1 SAMUEL 20 - DEENA BAIBÉL (BSI)

Jonathanke Dabidme Igulname

¹ Dabid Ramah lokke Naiothlok duggela Jonathan kíng aala, bím ííto, “Ngo íngko koda iton? Íngkona imem koda ngo iton? Nok abue ngom petpe míídope, ngo bím íngko koda iton?”

² Jonathan poyan sudola poto, “Shédíbí nom simo madakyika! Ngok abue, bottedokom, amédokom takam atoem ngom kénmomape ikímang. Dekepeila, sim legang sim ngokke lok bí kape rumsup yén? Sikepe imaruyé?”

³ Idola Dabid poyansuto, “Nok abue, nokke ngom mííbanamem airupe kéndung. Dekepe ila bíkke ipeem mííbomnam em nom kénmo pemang em itung. Kapeila, de nom yagorupe ankímoyé. Ngo turyarna Ruutumke amín loklang nok amínlok pésudung, ngokke sipenamlok ngo lekor komin dongge dune.”

⁴ Jonathan poto, “Ngo nok míínam atí takamem ibiyé.”

⁵ Dabid poyansuto, “Nyampo Poolo Aní adeng-apee, delokke ngo roja kíng lekope dobosupe idung. Idola ngom gímola réé ke yume loope arík elo rusi sumotoi.

⁶ Nok abue dobo suko delo ngok kamanamem kaayémílo, ngo ngok erang takam legape dítak ipagem ilíkkupe Bethlehempe ekumlo enkupe nokkíng roguto, emla pobi langka.

⁷ Bí ‘Aiyé,’ emla poyémílo, ngo pesopenam kamang; idola bí maryémílo, bí ngom petpe míídung emla kénlangka.

⁸ Sim ngok rogu sim no ibila, nok ngokkíng deenampe pésunamem mesiisulangka. Idola ngo, imem dumílo, no ngom petsutola! Íngkopeda, no ngom nok abulo petdope ngom melíkyén?”

⁹ Jonathan poyansuto, “Sikepe no míípeteng míímapeka! Ngo ngok abue nom petpe emla míídung emla kéndomílo, nom pomape iyénía?”

¹⁰ Delo Dabid íngkíto, “Nok abue nom marbomla inamko kayémílo séko ngom pobiyékune?”

¹¹ “Kaju arík elo enlen laju,” emla Jonathan poyansula bínyi enlen bosuto.

¹² Delo Jonathan Dabidme poto, “Ruutum Israelke Shédí bí ngonyike hakiipe idak langka! Nyampo lang longekon telo, sikena moodílo ngok abuem ngo íngkíyé. Bík akor-ayore nok teyolo aiyémílo, ngo nom agomko políkyé.

¹³ Delokke bí nok teyolo aipe míímayémílo, delokke dem legang dem nom ngo pokanla, nom duusi supekolo gímo mayémílo Ruutum bí ngom simo daklangka. Ruutum bí ngok abulo duutuanam kísape nokkíng duumín gedakyika.

¹⁴ Delokke ngo turla duuyémílo, nok deenampe pésunamem mesiisula ngom ayasulangka, delokke ngo siyémílo,

¹⁵ agínpe ngok erangem ayangem lengkan dakyika. Delo edílo nok Ruutum bí nok miru takamem ipak-pakyin yédí,

¹⁶ delo ngonyike pébosunamem betmo mapeka. Dem betyémílo Ruutum bí nom ankímoyé.”

¹⁷ Lekoda Jonathan Dabidme bím ayadope pésumoto, kapeila, Jonathan bí Dabidme agísuem ayanam kísape ayadungai.

¹⁸ Delo Jonathan sikepe bím poto, “Nyampo Poolo Aní adeng-apepe ikolok, no dobo sukolo duumayémílo, nokke dumanamem kaaparuyé.

¹⁹ Nyampoke kékon longe delo range nok duumangem kaapa momoyé; dekepeila, kerape nok rusisuko elo gíla, Ejel emnam elíng méélam delo rusisula duulangka.

²⁰ Dem elíng dem ngo appenampe mííbomdola, epuk angumko aplíkyé.

²¹ Delok rongem, ngok béérang dem ngo, gíla mata dokupe tomlíkyé, ngo bím, ‘Kaatola, epuk kídarde nokke danlo kadung, dekedem títoku,’ emyémílo, de nok ai-asangem pobinampe iyé. Iname, delokke no lenladoku. Ngo turna Ruutumke amínlok pésudung, nokke pesopenam atí kamayé.

²² Idola ngo bím, ‘Epuk kídare nokke kékon dena kadune,’ emyémílo, no gíperung aiyé; kapeila Ruutum bí nom megédung.

²³ Delokke ngonyike pébosunam kepe dan Ruutum bí hakiie. Ngonyi dem bomyar bosupe aiyé.”

²⁴ Dekepeila, Dabid arík delo rusisukai. Poolo Aní adeng-ape delo, roja Saul dope-tíípeem aato.

²⁵ Bíkke duuyangko suppidan delo bí duungato. Abner bík ampeng delo duuto, delokke Jonathan bí Saulke danpe duuto. Dabidke dungkue araalateng,

²⁶ delo longe delo Saul atí pomang. Kapeila bí mííto, Dabid kíng atíko depekom ila, bí dormo ayonlok deemanape ikanape emla.

²⁷ Longe kon delo Poolo Aní adeng-ape longe méélam demte Dabidke dungkode araadada kolok, Saul Jonathan me íngkíto, “Kape, Dabid bí dobo supeko so melola silo aamane?”

²⁸ Jonathan poyansuto, “Bí ngom Bethlehempe gímo dokupe rogula,

²⁹ ‘Ngom gímo pongkui, kapeila, ngok erange luune elo ipak domanko dodak, delokke ngok bírue ngom delo duubo sudope lulíktung. Dekepeila, no ngok angong emílo, no ngom ngok edung-erangem kaarík sudope gímokui,’ emko lok bí so roja dobo suko so aamangkai.”

³⁰ Delo Jonathanke teyolo Saul bí yagorupe marbom lenla poto, “Bírík-hamgo mape ila ségoona ane lokke oo no. Ngo supak kénkai. No Dabidke danpe ila, agí lolang ane teyolo annyingem laalík sudung!

³¹ Dabidke turdung tetengem, no sok among sokke rojape imaruyé emla kénsumanía? Supak gíla, bím so bomatoku. Bí siperung aiyé!”

³² Jonathan emyansuto, “Bí kapeda siyéne? Bí ingkokoda iton?”

³³ Dekepe emrodem, Saul bík gíníng dem Jonathan me gepetpe sutlíkto. Delok Jonathan bí Saulke, Dabidme petperung míínamem kénkai.

³⁴ Jonathan dope dungko delok atí koteng delo longe delo domape yagorupe marla gerepto. De Poolo Aní adeng-apeke loonyinana longe. Bí yagorupe Dabidke legape adírto, kapeila, Saul bí bík teyolo lué-luléla ito.

³⁵ Roh kondem, Dabidme Jonathan bínyike porung bosunam kísape kaarík supe arík delo gílento. Bíkkelo yaamé koo ko gíbola,

³⁶ bím poto, “Ngok epuk appenam kídí sim matadokupe, dukkai.” Koode dukrongem, Jonathan epukko bím byarbodope aplíkto.

³⁷ Edílo koode epuk oko delo píítodí, Jonathan érlíkto, “Epuk de nokke kékon dena.

³⁸ Delo daktí mapela! Menape itola.” Koode epuk dem tíla, bík ato delo bomatoku.

³⁹ Bí delok legangem atí kénmato, idola Jonathan lang Dabid bínyi kénbosuto.

⁴⁰ Jonathan koodem bík iyyi epuk kídídem doolung delo bomla gídokupe lulíkto.

⁴¹ Koo delokke gírongkuem, Dabid sokko dan delokke elíng méélam delok lenlang kula, lebíng konídola lengumko among delo gubaato. Dekepe ipala, Jonathan bínyi mumpup bosudola kapto. Jonathan mempemílo Dabid ke ankí-adíre bojéyato.

⁴² Delo Jonathan Dabidme poto, “Shédíbí nokkíng duumín gedak yika. Ruutum bí nokke lang ngok pénsamlo, nok otíng-oyine lang ngok otíng-oyine, agínpe ngonyike deenampe pébosunamem bombo suyaryé emnamlok hakiie.” Dekepe ipala, Dabid gílenkai, delokke Jonathan teng doolungpe aatoku.