ketko delo duula buluke roguem tatbito.

²⁴ Mimede menape ngeldorupe unam ruoko pala, ettíng anyongko laala, siiyé líkmape inyuto.

²⁵ Delo bí dope-tíípenam dem Saul kelang sipaying ruutum kídí keradelo leebila, bulu doto. Delokrongem, delo yume deloi delokke gílentoku.