1 SAMUEL 26 - DEENA BAIBÉL (BSI)

Dabidke Saulme Lennyinape Mesamname

¹ Jiphlok amieke Gibeahlo Saul kíng aala Dabid bí Judah among mongku-moorakke Hakhila dííte lokke kéényung kolo dung emla bím pobito.

² Saul lomla bíkkelo lekope Israel aralok gaiyalumna éjar angum sipaying ko gíbola mongku-moorang Jiph amonglo Dabidme matalenla,

³ Hakhila dííte delokke bedanglo notkuem ito. Dabid mongku-moorang delo duudo adíai. Delo edílo Saulke bím matanamem kénpa todín,

⁴ bí rokang goonako melíkla arope Saulke delo yénamem kaapato.

⁵ Delo Dabid gíla Saulke dongko notko delo aala, Saul lang bík sipaying ruutum Nerke oo Abnerme ipdope kaato. Saul notko aradelo ipdo, delokke bík ami kídíe bím notko dem gargo bomla duudo.

⁶ Delo Dabid Hittit ami Ahimelek melang Joabke bíro Abishai (Bínyike ane Jeruiah) me íngkíto, “Nonyíke aralok séko ngokkíng Saulke notko elo gímín geyén?” Abishai, “Ngo gíyé,” emla poyansuto.

⁷ Dekepeila, delo yume delo Dabid lang Abishai bínyi Saulke notko delo aala, Saulme bík gíníngem bík dumpong ampeng delo ulíkla notko delokke raadang delo keddupe kaato. Abner lang sipaying kídíde bím ipgo bomdo.

⁸ Abishai Dabidme, “Shédíbí nok miruem siyum nok alaglo melíkdung. Ngom supak bík gíníng sulok bím amonglo letel lok upetlíkmoi. Ngo bím lennyipe ubom sunam kamayé,” emla poto.

⁹ Idola Dabid poyansukai, “No bím atí-sirí ipe aimang! Ruutum bí berokrupe bíkke ullen sunam roja em atí-sirí inadem ajéng iyé.”

¹⁰ Poyon dola Dabid poto, “Turna Ruutum kelok ngo kéndung, bí agísue Saulme, bík moodíe pííla sigosupe demangkom mimaklo sidíe pííla simoyé.

¹¹ Ruutumbí ngom bík agíke ullensunam roja teyolo ngok alagem píílík momaika! Kaju bík gíníng emla bík asi gíriem bomla gílang kupe.”

¹² Dekepeila, Dabid Saulke dumpong ampepak delok Saulke gíníng emlang asi gíriem laalang, bí lang Abishai bínyi gítoku. Séko kom bínyim kaana, delokke kénna kamato, delokke darkuna koteng kamato; kapeila Ruutum bí buluke teyolo yagorupe imminamem melíkla, bulu ipto.

¹³ Dekepe ipala, Dabid delok gílangkula, dííte arot kondan delokke polong delo daggen dolang kula,

¹⁴ Saulke sipaying kídí emla Abner bulum gogdola, “Abner, no ngom tatpadon?” emla ííto. “Sékoi ulo gogdola rojeme utdune?” emla Abner íngkíto.

¹⁵ Dabid poyan suto, “Abner, no Israel aralokke botte yalumna ami manía? Dekepe ilateng, kapeda nok ruutum rojaem, no kaabomman? Supakpak amiko notko delo aala nok ruutum dem petpem ituai.

¹⁶ No agérlo tumangkai, Abner no. Ngo turna Ruutumke amínlok pésudung, nolu takam sinamem paabadung. Kapeila Ruutumke rojape imonamem nolu kaabom lamato. Kaangkítola, íngkoloda rojalok gínínge? Roja dumpong ampelo menam asi gírie íngkoloda?”

¹⁷ Saul Dabidke gomugem tatkéndola ííto, “No ngok oo Dabidya?” “E, ngo mino, ngok ruutuma,” emla Dabid poyan suto.

¹⁸ Bí poyon dola poto, “Ngok ruutuma, kapeda no nok béérang sim supak loope montí bomkan? Ngo nom íngko koda itone? Ngo íngko imem koda katune?

¹⁹ Ngok ruutuma, ngok ponam sim tatgap bika. Ruutum bí nokke mirupe imotumílo, ipakko imílo bík aapíem angu moyéku; idola, ami kídíe imotumílo, Ruutum ke péname buluke teyolo píílík daklangka. Kapeila, bulu ngom Ruutumke amonglok monpak geyéla mipak uyu-urom kumsuko amonglo dekedem kumsudope monlíktung.

²⁰ Ruutum kelok mootengpe mela ngom mibo amonglo petpak momapeka. Tamid kísana ngom petpe, ingkopeda Israel lok aabom sudun? Kapeda, ngom moonam pettang kísa apletpe idun?”

²¹ Saul poyansuto, “Ngo imemto. Dabid, ngok ua. Aalat sulangkuka! Ngo nom edílokom atímape iyimayé, kapeila, no siyoh ngom petmato. Ngo miderupe ito! Ngo pesorunam atíko ito.”

²² Dabid emyansuto, “Ngok ruutuma, sina nok gínínge. Nok ami akonem so melíkla, lamo tolangku.

²³ Ruutum bí mínggap genem lang yéjinem aman bidung. Silo bí nom ngok alaglo melíktuai, idola Ruutumke rojape imonam nom, ngo atí imato.

²⁴ Ngokke silo nokke sipenamem mesamnam kísa, Ruutum kom ngok teyolo dekepakpe ila ngom adír takam lok mopít daklangka.”

²⁵ Saul Dabid me poto, “Shédí bí nom utepooroem bidak langka, ngok ua. Nok gérnam takamlo no apíngyé.” Dekepeila Dabid agí bedape entoku delokke Saul agí ekumpe enlat sutoku.