1 SAMUEL 15 - DEENA BAIBÉL (BSI)

Amalek Kídíem Mimak Iname

¹ Samuel Saulme poto, “Ngomino Ruutumke nom Israel lokke rojape idope, pídélíkdope melíkname. Miramna Ruutum ke popenam sim supak tatlangka.

² Ruutum bí Amalek ami kídíem adír biyé, kapeila buluke buku-neku kídíe Israel ami kídíem Ijipt among lok aadakkuem mimak iyabomto.

³ Gíla Amalek kídíem mimak ila, buluke takam ekurangem nyokyin molangka. Atí koteng mepak mapeka; milokong kídíem, mime kídíem, ome-oo kídíem, ojing kídíem, taroem, mérem, uut simonem delokke gado kídí takamem petyin songkin langka.”

⁴ Telem amonglo Saul bí bík sipaying kídíem gogdumsula, bulum aipakpe kaayinto: Israel lok sipayinge midum 200,000 ko delokke Judah lok sipayinge 10,000 ko kado.

⁵ Delo bílang ami kídíe Amalek kídíke luune delo gíla, asi ongkuna kobung kolo rusisula duuto.

⁶ Delo bí Israel ami kídíem Ijipt among lok endakkuem ai-kampope iríksuna Kenit ami kídíem lutor agomko políkdola poto, “Nolum ngo bulukelo pettak sumadope, Amalek ami kídíem mela angukon among kolo gíge langka.” Dekepeila Kenit ami kídíe angukon amonglo gígeto.

⁷ Saul Amalek kídíem Habilah lok ila Ijipt lokke sanggodanlo duuna Shur among loope mimak ila ikumto.

⁸ Bí Amalek kídíke roja Agagme turdope umto delokke ami takamem petyinto.

⁹ Idola Saul lang bík ami kídíe Agagme petmang delokke ngella kampona mér emla gooruem delokke méro kídar emlang ruo kídarem delokke aipe kaanam ato takamem mesiisuto; bulu petom agér aamana, are kamana kídarem nyokyin moto.

Saulme Rojalok Míípakname

¹⁰ Ruutum bí Samuel me poto,

¹¹ “Ngo Saul me rojape imonamem bursu dungku; ngokke lok angu danpe gíla, ngok lulígem tatmape bí ikai.” Samuel yagorupe adírla, yoh ruubung dem Ruutum kelo kapgusuto.

¹² Roh dem rokompe, bí Saul me matape gílento. Delo bí Saul ke Karmel luunelo gíla agíke amínem mínkeng dope lípangko pípala, Gilgallo gíkai emnamem tatpaato.

¹³ Dekepeila Samuel Saul kíng, gíala iname, Saul bí bím yamrík dola poto, “Ruutum bí Samuel nok teyolo utepooroem bidak yika! Ngo Ruutum ke lulígem igeto.”

¹⁴ Samuel íngkíto, “Demílo ngo kapeda mér sobén delokke taro kídí muudud em tatkan?”

¹⁵ Saul emyansuto, “Ngok amie sike sim Amalek kídílok latung. Bulu gaiyalumna mérem, taro kídíem Ruutum nokke Shédíme ipak amanpe ibipe mesiitung delokke abídem ngolu apíngpe nyokyin moto.

¹⁶ “Asoope. Ngo nom meyum Ruutum ke ponamem pobiyé,” emla Samuel luto. Delo Saul, “Ngom pobi,” emto.

¹⁷ Samuel pobito, “No agíem agér kamana kope míísutuakom, no Israel opín kídíke ruutume. Ruutum bí nom Israel kídílo rojape pídé líkto.

¹⁸ Delokke bí nom bííríkmana Amalek ami kídíem nyokyin modope lulígla melíkto. Bí nom bulum petyin-songkinmang tetedem mimak ibom langka emto.

¹⁹ Demílo no kape bík lulígem tatmang kane? Kape no miru kídar lokke ekurangem lombomla, ruutumke kaaba manampe ikane?”

²⁰ Saul Samuelme poyansuto, “Ngo Ruutum ke lulígem ito emla míísudung. Ngo bík pokampe gíla, roja Agagme bomalangkula delokke takam Amalek kídíem petyinto.

²¹ Idola ngok ami kídíe gaiyalumna mér emla taro kídíem petmape igeyéla, bulu dekedem Gilgal so Ruutum nokke Shédíme ipak amanpe bipe bomatung.”

²² Samuel poto, “Ingkoemda Ruutum bí mííbayadun? Bík agomem tatbinam emía, ma ipak aman binam kídí emía? Gaiyalumna mérko bím ipak ilíkbinam dem pemílo bík agom lulígem tatbinam de aiyadung.

²³ Bíkke lulígem tatmanade moya-montrong agér kísa loorímana ekurange, delokke míngkím sunamde uyu mimang kumsunam kísana paab ekurange. Nokke Ruutum ke lulígem míípak kolok bíteng nom rojape mííyimangkai.”

²⁴ “Arope ngo paab ito,” emla Saul poyansudola, “Ngo Ruutumke lulíg emla nok polík kídarem ipéésuto. Ngo ngok ami kídíem pesola buluke míínampe agérem gérbito.

²⁵ Idola supak ngo nom rogudungku. Ngok imemem ayangla mesam bila, ngo Ruutum me kumsu dokupe ngokkíng gílat míntokui,” emto.

²⁶ “Ngo nokkelo lekope gílat mínkumayé. No Ruutumke lulígem míípakla, bíteng nom Israelke rojape mííyi mangkai,” emla Samuel poyansuto.

²⁷ Delo Samuel gíkupe em pelkut sudokuem Samuel ke egelok Saul hoyapem iduem egede bétkai.

²⁸ Delo Samuel Saul me poto, “Ruutum bí silo Israel yétaem nokke lok pétpak pala, nom penem aiyana, nokke kumrí amikon kolo ruulíktoku.

²⁹ Israelke miramruna Shédíbí edílokom yadmang delokke tani kísa bík aapíe míngkup-míílatmang.”

³⁰ Saul poyansuto, “Ngo paab ito, idola Israelke ruutum kídí kera lolang takam Israel keralo ngome míngge bilangka. Ngokkíng gílatmín getokui, ngo Ruutum nokke Shédíme kumsu dokupe.”

³¹ Dekepeila, Samuel bíkkíng gílatmín gelangkula, Saul bí Ruutum me kumsutoku.

³² “Roja Agagme so ngokkíng bomato,” emla Samuel lulígto. Agag bí delo agí aapílo, “Ngom depekom supak petyimayé,” míísula ashéngla aato.

³³ Samuel pokai, “Nokke yoksae kapekísa deddína aneme koo kaimadope imotodín, dekepe, mime aralo nokke anekom koo kaimayé.” Dekepe empala bí Agagme Gilgal lokke runggu keradelo patung-payungto.

³⁴ Dekepe ipala, Samuel Ramahpe entoku delokke roja Saul bík ekumlo Gibeahpe entoku.

³⁵ Samuel ke turdung tabungem Saulme kaarík suyimato. Idola bík teyolo ankíbito. Ruutum bí Saulme Israel lok rojape imonamem bursutoku.