1 SAMUEL 23 - DEENA BAIBÉL (BSI)

Dabidke Keilah Luuneem Mopítname

¹ Philistain kídíe Keilah luune em mimak iyabomla, buluke yikla menam ali kídarem doppyonamem Dabid tatpaato.

² Dekepeila, bí Ruutum me íngkíto, “Ngo gíla, Philistain kídíem mimak imín sumíloya?” Ruutum poyansuto, “E, bulum imín sula Keilah doolungem mopít langka.”

³ Idola Dabidke ami kídíe bím poto, “Ngolu Judah among soteng pesola duudung; iname, Keilah elo gíla Philistain sipaying kídarem mimak imínsupe inamde pakyangko loorí mayayé”

⁴ Dekepe mankolok Dabid lekoda Ruutum me tatkí sutoku, delokke Ruutum bí bím poto, “Keilahpe toklangka. Kapeila, ngo Philistain kídíem noluke alaglo bilíkdung.”

⁵ Dekepeila, Dabid lang bík ami kídíe Keilahlo tokla, Philistain kídíem mimak imínsuto. Bulum deddínem petla, buluke taro kídíem langkamto. Sikepe Dabid bí dem doolung dem mopíto.

⁶ Edílo Ahimelek ke oo Abiathar bí dukpísula Dabid kíng Keilah lo píítodín, delo bí Ephod em alaglo bomla tokto.

⁷ Saulme Dabidke Keilahlo gítok namem pobitokunem, bí pokai, “Shédíbí Dabidme ngok alaglo melíktung. Kapeila, bí edíírupe luyabkana delokke elínglok suppi píbumnam luune delo gíala agísuem tumsukai.”

⁸ Dekepeila, Saul bík sipaying kídídem Keilahlo tokla, Dabid melang bík ami kídíem gargoola bulum mimak ikum dope goklíkto.

⁹ Edílo Dabid bí Saulke bím mimak iyabom penamem tattodín, delo bí miri Abiatharme poto, “Ephod dem so bomato.”

¹⁰ Delo Dabid pokai, “Ruutum Israelke Shédí, Saulke Keilah so tokla ngok legape sim doolung sim nyokmope emnamem ngo tatto.

¹¹ Keilah sok ami kídíe ngom Saul kelo melík yénía? Ngok tatnam kísape, arope Saul bí tokyérunía? Ruutum Israelke Shédí, ngome poyan subika!” Ruutum bí poyan suto, “Saul bí aayé.”

¹² “Delokke, Keilah sok ami kídíe ngom Saulke alaglo melík yénía?” Dabid íngkí tokukéng. “Bulu melíkyé,” emla Ruutum poyan suto.

¹³ Dekepe ikolok Dabid lang bík ami kídíe idumsula língko akké kope Keilah delok delopak gílenla moole-moolelo byakgooto. Edílo Saul bí Dabidke duknyok genamem tattodí, bí Keilahlo aamato.

Dabidke Dííte Amonglo Yéname

¹⁴ Dabid dííte among kídílo rusi sugong gela, Jiph anínke yépol mooruk among delo duuto. Saul bím loodíke matato, idola Shédí, bíme bíkke alaglo melíkmato.

¹⁵ Dabid Saulke bím petpe manamem kaato. Dabid bí Jiph anínke yépol mooruk lokke Horeshlo duuto.

¹⁶ Delokke Saulke oo Jonathan bí gíla Dabidme Horeshlo Shédíke kaabomnamem ludí-podíla popabitoku.

¹⁷ Bí poto, “Pesomapeka, ngok abu Saul bí nok teyolo alag uktet mayé. No Israel lok rojape ipoyé. Delomin ngo nok méélampe imín genape iyéne. Sim ngok abu Saul teng airupe kénsudung.”

¹⁸ Bínyi Ruutumke keralo daapongko ibosuto. Delok rongem Jonathan ekumpe entoku delokke Dabid Horeshlo duupoto.

¹⁹ Jiph lok amieke Gibeahlo Saul kíng gíla posito, “Dabid bí Judah lokke sokkkodan yépol mooruklo ngoluke amonglok Hakhila díítelo duuna Horesh lo rusisula dung.

²⁰ Dekepeila, roja nok mííbape ngolukíng toktola, delokke bím nokkíng bilíkyé emla ngolu togesudung.”

²¹ Saul poyansuto, “Ngom ayanam legape Ruutumbí noluke teyolo utepooroem ruulík daklangka!

²² Gílangkula lekoda peebepe kaapotokaku; ingko pak lodín bí duudun delokke sékodín bím delo kaatone dem berokpe matapoto kakuka. Bí rukup-rulatnako emla ngo tatdung.

²³ Bíkke rusi suko kídídem peebepe kaatola, ngokkíng delok legangem menape boma bilangkuka. Delok rongem ngo nolukíng gímín geyéku. Bí so asi-among so duudung adamílo, ngo bím malen ruyé, delok legape ngo takam Judah amongem kiirukpe ibompe aidokom iyé.”

²⁴ Dekepeila, bulu Saulke kerape Jiphlo aalat sutoku. Dabid lang bík ami kídíe, Maon emnam yépol mooruk amonglo, Jesimonke sokkodanke Arabah amonglo duudo.

²⁵ Saul lang bík ami kídíe Dabidme matape gílento. Idola Dabid bí dem tatpala, Maon among delokke líírengpe ina dííte kolo renggela duuto. Edílo Saul dem tattodí, bí Dabidke méélamlo gímín geto.

²⁶ Saul lang bíkke ami kídíe dííte delokke arotkon delo delokke Dabid lang bík ami kídíe arotkon delo ito. Bulu Saul kelang bík ami kídí delok lomgetoku, kapeila bulum umpe anín alope bulu píínínduai.

²⁷ Delopak, kotokiko Saul kíng aala poto, “Menape aalat sutolangku. Philistain amie ngoluke amongem iyang aabomdung.”

²⁸ Dekepeila, Saul Dabidme monmín geyimape Philistain kídíem mimak ipe enlat sutoku. Sok legape dem among dem Sela Hamalikot emdung.

²⁹ Dabid delok enlenla, Engedi amongpe gíla, delo rusi sugola yétoku.