1 SAMUEL 2 - DEENA BAIBÉL (BSI)

Hannahke Kumname

¹ Hannah bí kumto, “Ruutum bí ngok aapíem ashémoto, edítko ngo bík ibinam legape ashéngkan, ngok miru kídíem ngo ngilka dungku, Shédí bí ngom igul kolok, ngo ashéng along dungku.

² “Ruutum kísana deena kamang, sékote bík kísana kamang, ngoluke Shédí kísana kaabomna kamang.

³ “Nok yidsudem metola, nokke adum-ale agomem metola, kapeila Ruutum bí kénna Shédíe, delokke bí takam agérem rungkenge.

⁴ “Ralna kídíke ityi epuge dírkai, idola ralmana kídíem ralmo toku.

⁵ Dodarna kídíe donam legape yére sukaku, kenona kídíe donamem paangkaku, negene oo kínídpe okaku, oo kana kídíe kaimanape ikaku.

⁶ “Ruutum bí nyokmone lang delokke turmone, delokke siko among lokom melíkne, delokke turdokupe ilane.

⁷ Bí ayokonem opan modung, delokke ayokonem mirem modung. Ayokonem rumkíng modung, delokke ayokonem kedon modung.

⁸ Bí opan aréénem kiirep kune, delokke kaabonem apíípe bine; bí bulum roja oo kídílo angongpe imola, bulumteng mínggenampe imodungku. Kapeila tani among sok gaang kídíde Ruutum ke. So gaang kídíso bí taleng-kuppo sim pílíktung.

⁹ Bí deena ami kídíke yénamem gagbomdung, delokke deemana kídíe amonglo nyoklíkyé, kapeila séko amiekom agí ralnam sulok ikum sulamang.

¹⁰ Ruutum ke miru kídíem nyokyinmoyé, bí buluke teyolo, teyong amonglok doomír-yaarípe ibomyé, Ruutum bí taleng-kuppo sim íngkí-bengkíyinyé, bí bíkke rojaem ralnamem bilíkyé, bí bíkke ullen sunam rojaem ikummoyé.”

¹¹ Delo Elkanah ekumpe Ramahlo entoku, delokke Samuel bí Shiloh lo Ruutum ke agérem miri Eli ke aralo ilenkai.

Eli ke Oo Kídare

¹² Eli ke oo kídarde atírung maneke. Bulu Ruutum me atí pesomato.

¹³ Delokke ami kídíde ipak atí iyém, miri kídíke ayon ilík penam emte bulu igepe míímato. Dekepe imape, edílodín ami kone ipagem ilík bomyédín, delo miri kídíke béérangde tabyab kotubem bomala, adínem togu bottenalo keedung ada pekai,

¹⁴ béérangde lukung dem togu aralo delo ulíkla, íngko kodín ulen bomyédí de miri kepe idungíai. Takam Israel ami kídíem Shilohlo ipak ikape aanem sikepe irík sudungai.

¹⁵ Sok teyong loteng oobem langusula rommang adape, mirike béérangde aala ipak inam adínem, “Ngom miri legape muree bidope adín anyongko bitola; bí nokke lok keenam adínem torík sumayé, petom yayina adínem toríksuyé,” emla podungai.

¹⁶ Delo amide, “Ngom aroem imopotoi, delokke oob sim rommopoi, delok rongem nok mííbanamem laalangka,” emla poyém miri béérangde, “Ma, supakpak ngom bitoka, delokke bimamílo, ngo rotyamyé,” emla luyan sudungai.

¹⁷ Eli ke oo kídíke si imem si Ruutum ke amig keralo yagorupe kaabamanampe ito, kapeila bulu Ruutum kelope ipak ilíknamem míngkampe kaarík sumato.

Shiloh lo Samuel

¹⁸ Dekepe idudem Samuel bí Ruutum ke agérem, Ephod galukko gela, gérla duuto.

¹⁹ Dítak miyongke bík ane, bík legape galuk sumbila, bík milo delo lekope dítak ipak ipe gíyém gímín gela bím bidungai.

²⁰ Delo Eli Elkanah melang bík mimem utepooro kolík bidola, Elkanah me poto, “Ruutum kelope nokke tolíknam oo ayanpe, sok mime sok abíd ome-uemteng omo daklangka.” Dekepe irongem bulu ekumpe entoku.

²¹ Ruutum bí arope Hannah me ayala, bím oo angum kolang ome annyiko otem motoku. Koo Samuel Ruutum me agér gérbidola siisangto.

Eli lang Bík Oo Kídíe

²² Eli mijing alope ito. Bík oo kídíke Israel ami kídíke teyolo inam takamem tattíto, delokke Ruutum ke dungko Tombu lokke lamgélo agér gérna mime emteng buluke ketbo sugangem bí tatto.

²³ Dekepe ila bí bulum luto, “Kapeda nolu sikesim idun? Takame ngom noluke loorímana agér inamem pobídung.

²⁴ Ngok oo kídía, dekepe iyimapeka; Ruutum ke ami kídílok ponam kídar si tatpomanam agéreke.

²⁵ Amikone angukon amikonem imemmílo, Shédíbí pénsam kebangem lubiyé. Idola séko amie Ruutum ke mirupe paab iyédí, íngko amieda Ruutum ke keralo kebang lubilayén?” Idolangkom bulu, buluke abulok ponamem tatbimato, kapeila Ruutum bí bulum petpakpe mííto.

²⁶ Koo Samuel dan siisala Ruutum kelang ami takam ke keralo mííba nampe yésato.

Elike Edung-erangem Polu-poor Biname

²⁷ Kaaluna miri kone Eli kíng aala, sim pokan agom sim Ruutum kelok pobito, “Nokke buku Aaron delo bík erang kídíe Ijipt among lokke rojake abílpe iduem, ngo agísue Aaronme lengkansuto.

²⁸ Takam Israel opín aralok bík erangem ngo miripe ila, deena runggulo agér gérbíla, namponem romla, Ephod galugem ngom lupo sudope gela idope ullenmanía? Delokke ngo bulum deena runggu delo ipak ilíknam delok tarong paadope imoto.

²⁹ Demílo, kapeda ami kídar lok ngok míínam ipak aman teyolo no kaabodola kaangkan? Kapeda Eli no, ngom pemílo nok oo kídíem mínggeyala ngok ami kídíke ipak aman binam lokke gaiyalumnem bulum ngelgedope domokan?

³⁰ Ngo Ruutum, Israel ke Shédí, nok erang emlang, nok opínem ngokke miri agérem iyardope emla ngo kerape pésutuai. Idola supak ngo podung, ngo dekepe imoyimayé. Dekepe imape, séko ngom mínggedudí, bím ngoteng mínggeyé, delokke ngom mepaknadem ngoteng mepakyé.

³¹ Tattola, nokke erang delokke opín-buang kídí yaamé takamem, ngokke petpakdíe píídak. Nokke eranglo mijingpe turlíkna kaimadope,

³² no adírla, nela idope, ngokke utepooroem abíd Israello bilíknamem kaayé, delokke nokke erang lodan sékokom mijingpe ila duuna kamayé.

³³ Dekepe iduakom, ngo nokke otíng kídílok ako turmoyé, delokke bí ngokke miri agérem géryé. Idola bí mikmala míínam sunana takame nyokyé, delokke nokke abíd otíng-oyin edan gérmarupe siyinyé.

³⁴ Sim takam ngok ponam si arope iyé emla, nokke oo annyi Hophni lang Phinehas bínyike longe lotello lekope sikolok kaangkényé.

³⁵ Ngo ako miriko ngok míínampe yéla, ngok míínamem ibinako ullensuyé. Ngokke ullen sunam roja kídílo agérpe gérdope, ngo bím otíng-oyinem biyé.

³⁶ Nokke otíng-oyineke turyémílo, so miri so gíla abal, delokke apimem kope aiyé, delokke miri kídarem, bulu dopadope igul dope rogupe aiyé.”